ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នកជំនាញ៖​ ជំនួយ​អាមេរិក​ដល់​ពិភពលោក​ប្រឆាំង​នឹង​កូវីដ១៩​ ជា​កិច្ចការ​មនុស្សធម៌​និងការពង្រឹង​ឥទ្ធិពល


រូបឯកសារ៖ សម្ភារៈពេទ្យរបស់ទីភ្នាក់ងារ USAID ប្រចាំប្រទេស Dubai ត្រូវបានដឹកជញ្ជូនមកកាន់មូលដ្ឋានយោធានៅរដ្ឋ Oregon សហរដ្ឋអាមេរិក កាលពីថ្ងៃទី១០ ខែមេសា ឆ្នាំ២០២០។ (រូបថតដោយ៖ Sgt. 1st Class Zachary Holden/US Department of Defense/AFP)

រដ្ឋាភិបាល​សហរដ្ឋ​អាមេរិក​របស់​លោក​ប្រធានាធិបតី​ ដូណាល់ ត្រាំ​ បាន​នាំមុខ​គេ​ក្នុងការ​ប្រយុទ្ធ​ប្រឆាំង​នឹង​ជំងឺកូវីដ១៩ ​ឬ​វីរុស​កូរ៉ូណាថ្មី​ ហើយ​ផ្តល់​ជំនួយ​មនុស្សធម៌​ដល់​ប្រទេស​ជាច្រើន​ក្នុង​ពិភព​លោក​ រួមទាំង​ក្នុង​តំបន់​អាស៊ី​អាគ្នេយ៍​ផង​ ទោះ​ជា​សហរដ្ឋ​អាមេរិក​ខ្លួនឯង​កំពុង​ប្រឈម​មុខ​នឹង​ជំងឺ​កូវីដ​១៩​យ៉ាង​ធ្ងន់ធ្ងរ​ក្តី។​

ការ​ផ្តល់​ជំនួយ​ទៅ​កាន់​តំបន់​អាស៊ីអាគ្នេយ៍​ រួមទាំង​កម្ពុជា​និង​បណ្តា​ប្រទេស​ច្រើន​ទៀត​នេះ​ ត្រូវ​ក្រុម​អ្នក​ឃ្លាំមើល​ស្ថានការណ៍​ក្នុង​តំបន់​ខ្លះ​យល់​ថា​ មិនមែន​ត្រឹមតែ​ជា​ការផ្តល់​ជំនួយ​មនុស្សធម៌​ប៉ុណ្ណោះ​ទេ​ តែ​ជា​ការ​ពង្រឹង​អំណាច ​និង​ផល​ប្រយោជន៍​របស់​អាមេរិក​ផងដែរ​ ក្នុងពេល​ដែល​មហា​អំណាច​ផ្សេងៗ​ដូច​ចិន​ កំពុង​ពង្រីក​ឥទ្ធិពល​យ៉ាង​លឿនក្នុង​តំបន់។

លោក ​គុជ ច័ន្ទលី​ អ្នកវិភាគ​មួយ​រូប​ក្នុង​រដ្ឋម៉ារីលែន ​បាន​ថ្លែងថា ​សហរដ្ឋ​អាមេរិក​ពេលនេះ​ត្រូវ​ការពារ​ខ្លួនឯង​ពី​វីរុស​កូរ៉ូណា​ផង​ និង​ការពារ​ឋានៈ​ជា​មហា​អំណាច​របស់​ខ្លួន​ផង។

«ក៏ប៉ុន្តែ​ទន្ទឹមគ្នា​នេះ​ សហរដ្ឋ​អាមេរិក​ក៏សម្តែង​ការ​យក​ចិត្ត​ទុកដាក់​ទៅលើ​ប្រទេស​តូចតាច ​ដែលជា​បក្ខ​សម្ព័ន្ធ​ក្តី​ មិនមែន​ជា​បក្ខសម្ព័ន្ធ​ក្តី​ នៅ​តំបន់​អាស៊ីអាគ្នេយ៍​ នៅ​អាហ្វ្រិក​ អាមេរិក​ឡាទីន​មួយ​ចំនួន​ដែល​សហរដ្ឋ​អាមេរិក​យល់​ឃើញថា​ ជា​ទីផ្សារ​សេដ្ឋកិច្ច​ផង ​ជា​ទីធ្លា​ការពារ​ទឹកដី នយោ​បាយ​ភូមិសាស្ត្រ​របស់​សហរដ្ឋ​អាមេរិក​ផង»។

