សេតវិមានបានបញ្ជាក់កាលពីថ្ងៃចន្ទថា សហរដ្ឋអាមេរិក បានប្រុងប្រៀបខ្លួនរួចហើយដើម្បីចាប់ផ្តើមការចរចាខាងការទូតជាមួយប្រទេសរុស្ស៊ីតាមរយៈបណ្តាញជាច្រើន ក៏ប៉ុន្តែ សហរដ្ឋអាមេរិក បានធ្វើការបញ្ជាក់យ៉ាងច្បាស់ថា រដ្ឋាភិបាលក្រុងមូស្គូ ត្រូវតែដោះស្រាយចំពោះការព្រួយកង្វល់របស់ប្រទេសលោកខាងលិចអំពីការពង្រាយកម្លាំងយោធារបស់ខ្លួននៅតាមបណ្តោយព្រំដែនជាមួយប្រទេសអ៊ុយក្រែន។
ទីប្រឹក្សាសន្តិសុខជាតិសហរដ្ឋអាមេរិកលោក Jake Sullivan បាននិយាយជាមួយសមភាគីរបស់លោកគឺលោក Yuri Ushakov ទីប្រឹក្សាគោលនយោបាយការបរទេសរបស់ប្រធានាធិបតីរុស្ស៊ីលោក Vladimir Puitn ដោយសេតវិមានបានបញ្ជាក់ថា សហរដ្ឋអាមេរិក មានឆន្ទៈចរចាជាមួយរដ្ឋាភិបាលវិមានក្រឹមឡាំងនិងតាមរយៈក្រុមប្រឹក្សាអង្គការអូតង់និងរុស្ស៊ី (NATO-Russia Council)និងអង្គការសម្រាប់សន្តិសុខនិងសហប្រតិបត្តិការនៅក្នុងតំបន់អឺរ៉ុប (Organization for Security and Co-operation in Europe)។
សេតវិមាន បាននិយាយថា លោកSullivan បានប្រាប់លោក Ushakov ថា៖ «រាល់ការសន្ទនាណាមួយត្រូវផ្អែកលើភាពមានទៅវិញទៅមកនិងការដោះស្រាយការព្រួយកង្វល់របស់យើងអំពីសកម្មភាពរបស់រុស្ស៊ី។
នៅក្នុងជំនួបកំពូលតាមអនឡាញកាលពី២សប្តាហ៍មុន ប្រធានាធិបតីសហរដ្ឋអាមេរិកលោក Joe Biden បានព្រមានលោក Putinថា សហរដ្ឋអាមេរិកនឹងដាក់ទណ្ឌកម្មសេដ្ឋកិច្ចយ៉ាងតឹងរ៉ឹងប្រឆាំងនឹងរុស្ស៊ី ប្រសិនបើរុស្ស៊ីឈ្លានពានប្រទេសអ៊ុយក្រែន។ រដ្ឋាភិបាលក្រុងមូស្គូ បានដាក់ពង្រាយកងទ័ពរាប់ម៉ឺននាក់នៅតាមបណ្តោយព្រំដែនភាគខាងកើតរបស់អ៊ុយក្រែន ថ្វីបើរដ្ឋាភិបាលក្រុងវ៉ាស៊ីនតោន បានចង្អុលបង្ហាញថា ខ្លួនមិនជឿថា លោក Putin បានសម្រេចចាប់ផ្តើមវាយប្រហារលើប្រទេសអ៊ុក្រែននោះទេ ក៏ដោយ។
មិនមានអត្ថាធិប្បាយភ្លាមៗពីរដ្ឋាភិបាលក្រុងមូស្គូអំពីអត្ថាធិប្បាយ របស់លោក Sullivan និងលោក Ushakovទេ៕