រដ្ឋមន្ត្រីការបរទេសសហរដ្ឋអាមេរិកលោក Mike Pompeo កាលពីថ្ងៃព្រហស្បតិ៍ បានពិពណ៌នាប្រទេសចិនដែលដឹកនាំរបបកុម្មុយនីស្តថា ជា «ការគំរាមកំហែងយ៉ាងធ្ងន់ធ្ងរបំផុតនាពេលអនាគតដល់សេរីភាពសាសនា» ខណៈលោកកំពុងធ្វើទស្សនកិច្ចនៅក្នុងប្រទេសឥណ្ឌូណេស៊ី។ នេះជាប្រទេសទី៤ ក្នុងដំណើរទស្សនកិច្ចរបស់លោកនៅ ៥ ប្រទេសក្នុងទ្វីបអាស៊ី។
លោក Pompeo បានកោតសរសើរប្រទេសឥណ្ឌូណេស៊ី ដែលមានអ្នកកាន់សាសនាឥស្លាមភាគច្រើនបំផុតនោះថា បានគាំទ្រនូវលិទ្ធិប្រជាធិបតេយ្យ និងការអនុគ្រោះដល់សាសនាដទៃផ្សេងៗទៀត។ លោកបានថ្លែងយ៉ាងដូចនេះ នៅក្នុងការជួបប្រជុំមួយជាមួយក្រុមមូស្លីមសេរីនិយម Nahdlatul Ulama ដែលជាក្រុមធ្វើសកម្មភាពប្រឆាំងចលនាឥស្លាមតឹងរ៉ឹងនោះ។
ដោយអំពាវនាវឲ្យមេដឹកនាំសាសនា «ធ្វើជាសាក្សីខាងសីលធម៌» និងនិយាយក្នុងនាមពលរដ្ឋគ្រប់ជំនឿសាសនាទាំងអស់នោះ លោក Pompeo បាននិយាយសំដៅទៅលើប្រទេសចិន ដែលបានធ្វើសង្គ្រាមប្រឆាំងអ្នកកាន់សាសនាឥស្លាម សាសនាព្រះពុទ្ធ សាសនាគ្រិស្ត និងអ្នកកាន់សាសនានិកាយ Falun Gong ដែលត្រូវបានដាក់នៅក្រៅច្បាប់នោះ។
ប្រមុខការទូតអាមេរិករូបនេះក៏បានបញ្ជាក់ជាពិសេសទាក់ទងនឹងការ «បង្ក្រាបដ៏ឃោរឃៅ» របស់រដ្ឋាភិបាលក្រុងប៉េកាំងទៅលើជនជាតិភាគតិចមូស្លីម Uighur (អ៊ុយហ្គ័រ) ក្នុងតំបន់ Xinjiang របស់ចិន ដែលពួកគេទទួលរងនូវការបង្រ្កាបដ៏ព្រៃផ្សៃពីអាជ្ញាធរកុម្មុយនីស្តចិន ដែលក្នុងនោះរួមមានទាំងការចាប់ខ្លួនជនជាតិភាគតិច Uighur និងជនជាតិភាគតិចមូស្លីមដទៃទៀតចំនួនប្រមាណ ១ លាននាក់ ដាក់ក្នុងជំរំឃុំឃាំងផងដែរ។
លោក Pompeo ក៏បានជួបជាមួយមេដឹកនាំឥណ្ឌូណេស៊ី ដែលក្នុងនោះរួមមានលោកប្រធានាធិបតីឥណ្ឌូណេស៊ី Joko Widodo ផងដែរ ដោយលោកបានគូសបញ្ជាក់ចក្ខុវិស័យនៃប្រទេសទាំងពីរចំពោះតំបន់ឥណ្ឌូប៉ាស៊ីហ្វិក (Indo-Pacific) មួយដែលសេរីនិងបើកចំហ។
លោក Pompeo នឹងបន្តដំណើរទៅកាន់ប្រទេសវៀតណាម ដែលទើបត្រូវបានបន្ថែមក្នុងកម្មវិធីទស្សនកិច្ចនៅអាស៊ីរបស់លោក ដើម្បីពង្រឹងនូវទំនាក់ទំនងរវាងប្រទេសទាំងពីរ។ នេះបើតាមការបញ្ជាក់របស់ក្រសួងការបរទេសអាមេរិក៕