លោក​បន្ថែម​ថា៖ «ទោះបី​ជា​សហរដ្ឋ​អាមេរិក​ខ្លួនឯង​កំពុង​ទទួល​ភាពដុនដាប​ខ្លាំង​ជាងគេ​ គួរ​ឲ្យ​ភ័យ​ក្នុង​ពិភពលោក​ ដោយសារ​តែ​វីរុស​កូរ៉ូណា​នេះក្តី​ ក៏​សហរដ្ឋ​អាមេរិក​មិនអាច​លះបង់​ឥទ្ធិពល​របស់​ខ្លួន​នៅ​ក្នុង​ពិភពលោក​បាន​ទេ»។

លោក​បញ្ជាក់​ទៀត​ថា ​ប្រទេស​មហា​អំណាច​ក្នុង​ពិភពលោក ​ដូចជា​សហរដ្ឋ​អាមេរិក​ ចិន ​រុស្ស៉ី បារាំង ​អង់គ្លេស ​ជប៉ុន​ជាដើម ​ត្រូវការ​ការ​គាំទ្រ​ និង​ការ​ជឿជាក់​ ហើយ​មិន​ចង់ឲ្យ​បាត់បង់អំណាច​របស់​ខ្លួន​ទេ។​ លោក​ថា ​សហរដ្ឋ​អាមេរិក​និង​សម្ព័ន្ធ​មិត្ត​ មាន​ភាព​រង្គោះរង្គើ​ផ្នែក​ទំនាក់​ទំនង​ស្រាប់​ទៅ​ហើយ ​ដែល​នេះ​ជា​បញ្ហា​ ហើយ​ដែល​សហរដ្ឋ​អាមេរិក​ត្រូវ​ពង្រឹង​ទំនាក់​ទំនង​ និង​ត្រូវការ​ការ​គាំទ្រ​ឡើង​វិញ តាម​ជំនួយ​មនុស្សធម៌​នេះ។

រូបឯកសារ៖ លោក Mike Pompeo រដ្ឋមន្ត្រីការបរទេសអាមេរិក ចូលរួមកិច្ចប្រជុំជាមួយប្រទេសជាសមាជិកអាស៊ាន អំពីវិបត្តិកូវីដ១៩ តាមរយៈប្រព័ន្ធអ៊ីនធឺណិត កាលពីថ្ងៃទី២៣ ខែមេសា ឆ្នាំ២០២០។
រូបឯកសារ៖ លោក Mike Pompeo រដ្ឋមន្ត្រីការបរទេសអាមេរិក ចូលរួមកិច្ចប្រជុំជាមួយប្រទេសជាសមាជិកអាស៊ាន អំពីវិបត្តិកូវីដ១៩ តាមរយៈប្រព័ន្ធអ៊ីនធឺណិត កាលពីថ្ងៃទី២៣ ខែមេសា ឆ្នាំ២០២០។


លោកបណ្ឌិត អៀ សុផល សាស្ត្រាចារ្យផ្នែកការទូតនិងកិច្ចការអន្តរជាតិនៃសាកលវិទ្យាល័យ Occidental College ក្រុងឡូសអែនជឺឡេស រដ្ឋកាលីហ្វ័ញ៉ា សហរដ្ឋអាមេរិក អះអាងថា សហរដ្ឋអាមេរិកផ្តោតលើតំបន់អាស៊ីអាគ្នេយ៍ដែលចិនពង្រីកឥទ្ធិពលនោះ គឺដោយសារថា នេះជាល្បែងដ៏ធំមួយក្នុងតំបន់។

