នៅថ្ងៃអង្គារនេះ សមាជិកសភាវៀតណាមបានអនុម័តច្បាប់សន្តិសុខអ៊ីនធឺណិតថ្មីមួយ ដែលសកម្មជនសិទ្ធិមនុស្សនានានិយាយថា នឹងរារាំងដល់សេរីភាពនៃការបញ្ចេញមតិ។
ច្បាប់នេះនឹងតម្រូវឲ្យក្រុមហ៊ុនដែលផ្ដល់វេទិកាស្វែងរកព័ត៌មាននានាតាមអ៊ីនធឺណិតបានដូចជាក្រុមហ៊ុន Google និងក្រុមហ៊ុន Facebook ជាដើម លុបចោលនូវអត្ថបទណាដែលអាជ្ញាធរវៀតណាមចាត់ទុកថាមានលក្ខណៈវាយប្រហារនៅក្នុងរយៈពេល ២៤ ម៉ោង និងផ្ទុកទិន្នន័យផ្ទាល់ខ្លួនរបស់អ្នកប្រើប្រាស់អ៊ីនធឺណិតនៅក្នុងប្រព័ន្ធមេកុំព្យូទ័រនៅក្នុងប្រទេសវៀតណាម និងបើកការិយាល័យរបស់ខ្លួននៅក្នុងប្រទេសវៀតណាម។
លោក Clare Agar ប្រធានផ្នែកប្រតិបត្តិការសាកលលោកនៃអង្គការ Amnesty International បានចេញសេចក្ដីប្រកាសមួយប្រឆាំងនឹងការអនុម័តច្បាប់នេះ។
លោក Agar បាននិយាយថា «ដែនអ៊ីនធឺណិតគឺជាជម្រកពាក់ព័ន្ធមួយ» នៅក្នុង «បរិយាកាសជិះជាន់ព្រៃផ្សៃរបស់ប្រទេសវៀតណាម» ដែលមនុស្សទូទៅអាចចូលទៅចែករំលែកទស្សនៈរបស់ខ្លួនបាន «ដោយមិនសូវមានការភ័យខ្លាចថាមានការរារាំងពីអាជ្ញាធរ»។
លោកបានបន្ថែមថា ឥឡូវនេះ ច្បាប់ថ្មីនេះមានន័យថា«គ្មានកន្លែងសុវត្ថិភាពណាមួយដែលនៅសេសសល់នោះទេ»។
កន្លងមក សហរដ្ឋអាមេរិក និងប្រទេសកាណាដាបានជំរុញឲ្យប្រទេសវៀតណាមពន្យារពេលអនុម័តច្បាប់នេះ ដោយលើកឡើងពីការព្រួយបារម្ភថា ច្បាប់នេះអាចបង្កជា «ឧបសគ្គចំពោះសន្តិសុខអ៊ីនធឺណិត និងអនាគតច្នៃប្រឌិតថ្មីបែបឌីជីថលរបស់ប្រទេសវៀតណាម»។
សមាគមទំនាក់ទំនងឌីជីថលវៀតណាមបានបញ្ជាក់ថា ច្បាប់នេះអាចកាត់បន្ថយផលិតផលក្នុងប្រទេសសរុប GDP ចំនួន ១,៧ ភាគរយ និងធ្វើឲ្យវិនិយោគបរទេសបាត់បង់ចំនួន ៣,១ ភាគរយ៕