កាលពីថ្ងៃព្រហស្បតិ៍ សហរដ្ឋអាមេរិកបានដាក់ទណ្ឌកម្មថ្មីៗលើភ្នាក់ងារសន្តិសុខរុស្ស៊ីបួននាក់ ដែលអាមេរិកចោទប្រកាន់ថាទាក់ទិននឹងការបំពុលលោក Alexey Navalny មេដឹកនាំក្រុមប្រឆាំងនៅរុស្ស៊ី កាលពីឆ្នាំ ២០២០។
ក្រសួងហិរញ្ញវត្ថុសហរដ្ឋអាមេរិកបាននិយាយថា ជនជាតិរុស្ស៊ីបួននាក់នេះធ្វើការទាក់ទិនជាមួយសេវាសន្តិសុខសហព័ន្ធរបស់រដ្ឋាភិបាលក្រុងមូស្គូ។ ក្រុមមន្ត្រីក្រសួងហិរញ្ញវត្ថុអាមេរិកាំងបានរាំងខ្ទប់ធនធានដែលពួកគេមាននៅអាមេរិក ហើយបានហាមប្រាមជនទាំងនេះមិនឱ្យប្រកបកិច្ចការជំនួញក្នុងសហរដ្ឋអាមេរិក នៅពេលដែលក្រសួងការបរទេសអាមេរិកបានបញ្ចប់សិទ្ធិទិដ្ឋាការមិនឱ្យពួកគេចូលក្នុងសហរដ្ឋអាមេរិកឡើយ។
នៅក្នុងសេចក្តីថ្លែងការណ៍មួយ លោក Brian Nelson មន្ត្រីខាងការប្រឆាំងនឹងភេរវកម្មនៃក្រសួងហិរញ្ញវត្ថុអាមេរិកបាននិយាយថា៖ «នៅថ្ងៃនេះ យើងរំលឹកលោក Vladimir Putin និងរបបគ្រប់គ្រងរបស់លោកថា មានផលវិបាកមិនមែនសម្រាប់តែការធ្វើសង្គ្រាមដ៏ឃោរឃៅនិងមិនសមហេតុផលប្រឆាំងនឹងប្រទេសអ៊ុយក្រែនតែប៉ុណ្ណោះទេ តែក៏មានផលវិបាកដែរដោយសារការរំលោភលើសិទ្ធិមនុស្សរបស់ប្រជារាស្ត្ររុស្ស៊ី»។
លោក Nelson បានថ្លែងបន្តថា៖ «ការប៉ុនប៉ងធ្វើឃាតលោក Alexey Navalny កាលពីឆ្នាំ ២០២០ ជាការបំពានរបស់វិមានក្រឹមឡាំងលើសិទ្ធិមនុស្ស ហើយយើងនឹងបន្តប្រើប្រាស់អំណាចដែលយើងមានដើម្បីឱ្យពួកឃាតកររបស់វិមានក្រឹមឡាំងទទួលខុសត្រូវដល់សកម្មភាពរបស់ពួកគេ»។
លោក Navalny ដែលជាអ្នករិះគន់ លោក Putin យូរយាមកហើយ ត្រូវបានចាប់ខ្លួនកាលពីខែមករាឆ្នាំ ២០២១ ក្រោយពីបានវិលត្រឡប់មកកាន់ក្រុងមូស្គូវិញពីប្រទេសអាល្លឺម៉ង់ ដែលនៅទីនោះក្រុមវេជ្ជបណ្ឌិតលោកខាងលិចបានព្យាបាលលោកពីអ្វីដែលក្រុមគ្រូពេទ្យទាំងនេះនិយាយថាជាការបំពុលដោយសារធាតុ nerve agent ពីសម័យសហភាពសូវៀត។
នៅពេលមួយនោះ វិមានក្រឹមឡាំងបានចោទប្រកាន់លោក Navalny ថាធ្វើការឱ្យ CIA ដើម្បីធ្វើឱ្យអន្តរាយដល់រុស្ស៊ី។ រដ្ឋាភិបាលក្រុងមូស្គូបានបដិសេធថា ខ្លួនគ្មានទាក់ទងនឹងអ្វីដែលបានកើតមានដល់លោក Navalny ទេ ហើយបានបដិសេធថា ខ្លួនក៏មិនបានធ្វើទុក្ខបុកម្នេញលោកទេ៕