«ចិន​កំពុង​ព្យាយាម​តស៊ូ​ប្រជែង​យក​តំបន់​អាស៊ីអាគ្នេយ៍​ជា​របស់​ខ្លួន​ យក​ឈូង​សមុទ្រ​ម៉ាឡាកា​ដោយ​សារ​ថា​ ប្រេង​នាំចូល​ទាំងអស់​មក​តាម​ច្រក​នេះ»។

ក្រៅពីធៀប​ជំនួយ​មនុស្សធម៌​ថា​ជា​ផ្ទាំង​ទឹកកក​បិទ​បាំង​នំខេក​នោះ​ លោក​ សុផល​ បាន​អះអាង​ថា​សហរដ្ឋ​អាមេរិក​ក៏​មាន​ផល​ប្រយោជន៍​របស់​ខ្លួន​ដែរ។

«សហរដ្ឋ​អាមេរិក​ចង់​ធានា​ឲ្យ​ប្រាកដថា​ វៀតណាម ​ដែនដី​តៃវ៉ាន់​ ជប៉ុន ​និង​ប្រទេស​ផ្សេង​ទៀត​ដែលមិន​ពេញចិត្ត​ជាមួយ​ចិន​ ដោយសារ​តែជំងឺ​កូវីដ១៩ ​គឺជា​សម្ព័ន្ធមិត្ត​របស់​ខ្លួន​ដែរ»។

លោកថា​ ប្រទេស​ចិន​បាន​ប្រើប្រាស់​ការទូត​តាមរយ:​ម៉ាស់​បិទមុខ ​ព្យាយាម​បញ្ចុះ​បញ្ចូល​ប្រទេស​នានា​ឲ្យងាក​មក​ខាង​ខ្លួន​ តែ​ប្រទេស​ជាច្រើន​នៅ​អាហ្វ្រិក​ និង​ប្រទេស​ប្រេស៊ីល​មិន​សប្បាយ​ចិត្ត​នឹង​ចិន​ដែរ។​ លោក​បណ្ឌិត ​អៀ សុផល ​បាន​ថ្លែងថា​ ជំងឺ​កូវីដ១៩​ក៏បាន​ធ្វើ​ឲ្យ​ប្រទេស​ក្នុង​តំបន់​ រួមទាំង​កម្ពុជា​ ប្រឈមនឹង​បញ្ហា​សេដ្ឋកិច្ច​បណ្តាល​ពី​ជំងឺ​កូវីដ១៩​ផងដែរ។

«តំបន់​អាស៊ី​ខាងកើត​ និង​ប៉ាស៊ីហ្វិក​ អាច​ឃើញ​ថា មាន​មនុស្ស​ ២៤០​ លាន​នាក់​ធ្លាក់ក្នុង​ភាព​ក្រីក្រ ហើយ​ផ្នែក​តំបន់​អាស៊ីអាគ្នេយ៍​វិញ​ គឺអាច​នឹងមាន​មនុស្ស​ជាង​ ១០០​លាននាក់។ ​មានមនុស្ស​ ២០ ភាគរយ ​ធ្លាក់​ចុះ​ចំណូល​របស់គេ។ ​ក្នុង​ប្រទេស​កម្ពុជា​វិញ ​មាន​ពលករ​ច្រើន​សែន​នាក់​មក​ពីរោង​ចក្រ​កាត់ដេរ ​បាត់​ចំណូល​ដោយសារ​ការ​ឈប់​បញ្ជាទិញ​ពីអ្នកទិញ។​ ខ្ញុំគិត​ថា​ ស្ថានភាព​ក្នុង​តំបន់​អាស៊ីអាគ្នេយ៍​ គឺជា​មហន្តរាយ​ដោយសារ​តែជំងឺកូវីដ១៩​នេះ »។

