សហរដ្ឋអាមេរិក នៅថ្ងៃសុក្រនេះ បានសម្តែងការសាទរចំពោះការផ្តល់កម្ចីចំនួន ២៥០ លានដុល្លារអាមេរិករបស់ធនាគារអភិវឌ្ឍន៍អាស៊ី (Asian Development Bank) ហៅកាត់ថា ADB ដល់ប្រទេសកម្ពុជា ក្នុងគ្រាដែលប្រទេសនេះកំពុងត្រូវការដោះស្រាយផលប៉ះពាល់សេដ្ឋកិច្ច និងសង្គម ដែលបណ្តាលមកពីការឆ្លងរាលដាលជាសាកលនៃជំងឺកូវីដ១៩។
ការសាទររបស់សហរដ្ឋអាមេរិក ដែលជាសមាជិកស្ថាបនិកមួយនៃធនាគារ ADB នេះ ធ្វើឡើងតាមទំព័រហ្វេសប៊ុករបស់ស្ថានទូតអាមេរិកប្រចាំកម្ពុជា ពីរថ្ងៃក្រោយពីធនាគារនេះបានសម្រេចផ្តល់ប្រាក់កម្ចីនេះដល់កម្ពុជា ដើម្បីឆ្លើយតបទៅនឹងជំងឺកូវីដ១៩ តាមរយៈការគាំទ្រប្រព័ន្ធសុខាភិបាល និងកម្មវិធីជំនួយសង្គមរបស់រដ្ឋាភិបាល សម្រាប់ពលរដ្ឋក្រីក្រ និងក្រុមជនងាយរងគ្រោះ ព្រមទាំងការគាំទ្រអាជីវកម្មខ្នាតតូចនិងមធ្យម។
ធនាគារអភិវឌ្ឍន៍អាស៊ី បានព្យាករណ៍ថា សេដ្ឋកិច្ចកម្ពុជាអាចធ្លាក់ចុះក្នុងរង្វង់ -៥,៥% ក្នុងឆ្នាំ ២០២០ នេះ ដោយសារតែការថយចុះនៃសកម្មភាពក្នុងវិស័យទេសចរណ៍ សំណង់ និងការនាំចេញសម្លៀកបំពាក់ ស្បែកជើង និងសម្ភារៈធ្វើដំណើរ។ ការធ្លាក់ចុះនេះអាចនឹងនាំឲ្យប្រជាពលរដ្ឋកម្ពុជាប្រមាណ ១,៣ លាននាក់ទៀត ធ្លាក់ក្នុងភាពក្រីក្រ។
កាលពីខែមិថុនា រដ្ឋាភិបាលកម្ពុជាបានប្រកាសផ្តល់ជំនួយជាសាច់ប្រាក់ដល់គ្រួសារក្រីក្រ និងងាយរងគ្រោះចំនួនជាង ៥៦ ម៉ឺនគ្រួសារ ឬស្មើនឹងជាង ២ លាន ៣ សែននាក់ ក្នុងគ្រាវិបត្តិកូវីដ១៩នេះ ហើយថា ចំនួនអ្នកក្រីក្រនេះអាចនឹងកើនឡើងថែមទៀត ដោយរដ្ឋត្រូវចំណាយថវិកា ២៥ លានដុល្លារក្នុងមួយខែ សម្រាប់ពួកគេ។
ធនាគារអភិវឌ្ឍន៍អាស៊ីមានសមាជិកចំនួន ៦៨ ប្រទេស ក្នុងនោះ ៤៩ ជាប្រទេសនៅក្នុងតំបន់អាស៊ីប៉ាស៊ីហ្វិក រួមទាំងកម្ពុជាផងដែរ៕