រដ្ឋាភិបាលវៀតណាមកំពុងស្វះស្វែងរកទិញវ៉ាក់សាំងពីទីផ្សារវ៉ាក់សាំងនានានៅលើពិភពលោក ដោយសង្ឃឹមថា នឹងអាចទប់ស្កាត់ការឆ្លងជំងឺកូវីដ១៩ដែលកំពុងកើនឡើងយ៉ាងខ្លាំងដោយមិនចាំបាច់មានការបិទខ្ទប់ដូចដែលធ្លាប់បានធ្វើកាលពីកន្លងទៅ។ ការបិទសកម្មភាពដែលវៀតណាមបានធ្វើកាលពីពេលមុនបានធ្វើឲ្យសេដ្ឋកិច្ចធ្លាក់ចុះ និងបង្កការខឹងសម្បាពីសាធារណជនកាន់តែខ្លាំង។
មិនខុសពីប្រទេសឯទៀតនៅជិតខាងក្នុងតំបន់អាស៊ីខាងកើតវៀតណាមធ្លាប់មានអត្រាឆ្លងខ្ពស់បំផុតរួចហើយចាប់តាំងពីការផ្ទុះឡើងនៃជំងឺរាតត្បាតនេះកាលពីដើមឆ្នាំមុន ដោយបានរកឃើញករណីឆ្លងថ្មីជាង២ ពាន់ករណីក្នុងមួយថ្ងៃ នៅដើមសប្ដាហ៍កន្លងទៅនេះ។ នៅថ្ងៃទី១២ កក្កដា ប្រទេសនេះបានកត់ត្រាឆ្លងថ្មីចំនួន២.៣៨៣ករណី ដែលជាចំនួនឆ្លងខ្ពស់បំផុតក្នុងរយៈពេល៥ថ្ងៃ ជាប់ៗគ្នា។
យ៉ាងណាក៏ដោយ ការអត់ធ្មត់របស់សាធារណជនមានកាន់តែតិចទៅៗចំពោះវិធានការរឹតបន្តឹងជាច្រើនរបស់រដ្ឋាភិបាលបើទោះជាការរឹតបន្តឹងទាំងនោះបានជួយទប់ស្កាត់រលកនៃការផ្ទុះឡើងនៃជំងឺនេះចំនួន ៣ លើករួចមកហើយក្ដី។ បន្ទាប់ពីការបិទខ្ទប់ទីក្រុងហូជីមីញ អស់រយៈពេលជិត ៥០ ថ្ងៃ សូម្បីតែអ្នកដែលធ្លាប់គាំទ្រវិធានការរដ្ឋាភិបាលដោយគ្មានលក្ខខណ្ឌនោះ ក៏ចាប់ផ្ដើមចោទជាសំណួរថាតើ វិធីដែលវៀតណាមកំពុងធ្វើនេះ ពិតជាបានប្រយុទ្ធប្រឆាំងលើការរាតត្បាតសាកលនេះមែនដែរឬទេ។
មនុស្សមួយចំនួនក៏កំពុងឆ្ងល់ថាតើវិធានការប្រយុទ្ធប្រឆាំងទាំងអស់នេះមានភាពចាំបាច់ដែរឬទេ ពីព្រោះថាវៀតណាមមានអត្រាអ្នកស្លាប់ដោយសារជំងឺនេះទាបជាងប្រទេសជាងច្រើនផ្សេងទៀត ព្រមទាំងមានប្រព័ន្ធសុខាភិបាលរឹងមាំផងដែរនោះ។ តួលេខផ្លូវការរបស់រដ្ឋបង្ហាញថា មកទល់ពេលនេះ មានចំនួនអ្នកស្លាប់ពីជំងឺនេះតែ១៣០នាក់ប៉ុណ្ណោះ ក្នុងចំណោមករណីឆ្លងជាង ៣ ម៉ឺនករណី។ បើគិតជាភាគរយ ចំនួនស្លាប់នេះស្មើនឹង០,៤ភាគរយ ប្រើប្រៀបធៀបទៅចំនួនអ្នកស្លាប់នៅសហរដ្ឋអាមេរិកដែលមានចំនួន ១,៨ ភាគរយ។