លោក​បណ្ឌិត​ ឈាង វណ្ណារិទ្ធ​ ប្រធាន​វិទ្យាស្ថាន​ចក្ខុវិស័យ​អាស៊ី ​បាន​ថ្លែងថា​ ប្រទេស​កម្ពុជា​និងតំបន់​អាច​បន្ធូរ​បន្ថយ​បញ្ហា​សេដ្ឋកិច្ច​ តាមរយ:​ការ​បង្កើត​ឲ្យ​មានកញ្ចប់​ថវិកា​រួមមួយ​ ដើម្បី​ឆ្លើយតប​នឹង​វីរុស​កូរ៉ូណា ​ទន្ទឹមគ្នា​ដែល​តំបន់​អាស៊ាន​មាន​ការ​តាំងចិត្ត​ខ្ពស់​រួមគ្នា​ ក្នុងការ​ទប់ស្កាត់​កូវីដ១៩​នេះ​។ ម្យ៉ាង​ទៀត​ លោក​ថា​ ដំណើរការ​ពាណិជ្ជកម្ម ​ការ​ធានា​សន្តិសុខ​ស្បៀង​ និង​ការងារ​លើ​វិស័យ​សំខាន់ៗ​មួយ​ចំនួន​ មិនគួរ​មានភាព​រអាក់រអួល​ដើម្បី​សម្រួល​ដល់​ចរន្ត​សេដ្ឋកិច្ច​។

«​ខ្ញុំចង់​តែ​សង្កត់​ធ្ងន់ថា​ ត្រូវ​ត្រៀមខ្លួន​ក្នុង​រយ:ពេល​វែង​ ដើម្បី​ដោះស្រាយ​នូវ​ផលវិបាក​ទាំង​ឡាយ​ចេញពី​វិបត្តិ​កូវីដ​១៩​ហ្នឹង​ ជាពិសេស​សេដ្ឋកិច្ច​ធ្វើ​យ៉ាងណា​ កុំឲ្យ​វាធ្លាក់​ចុះខ្សោយ​ខ្លាំងពេក​ អីចឹង​ទេ​ធ្វើ​យ៉ាងណា​ឲ្យ​ផលិតកម្ម​នៅតែ​មាន ​ហើយ​ការងារ​សម្រាប់​ប្រជាពលរដ្ឋ​នៅតែ​មាន ​កុំឲ្យ​ប៉ះពាល់​ខ្លាំង​ពេក។ ​ទី២​ ត្រូវតែ​ប្រយ័ត្ន​ជានិច្ច​ ហើយ​ជាពិសេស​រក្សា​នៅអនាម័យ​ ហើយ​នឹង​គម្លាត​សង្គម​ហ្នឹង»។

សហរដ្ឋ​អាមេរិក ​បាន​ត្រៀម​ថវិកា​ ៩០០​ លាន​ដុល្លារ​ ដល់​បណ្តា​ប្រទេស​នានា​ក្នុង​ពិភពលោក ​ក្នុង​ពេល​សហរដ្ឋ​អាមេរិក​នាំមុខ​ប្រយុទ្ធ​ប្រឆាំង​នឹងជំងឺ​កូវីដ១៩ ​នៅទូទាំង​ពិភពលោក​ និង​ក្នុងប្រទេស​ខ្លួន​ផងនោះ។ ​នេះបើ​តាម​សេចក្តី​ប្រកាស​ព័ត៌មាន​របស់​ទីភ្នាក់ងារ​ផ្តល់​ជំនួយ​អន្តរជាតិ​សហរដ្ឋ​អាមរិក​ (USAID) ​និង​ ក្រសួង​ការ​បរទេស​សហរដ្ឋ​អាមេរិក​ ក្នុង​សេចក្តីប្រកាស​រួម​មួយ​ ដែល​ផ្សព្វ​ផ្សាយ​នៅលើ​គេហទំព័រ​នៃ​ទីភ្នាក់ងារ​នេះ។​

សហរដ្ឋអាមេរិក បានសម្រេចផ្តល់ជំនួយដល់ប្រទេសជាសមាជិកអាស៊ានក្នុងទឹកប្រាក់ចំនួនយ៉ាងតិច ៣៥ លានដុល្លារ ដើម្បីប្រយុទ្ធប្រឆាំងនឹងជំងឺកូវីដ១៩ ហើយប្រទេសកម្ពុជាដែលជាសមាជិកមួយនៃអាស៊ានទាំង ១០ ប្រទេស ក៏ស្ថិតក្នុងចំណោមប្រទេសដែលបានទទួលជំនួយនេះផងដែរ។

