ខណៈដែលសុខភាពរបស់លោក Alexey Navalny អ្នករិះគន់រដ្ឋាភិបាលវិមានក្រឹមឡាំង កាន់តែដុនដាបឡើងដោយសារកូដកម្មបង្ហត់អាហាររបស់លោកនៅក្នុងមន្ទីរឃុំឃាំងនៅប្រទេសរុស្ស៊ីនោះ មិនមានវេជ្ជបណ្ឌិតផ្ទាល់ខ្លួនរបស់លោកណាម្នាក់ត្រូវបានគេអនុញ្ញាតឲ្យចូលជួបលោកនោះទេ។
ក្រុមវេជ្ជបណ្ឌិតរបស់លោក Alexey Navalny អ្នករិះគន់រដ្ឋាភិបាលរុស្ស៊ីដែលកំពុងជាប់ឃុំ និយាយថា ពួកគេត្រូវបានហាមឃាត់មិនឲ្យជួបលោក Navalny ទោះបីជាមានសេចក្តីរាយការណ៍ថា លោកកំពុងស្ថិតក្នុងស្ថានភាពជំងឺធ្ងន់ធ្ងរដោយសារកូដកម្មបង្អត់អាហារក៏ដោយ។
អ្នកស្រីវេជ្ជបណ្ឌិត Anastasia Vasilyevaដែលជាវេជ្ជបណ្ឌិតមួយរូបរបស់លោក Navalny អះអាងថា អ្នកស្រីនិងអ្នកជំនាញវេជ្ជសាស្ត្របីនាក់ផ្សេងទៀតបានព្យាយាមចូលសួរសុខទុក្ខលោក Navalny នៅក្នុងគ្លីនិករបស់មន្ទីរឃុំឃាំង ក៏ប៉ុន្តែត្រូវបានគេមិនអនុញ្ញាតឲ្យចូល។ អ្នកស្រីបន្ថែមថាក្រុមវេជ្ជបណ្ឌិតបានរង់ចាំនៅខាងក្រៅទ្វារមន្ទីរឃុំឃាំងក្នុងរយៈពេលជាច្រើនម៉ោង។
អ្នកស្រី Vasilyeva បានបង្ហោះសារលើបណ្តាញសង្គម Twitter ថា៖ «វាជាការបង្ហាញពីការមិនគោរពនិងការឌឺដងដល់វេជ្ជបណ្ឌិត»។
អ្នកស្រីក៏បានបញ្ជាក់ថា៖ «អាយុជីវិតនិងសុខភាពរបស់លោក Navalny ពិតជាស្ថិតក្នុងគ្រោះថ្នាក់»។
កាលពីថ្ងៃអាទិត្យ លោក Navalny ត្រូវបានគេនាំចេញពីមន្ទីរឃុំឃាំងដាច់ស្រយាលភាគខាងកើតទីក្រុងមូស្គូទៅកាន់មន្ទីរពេទ្យនៅក្នុងមន្ទីរឃុំឃាំងមួយក្នុងទីក្រុង Vladimir ដែលស្ថិតនៅចម្ងាយ១៨០គីឡូម៉ែត្រភាគខាងកើតរដ្ឋធានីមូស្គូ។
កាលពីថ្ងៃចន្ទ មន្ត្រីប្រចាំមន្ទីរឃុំឃាំងរុស្ស៊ីមួយនោះ បានបញ្ជាក់ថា ស្ថានភាពលោក Navalny គឺ «អាចទទួលយកបាន» ប៉ុន្តែវេជ្ជបណ្ឌិតម្នាក់ទៀតរបស់លោកគឺលោកវេជ្ជបណ្ឌិត Yaroslav Ashikhmin បាននិយាយថា លោក Navalny មានកម្រិតជាតិប៉ូតាស្យូមខ្ពស់ដែលអាចបណ្តាលឲ្យគាំងបេះដូង ហើយកម្រិតក្រេអាទីនកើនឡើង ដែលបានបង្ហាញពីស្ថានភាពតម្រងនោមចុះខ្សោយ។
លោក Navalny អាយុ៤៤ឆ្នាំ បានចាប់ផ្តើមធ្វើកូដកម្មបង្អត់អាហារកាលពីចុងខែមីនាដើម្បីតវ៉ាចំពោះកង្វះការថែទាំផ្នែកវេជ្ជសាស្ត្រសម្រាប់ការឈឺចុកចាប់ជើងនិងខ្នងធ្ងន់ធ្ងររបស់លោក។
លោក Navalny បានរួចរស់រានមានជីវិតពីការដាក់ថ្នាំបំពុលដ៏ប្រល័យកាលពីឆ្នាំមុន ហើយត្រូវបានចាប់ខ្លួននៅពេលដែលលោកបានត្រឡប់មកកាន់ទីក្រុងមូស្គូវិញកាលពីខែមករា បន្ទាប់ពីបានសម្រាកព្យាបាលនៅប្រទេសអាល្លឺម៉ង់។ រដ្ឋាភិបាលរុស្ស៊ីបានបដិសេធថា ខ្លួនមិនមានតួនាទីនៅក្នុងការបំពុលនោះទេ។
លោក Navalny ត្រូវបានតុលាការកាត់ទោសឲ្យជាប់ពន្ធនាគាររយៈពេល ២ ឆ្នាំកន្លះ កាលពីខែកុម្ភៈពីបទលួចបន្លំប្រាក់និងត្រូវបានឃុំទុកនៅមន្ទីរកែប្រែ Pokrov ដែលលោកបានពណ៌នាថាជា «ជំរំអប់រំមួយ»។
សហរដ្ឋអាមេរិកនិងប្រទេសផ្សេងទៀតបានដាក់ទណ្ឌកម្មមន្ត្រីរដ្ឋាភិបាលរុស្ស៊ីពីការដាក់ថ្នាំបំពុលនោះ ហើយប្រទេសជាច្រើនទៀតក៏បានអំពាវនាវឲ្យដោះលែងលោក Navalny ផងដែរ។
នៅពេលដែលសុខភាពរបស់លោក Navalny កាន់តែដុនដាបឡើងនោះ អាជ្ញាធររុស្ស៊ីបានស្នើទៅកាន់ការិយាល័យរដ្ឋអាជ្ញាក្រុងមូស្គូឲ្យប្រកាសដាក់អង្គការរបស់លោក Navalny ដែលជាមូលនិធិប្រឆាំងអំពើពុករលួយមួយជាអង្គការជ្រុលនិយម។
សម្ព័ន្ធមិត្តនិងអ្នកគាំទ្រលោក Navalny បានអំពាវនាវឲ្យមានបាតុកម្មទូទាំងប្រទេសរុស្ស៊ីបន្ថែមទៀត៕
ប្រែសម្រួលដោយ ទុំ ម្លិះ