ការបិទខ្ទប់ដែលបានធ្វើកាលពីកន្លងទៅបានធ្វើឲ្យប៉ះពាល់យ៉ាងខ្លាំងដល់សេដ្ឋកិច្ច។ ការិយាល័យស្ថិតិទូទៅនៃប្រទេសវៀតណាមបានរាយការណ៍នៅក្នុងខែនេះថា ពលរដ្ឋចំនួន១២លាន៨សែននាក់ដែលមានអាយុចាប់ពី១៥ឆ្នាំឡើងទៅទទួលរងនូវផលប៉ះពាល់អវិជ្ជមានពីជំងឺរាតត្បាតសាកលកូវីដ១៩នេះនៅចន្លោះពីខែមេសាដល់មិថុនា ឆ្នាំនេះ។
បុរសម្នាក់ដែលរស់នៅក្នុងតំបន់ត្រូវបិទខ្ទប់មួយកន្លែងក្នុងក្រុងហូជីមិញ ទទួលបានអាហារតាមចន្លោះរបាំងបិទខ្ទប់កាលពីថ្ងៃទី២០ ខែកក្កដា ឆ្នាំ២០២១។
ក្នុងចំណោមពលរដ្ឋទាំងនោះ មាន៥៥៧.០០០នាក់បានបាត់បង់ការងារ៤លាន១សែននាក់ផ្អាកអាជីវកម្មរបស់ខ្លួនបណ្ដោះអាសន្ន ៤លាន៣សែននាក់ត្រូវបានកាត់បន្ថយម៉ោងធ្វើការ ឬត្រូវបានឲ្យប្រើប្រាស់ថ្ងៃឈប់សម្រាក ឬប្ដូរវេនគ្នាធ្វើការ ហើយកម្មករចំនួន៨លាន៥សែននាក់ត្រូវបានកាត់បន្ថយប្រាក់ចំណូល។
ផលប៉ះពាល់ទាំងនេះធ្វើឲ្យថ្នាក់ដឹកនាំនៅទីក្រុងហាណូយផ្ដោតក្ដីសង្ឃឹមទៅលើយុទ្ធនាការចាក់វ៉ាក់សាំងឲ្យពលរដ្ឋជាង៧០ ភាគរយនៅត្រឹមចុងខែមីនាឆ្នាំ ២០២២។ យោងតាមរដ្ឋមន្ត្រីសុខាភិបាលលោក Nguyen Thanh Long យុទ្ធនាការនេះចាប់ផ្ដើមនៅក្នុងខែនេះដោយរដ្ឋាភិបាលមានវ៉ាក់សាំងប្រហែល៨លាន៧សែនដូសសម្រាប់ចាក់ឲ្យពលរដ្ឋនៅតាមមណ្ឌលចាក់វ៉ាក់សាំងចំនួន១ម៉ឺន ៨ពាន់កន្លែង។
នេះគឺជាយុទ្ធនាការដ៏មានមហិច្ឆតាមួយដែលតម្រូវឲ្យវៀតណាមត្រូវមានវ៉ាក់សាំងប្រមាណជា ១៥០ លានដូសសម្រាប់រយៈពេល៩ខែបន្ទាប់ទៀតនេះ។ មកទល់នឹងពេលនេះវៀតណាមបានប្រើប្រាស់វ៉ាក់សាំងមិនលើសពី៤លានដូសទេចាប់តាំងពីបានទទួលកញ្ចប់វ៉ាក់សាំងលើកទីមួយកាលពីខែមេសា តាមរយៈយន្តការ COVAX ដែលជាយន្តការគាំទ្រដោយអង្គការសហប្រជាជាតិដើម្បីចែកចាយវ៉ាក់សាំងដល់បណ្តាប្រទេសដែលមានការអភិវឌ្ឍតិចតួច។
ក្រសួងសុខាភិបាលបានឲ្យដឹងថា គិតចាប់ពីខែកុម្ភៈមកខ្លួនបានទទួលវ៉ាក់សាំងសរុបចំនួន ៩ លានដូសដែលក្នុងនោះរួមមានវ៉ាក់សាំងផលិតដោយក្រុមហ៊ុនឱសថសហរដ្ឋអាមេរិករុស្ស៊ី ចិន និងចក្រភពអង់គ្លេស។