រូបឯកសារ៖ លោក Mike Pompeo រដ្ឋមន្ត្រីការបរទេសអាមេរិក ថ្លែងនៅក្នុងសន្និសីទសារព័ត៌មានមួយ នៅក្រសួងការបរទេសអាមេរិក ក្នុងរដ្ឋធានីវ៉ាស៊ីនតោន កាលពីថ្ងៃទី២៩ ខែមេសា ឆ្នាំ២០២០។
រូបឯកសារ៖ លោក Mike Pompeo រដ្ឋមន្ត្រីការបរទេសអាមេរិក ថ្លែងនៅក្នុងសន្និសីទសារព័ត៌មានមួយ នៅក្រសួងការបរទេសអាមេរិក ក្នុងរដ្ឋធានីវ៉ាស៊ីនតោន កាលពីថ្ងៃទី២៩ ខែមេសា ឆ្នាំ២០២០។

ប្រទេស​អាស៊ាន ​និង​សហរដ្ឋ​អាមេរិក​ក្នុង​កិច្ចប្រជុំ​ថ្នាក់​រដ្ឋមន្ត្រី​ការបរទេស​អាមេរិក​ អាស៊ាន ​កាល​ពីថ្ងៃ​ទី​២២ ​ខែមេសា ​បាន​ប្រកាស​រួមគ្នា​អំពី​ការ​ប្រយុទ្ធ​ប្រឆាំងនឹង​វីរុស​កូរ៉ូណា ​គាំទ្រ​និង​ស្តារ​សេដ្ឋកិច្ច​ឡើង​វិញ ​ក្នុងភាព​ជាដៃ​គូ​យុទ្ធសាស្ត្រ។

លោក​រដ្ឋមន្ត្រី​ការបរទេស​អាមេរិក​ Mike Pompeo ​បាន​បញ្ជាក់​ក្នុង​សេចក្តី​ថ្លែងការណ៍​របស់លោក​ចំពោះ​រដ្ឋមន្ត្រី​ការបរទេស​អាស៊ាន​ទាំង ១០ ​ប្រទេស​ ដោយ​ជំហរ​ច្បាស់លាស់​របស់​សហរដ្ឋអាមរិក។ ​លោក​បាន​ថ្លែង​តាម​ខ្លឹមសារ​ដើមថា៖

«សហរដ្ឋ​អាមេរិក​បន្ត​ផ្តល់​ការ​គាំទ្រ​ជំនួយ​មនុស្សធម៌​ដល់​ប្រទេស​អាស៊ាន​ ដើម្បី​ជួយដល់​ប្រទេស​ទាំង​នោះ​ក្នុងការ​ឆ្លើយតប​នឹង​ការ​រាតត្បាត​ជំងឺ​កូវីដ១៩។ ​យើង​សូម​ជំរុញ​ដល់​ប្រទេសទាំងអស់​ឲ្យ​ទទួល​យក​ការចែក​រំលែក​ព័ត៌មាន​ដោយ​តម្លាភាព។​ តម្លាភាព ​សង្គ្រោះ​ជីវិត ​ហើយ​ការ​សង្កត់​សង្កិន​ ធ្វើឲ្យ​ពលរដ្ឋ​រងគ្រោះ»។

សហរដ្ឋ​អាមេរិក​ នៅ​សប្តាហ៍​នេះ បាន​ប្រកាស​ផ្តល់​ជំនួយ​បន្ថែម​ទៀត​ដល់​ប្រទេស​កម្ពុជា ​ដើម្បី​ជួយ​ស្រោច​ស្រង់​សេដ្ឋកិច្ច​កម្ពុជា​ ក្រោយ​វិបត្តិ​កូវីដ១៩​ ហើយ​បាន​បញ្ជាក់​បន្ថែម​ថា មក​ដល់​ពេលនេះ​សហរដ្ឋ​អាមរិក​ផ្តល់​ជំនួយ​ចំនួន​ ៣ លាន​ ៥ សែន​ ដុល្លារ​ហើយ​ដល់​កម្ពុជា​ ដើម្បី​ទប់ស្កាត់ការ​រីករាល​ដាល​ជំងឺ​កូវីដ១៩។ ​នេះ​បើ​យោង​តាម​សេចក្តី​ប្រកាស​ព័ត៌មាន​មួយ​របស់​ស្ថានទូត​អាមេរិក​ប្រចាំ​កម្ពុជា ​ដែល​បាន​ផ្សព្វផ្សាយ​នៅ​ថ្ងៃ​អង្គារ​ ទី​១៩ ​ខែ​ឧសភា​នេះ។

