សហរដ្ឋអាមេរិកបានបង្ហាញនូវឆន្ទៈថ្មីក្នុងការពិភាក្សាជាមួយនឹងប្រទេសកូរ៉េខាងជើង ប៉ុន្តែវានៅតែពិបាកក្នុងការឃើញនូវដំណោះស្រាយដោយសន្តិវិធីមួយចំពោះវិបត្តិនុយក្លេអ៊ែរនៅលើឧបទ្វីបកូរ៉េនៅពេលអនាគតដ៏ខ្លីខាងមុខនេះដដែល។
រដ្ឋមន្ត្រីការបរទេសសហរដ្ឋអាមេរិកលោក Rex Tillerson បាននិយាយកាលពីថ្ងៃអាទិត្យម្សិលមិញថា លោកមានគោលបំណងរក្សាបណ្ដាញទំនាក់ទំនងឲ្យនៅបើកចំហជាមួយនឹងប្រទេសកូរ៉េខាងជើង និងកំពុងរង់ចាំមើលសញ្ញាណាមួយដែលបញ្ជាក់ថា រដ្ឋាភិបាលរបស់លោក Kim Jong Un ត្រៀមខ្លួនរួចរាល់សម្រាប់ការចរចា។
ការលើកឡើងរបស់រដ្ឋាភិបាលលោកប្រធានាធិបតី Donald Trump ចំពោះការគាំទ្រឲ្យមាននូវការពិភាក្សាបែបស៊ីជម្រៅដោយគ្មានលក្ខខណ្ឌជាមួយនឹងរដ្ឋាភិបាលក្រុងព្យុងយ៉ាងដូចនេះ និងការងាកចេញពីការពិភាក្សាអំពីការវាយប្រហារជាមុនដោយប្រើកម្លាំងយោធាប្រឆាំងនឹងកូរ៉េខាងជើង បានកើតឡើងដើម្បីជាការឆ្លើយតបទៅនឹងការបន្ធូរបន្ថយភាពតានតឹងជាមួយនឹងកូរ៉េខាងជើងនៅឯកីឡាអូឡាំពិក ដែលបានចរចាឡើងដោយប្រធានាធិបតីកូរ៉េខាងត្បូងលោក Moon Jae In។
ការយល់ព្រមរបស់កូរ៉េខាងជើងនៅក្នុងការចូលរួមនៅក្នុងកីឡាអូឡាំពិករដូវរងានៅក្នុងទីក្រុង PyeongChang ប្រទេសកូរ៉េខាងត្បូង បានកើតឡើងស្របពេលដែលមានការផ្អាកជាបណ្ដោះអាសន្ននូវកិច្ចប្រឹងប្រែងខ្លាំងក្លារបស់កូរ៉េខាងជើងកាលពីឆ្នាំមុនក្នុងការអភិវឌ្ឍគ្រាប់ផ្លោងមីស៊ីលឆ្លងទ្វីបដែលមានសមត្ថភាពអាចហោះដល់សហរដ្ឋអាមេរិកបាន។
សហរដ្ឋអាមេរិកបានរួមចំណែកនៅក្នុងការបន្ធូរបន្ថយភាពតានតឹងនេះដោយការពន្យារពេលការធ្វើសមយុទ្ធយោធារួមគ្នាជាមួយនឹងកូរ៉េខាងត្បូងរហូតទាល់តែការប្រកួតកីឡាអូឡាំពិកត្រូវបានបញ្ចប់រួចរាល់៕