រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានស្ថិតនៅក្នុងប្រទេសបារ៉ែនដើម្បីធ្វើការពិភាក្សានៅថ្ងៃពុធនេះមុនពេលធ្វើដំណើរទៅកាន់ប្រទេសអេមីរ៉េតអារ៉ាប់រួម។
គម្រោងរបស់លោករដ្ឋមន្ត្រីការបរទេស Pompeo នៅក្នុងរាជធានីម៉ាណាម៉ា រួមមានជំនួបជាមួយព្រះអង្គម្ចាស់រជ្ជទាយាទ Salman bin Hamad Al Khalifa និងព្រះមហា ក្សត្រ Hamad Al Khalifa នៃប្រទេសបារ៉ែន។
ក្រសួងការបរទេសសហរដ្ឋអាមេរិកបានប្រាប់ឲ្យដឹងថា នៅក្នុងរាជធានីអាប៊ូដាប៊ី ប្រទេសអេមីរ៉េតអារ៉ាប់រួម លោក Pompeo នឹងពិភាក្សាអំពីកិច្ចព្រមព្រៀងរវាងអេមីរ៉េតអារ៉ាប់រួមនិងអ៊ីស្រាអែលដែលបានចុះហត្ថលេខានៅដើមខែនេះក្នុងគោលបំណងធ្វើឲ្យមានទំនាក់ទំនងជាប្រក្រតីភាពឡើងវិញរវាងប្រទេសទាំង ២ នៅពេលដែលលោកជួបជាមួយព្រះអង្គម្ចាស់ Sheik Abdullah bin Zayed Al Nahyan រដ្ឋមន្ត្រីការបរទេសនៃប្រទេសអេមីរ៉េតអារ៉ាប់រួម។
លោក Pompeo ធ្វើដំណើរទៅកាន់ប្រទេសជាច្រើននៅសប្តាហ៍នេះ នៅពេលដែលរដ្ឋបាលប្រធានាធិបតីសហរដ្ឋអាមេរិកលោក Donald Trump ជំរុញប្រទេសអារ៉ាប់ផ្សេងទៀតឲ្យធ្វើតាមប្រទេសអេមីរ៉េតអារ៉ាប់រួមនៅក្នុងការធ្វើឲ្យចំណងទាក់ទងមានប្រក្រតីភាពឡើងវិញជាមួយអ៊ីស្រាអែល។
លោក Morgan Ortagus អ្នកនាំពាក្យក្រសួងការបរទេសអាមេរិក បានបញ្ជាក់នៅក្នុងសេចក្តីប្រកាសមួយថា លោក Pompeo បានស្ថិតនៅក្នុងប្រទេសស៊ូដង់កាលពីថ្ងៃអង្គារម្សិលមិញ ដែលនៅទីនោះ លោក Pompeo និងលោកឧត្តមសេនីយ៍ Abdel Fattah el-Burhan ប្រធានក្រុមប្រឹក្សាអធិបតេយ្យភាពស៊ូដង់ បានពិភាក្សាអំពី «ការបន្តរឹតចំណងទំនាក់ទំនងទ្វេភាគីរវាងអ៊ីស្រាអែលនិងស៊ូដង់»៕