សេចក្តី​ប្រកាស​ព័ត៌មាន​នេះ​បញ្ជាក់​ថា​ ឯកអគ្គរដ្ឋ​ទូត​អាមេរិកប្រចាំកម្ពុជា ​លោក​ Patrick Murphy និង​រដ្ឋមន្ត្រី​ក្រសួង​សេដ្ឋកិច្ចនិង​ហិរញ្ញ​វត្ថុ​លោក​ អូន ព័ន្ធមុនីរ័ត្ន ត្រូវ​ប្រកាស​ជំនួយ​ឥត​សំណង​របស់​សហរដ្ឋ​អាមេរិក​ដល់​កម្ពុជា​នេះ​ នៅ​ថ្ងៃ​ព្រហស្បតិ៍​ ទី​២១ ​ខែ​ឧសភា​ ឆ្នាំ​២០២០ នៅ​ក្រសួង​សេដ្ឋកិច្ចនិង​ហិរញ្ញ​វត្ថុ​កម្ពុជា។

ជំងឺ​កូវីដ១៩​ ដែល​បាន​ផ្ទុះឡើង​ដំបូង​នៅក្នុង​ទីក្រុង​វូហាន​ ប្រទេស​ចិន ​បាន​ឆ្លង​រាតត្បាត​ពាស​ពេញ​ពិភព​លោក​ និងបង្ក​ឲ្យមាន​ការ​ជាប់​គាំង​សេដ្ឋកិច្ច​ដ៏ធ្ងន់ធ្ងរ​ ពាសពេញ​ពិភពលោក​ផងដែរ។ ​ជំងឺ​នេះ​បាន​សម្លាប់​មនុស្ស ​ប្រមាណ​ ៣០ ម៉ឺន​នាក់​ និង​ឆ្លងដល់​មនុស្ស​ជាង​ ៤ លាន ​៦ សែននាក់​ ក្នុង​ពិភព​លោក។​

ដោយ​ឡែក​ សហរដ្ឋ​អាមេរិក​នាំមុខ​សហភាព​អឺរ៉ុប ​ដោយ​បាន​ក្លាយ​ជាប្រទេស​ឆ្លង​ច្រើន​ជាង​គេ​រហូត​ដល់​ទៅ​ជាង​ ១ លាន ​៥ សែន​នាក់ ​និង​សម្លាប់​មនុស្ស​ដល់​ទៅជាង​ ៩ ម៉ឺននាក់​ គិតត្រឹម​រសៀល​ថ្ងៃអង្គារ។ តំបន់​អាស៊ាន​ទាំងមូល​ដែល​មាន ​១០ ​ប្រទេស ​មាន​ករណី​ឆ្លង​ត្រឹម​តែ​ជិត​ ៣ ម៉ឺននាក់ ​ស្លាប់​ជាង​ ១១០០ នាក់​តែ​ប៉ុណ្ណោះ។​ ក្នុងនោះ​កម្ពុជា ​ឡាវ ​និង វៀតណាម​ ដែល​ជាប្រទេស​ជិតខាង​នឹងគ្នា​ គ្មាន​សេចក្តី​រាយ​ការណ៍​ពី​ចំនួន​មនុស្ស​ស្លាប់ ​ហើយ​ករណី​ឆ្លងមានចំនួនត្រឹម​តែ​ជាង​ ១០០ ​នាក់​ ​ទៅដល់​ជាង​ ២០០​ នាក់​ប៉ុណ្ណោះ៕

តួលេខនៃករណីឆ្លងជំងឺកូវីដ១៩

XS
SM
MD
LG