កិច្ចប្រឹងប្រែងនេះទទួលបានការគាំទ្រ ដោយកាលពីថ្ងៃទី១០ ខែកក្កដា វៀតណាមបានទទួលវ៉ាក់សាំងModernaផលិតនៅសហរដ្ឋអាមេរិកចំនួន២ លានដូស តាមរយៈយន្តការ COVAX។ វ៉ាក់សាំងដែលវៀតណាមបានទទួលនេះគឺជាផ្នែកមួយនៃវ៉ាក់សាំងចំនួន ៨០ លានដូស ដែលប្រធានាធិបតីសហរដ្ឋអាមេរិក លោក Joe Biden បានប្រកាសចែកចាយទៅដល់ប្រទេសនានានៅលើសាកលលោក។
ក្រសួងការបរទេសវៀតណាមបានប្រកាសកាលពីពាក់កណ្ដាលខែកក្កដានេះថា ក្រសួងកំពុងពិភាក្សាជាមួយប្រទេសរុស្ស៊ី និងឥណ្ឌា ដើម្បីបញ្ជាទិញវ៉ាក់សាំងSputnik ចំនួន ៤០លានដូស និងវ៉ាក់សាំង Covaxin ចំនួន ១៥ លានដូស។ ក្រសួងបញ្ជាក់ថា វ៉ាក់សាំងទាំងនេះនឹងជួយឲ្យសម្រេចបាននូវការប្ដេជ្ញារបស់រដ្ឋាភិបាលក្នុងស្វះស្វែងរកវ៉ាក់សាំងឲ្យបានសរុបចំនួន ១២០ លានដូស។
ថ្នាក់ដឹកនាំប្រទេសវៀតណាម ក៏កំពុងផ្ដោតលើការផលិតវ៉ាក់សាំងដោយខ្លួនឯងផងដែរ។ វ៉ាក់សាំង Nanocovax របស់ក្រុមហ៊ុន Nanogen ដែលទទួលបានការគាំទ្រពីនាយករដ្ឋមន្ត្រីវៀតណាមលោក Phạm Minh Chính ជិតបញ្ចប់ការធ្វើតេស្តសាកល្បងនានាហើយរំពឹងថានឹងរួចរាល់សម្រាប់ការប្រើប្រាស់នៅដើមខែសីហាខាងមុខនេះ។
អ្វីដែលជាការគិតគូរដ៏សំខាន់មួយទៀតនោះគឺថា ការប៉ុនប៉ងរបស់រដ្ឋាភិបាលក្នុងការបញ្ចៀសនូវអ្វីដែលគេហៅថា «វ៉ាក់សាំងការទូត» របស់ចិន។ ប្រទេសចិនបានរងការចោទប្រកាន់ថា បានប្រើប្រាស់ការផ្ដល់វ៉ាក់សាំងដ៏ច្រើនដើម្បីដាក់សម្ពាធលើប្រទេសនានានៅតំបន់អាស៊ីអាគ្នេយ៍ ជាថ្នូរដើម្បីទទួលបានការគាំទ្រគោលនយោបាយនានាលើបញ្ហាសន្តិសុខ។
ក្ដីបារម្ភមួយទៀតនោះគឺ ពលរដ្ឋខ្លះនឹងបដិសេធវ៉ាក់សាំងមួយចំនួនដោយរំពឹងថា ខ្លួននឹងត្រូវបានចាក់តែវ៉ាក់សាំងណាដែលគេចាត់ទុកថាមានប្រសិទ្ធភាពប្រឆាំងនឹងមេរោគប៉ុណ្ណោះ។ លើសពីនេះទៀត ក៏មានការបង្ហោះសារតាមបណ្ដាញសង្គមជាច្រើនដែលសារទាំងនោះក៏មានទាំងការរិះគន់ទៅលើអ្នកដែលចង់ជ្រើសរើសវ៉ាក់សាំងផងដែរ៕
ប្រែសម្រួលដោយ នៀម ឆេង