សន្និសីទអន្តរជាតិមួយអំពីសន្តិសុខព្រំដែន ដែលនឹងរៀបចំឡើងដោយក្រសួងការបរទេសអាមេរិក ត្រូវបានលុបចោល ដោយសារតែការបិទរដ្ឋាភិបាលមួយផ្នែកពាក់ព័ន្ធនឹងរឿងសន្តិសុខព្រំដែន។
ក្រសួងការបរទេសបានបញ្ជាក់ថា អ្នកជំនាញផ្នែកគ្រប់គ្រងការនាំចេញ និងសន្តិសុខព្រំដែនចំនួន ២៥០ នាក់ មកពីប្រទេសចំនួន ៨៥ ត្រូវគេរំពឹងថា នឹងចូលរួមនៅក្នុងសន្និសីទ ដែលគ្រោងនឹងធ្វើឡើងនៅពាក់កណ្ដាលខែកុម្ភៈខាងមុខនេះនៅរដ្ឋធានី Edinburgh ប្រទេសស្កុតឡែន។
ទូរទស្សន៍ CNN គឺជាទីភ្នាក់ងារព័ត៌មានដំបូងបង្អស់ ដែលបានរាយការណ៍ថា អ្នកស្រី Kathryn Insley ប្រធានការិយាល័យសហប្រតិបត្តិការគ្រប់គ្រងការនាំចេញនៃក្រសួងការបរទេសអាមេរិក បានផ្ញើលិខិតមួយច្បាប់កាលពីថ្ងៃទី ១៦ ខែមករាកន្លងទៅនេះ ទៅឲ្យស្ថានទូតសហរដ្ឋអាមេរិកយ៉ាងតិច ៥៥ នៅទូទាំងពិភពលោក ដោយស្នើឲ្យស្ថានទូតអាមេរិកទាំងនោះបញ្ជាក់ប្រាប់មន្ត្រីរដ្ឋាភិបាលនៃប្រទេសទាំងនោះដឹងថា សន្និសីទនេះត្រូវបានលុបចោល។
លិខិតនោះបានបញ្ជាក់ថា ការសម្រេចនេះត្រូវបានធ្វើឡើង ដោយសារតែ «ភាពស្រពិចស្រពិលពាក់ព័ន្ធនឹងការបិទរដ្ឋាភិបាលអាមេរិកមួយផ្នែកដែលនៅតែបន្ត»។ លិខិតរបស់អ្នកស្រី Insley នេះ បានបន្ថែមថា មន្ត្រីរដ្ឋាភិបាលអាមេរិក «កំពុងធ្វើការកំណត់កាលបរិច្ឆេទថ្មី» ហើយនឹងទាក់ទងជាមួយនឹងអ្នកចូលរួម «ភ្លាមៗនៅពេលដែលរដ្ឋាភិបាលមានដំណើរការឡើងវិញ»។
ការបិទរដ្ឋាភិបាលអាមេរិកមួយផ្នែកបានចូលដល់ថ្ងៃទី ៣៣ ហើយនៅថ្ងៃពុធនេះ ដោយប៉ះពាល់មន្ត្រីរដ្ឋាភិបាលសហព័ន្ធជាង ៨ សែននាក់នៅទូទាំងប្រទេស។
រឿងសន្តិសុខព្រំដែនគឺជាបញ្ហាចម្បងនៃការមើលមុខគ្នាមិនចំរវាងលោកប្រធានាធិបតី Donald Trump និងសមាជិកគណបក្សប្រជាធិបតេយ្យ ដែលធ្វើឲ្យមានការបិទរដ្ឋាភិបាលសហព័ន្ធមួយផ្នែកនេះ៕