លោក Jean-Yves Le Drian រដ្ឋមន្រ្តីក្រសួងការបរទេសបារាំង បាននិយាយកាលពីថ្ងៃព្រហស្បតិ៍ថា ប្រទេសរុស្ស៊ីនិងលោកប្រធានាធិបតី Vladimir Putin នឹងប្រឈមមុខការដាក់ទណ្ឌកម្ម ប្រសិនបើមេដឹកនាំប្រឆាំងគឺលោក Alexey Navalny ស្លាប់។
ថ្លែងប្រាប់បណ្តាញទូរទស្សន៍បារាំង លោក Le Drian បាននិយាយថា៖ «យើងនឹងដាក់ទណ្ឌកម្មចាំបាច់ ហើយវាជាការទទួលខុសត្រូវរបស់លោក Putin និងអាជ្ញាធររុស្ស៊ី»។
លោក Jake Sullivan ទីប្រឹក្សាសន្តិសុខជាតិអាមេរិក បានធ្វើអត្ថាធិប្បាយស្រដៀងគ្នានេះដែរ ប្រាប់កម្មវិធីទូរទស្សន៍ CNN Sunday ដោយព្រមានពី «ផលវិបាក» នៅក្នុងការស្លាប់លោកNavalny។
លោក Navalny ត្រូវបានចាប់ខ្លួនកាលពីខែមករា បន្ទាប់ពីវិលត្រឡប់មកពីប្រទេសអាល្លឺម៉ង់ ជាទីកន្លែងដែលលោកបានចំណាយពេល ៥ ខែព្យាបាលជំងឺពីថ្នាំពុលបំផ្លាញសរសៃប្រសាទ។ លោក Navalny បានស្តីបន្ទោសរដ្ឋាភិបាលរុស្ស៊ី ចំពោះការបំពុលនេះ តែមន្រ្តីរុស្ស៊ីបដិសេធការចោទប្រកាន់នេះ។
លោក Navalny មេដឹកនាំប្រឆាំងនិងជាអ្នករិះគន់ជាញឹកញាប់ចំពោះលោក Putin បានចុះខ្សោយសុខភាព ចាប់តាំងពីបានចាប់ផ្តើមធ្វើកូដកម្មអត់អាហារ កាលពី ៣ សប្តាហ៍មុន។
អ្នកគាំទ្រលោកបានចេញមកតវ៉ាទាមទារឲ្យដោះលែងលោក។ ប៉ូលិសបានចាប់ខ្លួនអ្នកតវ៉ាជាង ១.៧០០នាក់ កាលពីថ្ងៃពុធ ពេលមានបាតុកម្មនៅក្នុងទីក្រុងជាច្រើន នៅក្នុងប្រទេសរុស្ស៊ី៕
