កាលពីថ្ងៃពុធ អ្នកគាំទ្រគណបក្សសាធារណរដ្ឋខ្លាំងក្លាម្នាក់គឺលោក Johnny Isakson សមាជិកព្រឹទ្ធសភាសហរដ្ឋអាមេរិប្រចាំរដ្ឋ Georgia បានរិះគន់ខ្លាំងដល់លោកប្រធានាធិបតី Donald Trump ដែលបានធ្វើការវាយប្រហារតាមពាក្យសម្តីច្រើនដងលើសពសមាជិកព្រឹទ្ធសភាសហរដ្ឋអាមេរិក លោក John McCain ដែលធ្លាប់ជាបេក្ខជនប្រធានាធិបតី និងជាអ្នកទោសសង្គ្រាមវៀតណាម ដែលបានទទួលអនិច្ចកម្ម ដោយសារជំងឺមហារីកខួរក្បាលកាលពីជិត៧ខែមុននេះ។
កាលពីប៉ុន្មានថ្ងៃមុននេះ លោក Trump បានធ្វើការវាយប្រហារតាមពាក្យសម្តីជាថ្មីទៀតប្រឆាំងនឹងលោក McCain ដោយបន្ទោសលោកថា បានញុះញង់ឱ្យមានការស៊ើបអង្កេតយ៉ាងយូរអំពីចំណងទាក់ទងរបស់ក្រុមអ្នកឃោសនាបោះឆ្នោតឱ្យលោក Trump ជាមួយប្រទេសរុស្សី នៅពេលបោះឆ្នោតកាលពីឆ្នាំ២០១៦ ហើយបន្ទាប់មកលោក McCain បានបោះឆ្នោតដាច់ណាត់ ដែលបានបំផ្លាញកិច្ចខិតខំប្រឹងប្រែងរបស់លោក Trump ក្នុងការរុះរើគោលនយោបាយជាតិខាងការថែទាំសុខភាព ដែលជាការសម្រេចខាងនីតិបញ្ញត្តិសំខាន់បំផុតរបស់លោក ប្រធានាធិបតី Barack Obama ដែលបានកាន់តំណែងមុនលោក។
លោក Trump បាននិយាយប្រាប់ក្រុមអ្នកកាសែតកាលពីថ្ងៃអង្គារថា៖ «ខ្ញុំមិនដែលចូលចិត្តលោក McCain ទេ ហើយខ្ញុំនឹងមិនជាអ្នកចូលចិត្តលោក McCain ជាដាច់ខាត»។
សមាជិកសភាអាមេរិកខ្លះបានរិះគន់លោក Trump អំពីការវាយប្រហារជាពាក្យសម្តីរបស់លោកមកលើលោក McCain ក៏ប៉ុន្តែប្រហែលគ្មាននរណារិះគន់លោក Trump ខ្លាំងជាងលោក Isakson ទេ។ លោក Isakson បានមានប្រសាសន៍ថា ការវាយប្រហារជាពាក្យសម្តីដោយលោក Trump ប្រឆាំងនឹងលោក McCain «បានធ្វើឱ្យខ្ញុំខឹងសម្បារយ៉ាងខ្លាំង»៕