កាលពីថ្ងៃអង្គារ ទាហានស.រ.អា.ម្នាក់ត្រូវបានសម្លាប់ ហើយពីរនាក់ទៀតបានត្រូវរបួសនៅក្នុងការប្រយុទ្ធគ្នានៅក្នុងខេត្ត Helmand នៃប្រទេសអាហ្វហ្គានីស្ថាន ដែលនៅទីនោះក្រុមយុទ្ធជនតាលីបង់បានពង្រីកកិច្ចប្រតិបត្តិការកាលពីពេលថ្មីៗនេះ។
មន្ត្រីខាងការពារប្រទេសស.រ.អា.បាននិយាយថា កងឯកភាពនៃកងកម្លាំងពិសេសស.រ.អា.មានទាក់ទិននឹងកិច្ចប្រតិបត្តិការនៅជិតក្រុង Marja ដែលជាកន្លែងមួយមានការប្រយុទ្ធគ្នាយ៉ាងខ្លាំងកាលពីប៉ុន្មានសប្តាហ៍មុននេះ។
មន្ត្រីជាន់ខ្ពស់ម្នាក់ខាងកិច្ចការពារប្រទេសបាននិយាយប្រាប់ VOA កាលពីថ្ងៃអង្គារដោយមានល័ក្ខខណ្ឌមិនឱ្យបញ្ចេញឈ្មោះថា ឧទ្ធម្ភាគចក្រមួយគ្រឿងត្រូវបានបញ្ចូនឱ្យទៅជម្លៀសក្រុមទាហានត្រូវរបួស ក៏ប៉ុន្តែមិនអាចហោះឡើងបានទេ ពីព្រោះកង្ហារវាបានប៉ះជញ្ជាំងកំផែងមួយ។ លោកបាននិយាយបន្ថែមថាឧទ្ធម្ភាគចក្រនេះស្ថិតនៅក្នុងក្រុង Marja នៅឡើយដើម្បីព្យាយាមជម្លៀសក្រុមអ្នកត្រូវរបួស។
មន្ត្រីម្នាក់ទៀតគឺលោកវរសេនីយ៍ឯក Michael Lawhorn បាននិយាយប្រាប់ VOA ថា ឧទ្ធម្ភាគចក្រនេះ «មិនបានត្រូវបាញ់ធ្លាក់ទេ។»
បើតាមមន្ត្រីជាន់ខ្ពស់ម្នាក់ផ្នែកការពារប្រទេសថា ការបាញ់កាំភ្លើងត្បាល់យ៉ាងខ្លាំងបានរារាំងមិនឱ្យឧទ្ធម្ភាគចក្រយោធាធុន medevac ទីពីររបស់ក្រុមយោធាស.រ.អា.ចុះចតបានទេ៕