លោក Mike Pompeo រដ្ឋមន្ត្រីក្រសួងការបរទេសសហរដ្ឋអាមេរិក បានថ្លែងសុន្ទរកថាមួយនៅទីស្នាក់ការរបស់ VOA នៅក្នុងរដ្ឋធានីវ៉ាស៊ីនតោន កាលពីរសៀលថ្ងៃចន្ទ ដោយបានកោតសរសើរដល់ VOA ថាបានផ្តល់ព័ត៌មានពិតឥតលម្អៀងទៅកាន់ពិភពលោក ដែលរដ្ឋាភិបាលជាច្រើនបានរឹតត្បិតព័ត៌មាន ឬផ្តល់ព័ត៌មានក្លែងក្លាយដល់ពលរដ្ឋ។
លោក Pompeo មានប្រសាសន៍ថា៖ «កិច្ចការ VOA គឺសំខាន់ណាស់។ VOA គឺជាបណ្តាញព័ត៌មានឈានមុខសម្រាប់សេរីភាព។ រាល់សប្តាហ៍មនុស្ស ២៧៨ លាននាក់ ស្តាប់ VOA ចំនួន៤៧ភាសា»។
ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសាកល (USAGM) ដែលរួមមាន VOA ផងនោះ ជាបណ្តាញព័ត៌មានឯករាជ្យដែលទទួលថវិការបស់រដ្ឋាភិបាលអាមេរិក និងផ្សព្វផ្សាយព័ត៌មានពិត ច្បាស់លាស់ ឥតលម្អៀង ទៅកាន់ពិភពលោក ចាប់តាំងពីឆ្នាំ ១៩៤២ មក។ ហើយ VOA ភាសាខ្មែរ បានផ្សព្វផ្សាយចាប់តាំងពីថ្ងៃទី១៥ ខែសីហា ឆ្នាំ១៩៥៥ មក។
ក្នុងពេលបំពេញទស្សនកិច្ចមកកាន់ទីស្នាក់ការ VOA ក្នុងរដ្ឋធានីវ៉ាស៊ីនតោន នៅថ្ងៃចន្ទ ទី១១ ខែមករា ឆ្នាំ២០២១ លោករដ្ឋមន្ត្រីការបរទេសក៏បានលើកឡើងពីឧទាហរណ៍ជាក់លាក់ខ្លះថា ពលរដ្ឋនៅប្រទេសវ៉េណេស៊ុយអេឡាត្រូវការព័ត៌មានពិតអំពីរដ្ឋាភិបាលពុករលួយរបស់គេ។
ពីទីក្រុងហុងកុង បុគ្គលិក VOA ភាសាចិនបានផ្តល់ព័ត៌មានពីការវាយប្រហារចាប់ខ្លួនមនុស្សជាច្រើន ដោយសារការតវ៉ាប្រឆាំង ហើយប្រទេសជាច្រើនបានរឹតត្បិតសេរីភាពនិងសិទ្ធិមនុស្ស លទ្ធិប្រជាធិបតេយ្យ ដែលលោកបានផ្តល់ការកត់ស្គាល់បន្ថែមពី VOA ក្រោមការគ្រប់គ្រងរបស់ទីភ្នាក់ងារ USAGM។
លោក Mike Pompeo បានសង្កត់ធ្ងន់ថា៖ «បេសកកម្មរបស់ទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសាកល (USAGM) រួមទាំង VOA ផងនោះ គឺដើម្បីផ្តល់ព័ត៌មានភ្ជាប់និងទាក់ទងពលរដ្ឋជុំវិញពិភពលោក ដើម្បីគាំទ្រសេរីភាពនិងលទ្ធិប្រជាធិតេយ្យ»។
លោក Michael Pack អគ្គនាយករបស់ USAGM បានថ្លែងសុន្ទរកថាខ្លីមួយ នៅក្នុងទស្សនកិច្ចរបស់លោក Pompeo ថា មានរដ្ឋាភិបាលជាច្រើនក្នុងពិភពលោកកំពុងព្យាយាមរារាំងពលរដ្ឋក្នុងការទទួលព័ត៌មានពិត និងរក្សាអំណាច ហើយបង្កការឃោសនាព័ត៌មានក្លែងក្លាយ ដោយការព្យាយាមគ្រប់គ្រងគំនិតនិងលាក់បាំងការពិត ហើយជាចុងក្រោយ គឺចាត់វិធានការតែម្តង។
«ចូរឲ្យយើងបញ្ជាក់ឲ្យច្បាស់ថា នេះជាឥរិយាបទប្រមាថមើលងាយដល់សិទ្ធិសេរីភាពជាសកល និងសេរីភាពនៃការបញ្ចេញមតិសម្រាប់បុគ្គលគ្រប់រូបដែលត្រូវទទួលបាន»។
នៅក្នុងសុន្ទករថាខ្លីរបស់លោកនោះ លោក Pack បានអះអាងថា សហរដ្ឋអាមេរិកត្រូវតែចូលរួមកាន់តែខ្លាំងជាងមុនក្នុងរឿងនេះ។
ទស្សនកិច្ចរបស់លោក Mike Pompeo នៅ VOA បានបញ្ចប់ទៅដោយសំណួរនិងចម្លើយជាមួយនិងលោក Robert Reilly នាយក VOA ស្តីពីបញ្ហាជាច្រើនទាក់ទងនឹងវិស័យការទូត បញ្ហាដែលលោកចង់ឃើញរដ្ឋបាលថ្មីលោក ចូ បៃដិន (Joe Biden) បន្តគោលនយោបាយរបស់រដ្ឋបាលលោកប្រធានាធិបតី ដូណាល់ ត្រាំ (Donald Trump) ជាពិសេសទាក់ទងនឹងមជ្ឈឹមបូព៌ាប្រទេសនិងតំបន់មួយចំនួនទៀត។
លោក Mike Pompeo បានទទូចដល់ VOA បន្តរាយការណ៍ព័ត៌មានអំពីសេដ្ឋកិច្ចពាណិជ្ជកម្មអាមេរិកនិងចិន និងបញ្ហាទាក់ទងនឹងការលួចព័ត៌មានពីសហរដ្ឋអាមេរិក និងឃ្លាំមើលសកម្មភាព ដែលធ្វើឲ្យប៉ះពាល់ដល់សេដ្ឋកិច្ចសហរដ្ឋអាមេរិកជាដើម។
ទស្សនកិច្ចរបស់លោក Mike Pompeo ដែលជារដ្ឋមន្ត្រីការបរទេសដំបូងមកកាន់ VOA ក្នុងរយ:ពេលជាង ២០ ឆ្នាំនេះ កើតឡើង ១០ ថ្ងៃមុនលោកប្រធានាធិបតី Donald Trump បញ្ចប់អាណត្តិរបស់លោក នៅថ្ងៃទី២០ខែមករា នៅពេលលោកប្រធានាធិបតីជាប់ឆ្នោតថ្មីគឺលោក Joe Biden ធ្វើសច្ចាប្រណិធានចូលកាន់មុខតំណែងជាប្រធានាធិបតីសហរដ្ឋអាមេរិក៕