ចៅក្រមសហព័ន្ធសហរដ្ឋអាមេរិកមួយរូបនៅក្នុងរដ្ឋធានីវ៉ាស៊ីនតោនបានចេញបញ្ជាហាមឃាត់មួយផ្នែកលើអតីតប្រធានាធិបតីសហរដ្ឋអាមេរិកលោក Donald Trump អំពីអ្វីដែលលោកអាចនិយាយបានអំពីសវនាការដែលជិតធ្វើឡើងរបស់លោកក្រោមបទចោទប្រកាន់ដែលថាលោកបានព្យាយាមដោយខុសច្បាប់នៅក្នុងការប្រែក្រឡាស់ការចាញ់របស់លោកនៅក្នុងការបោះឆ្នោតឆ្នាំ ២០២០។
អ្នកស្រីចៅក្រម Tanya Chutkan បានហាមឃាត់លោក Trump ដែលជាគូប្រជែងនាំមុខដើម្បីបានការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋសម្រាប់ការបោះឆ្នោតឆ្នាំ ២០២៤ មិនឱ្យវាយប្រហារលើរដ្ឋអាជ្ញា សាក្សីដែលអាចមានណាម្នាក់ និងបុគ្គលិករបស់ចៅក្រម។
រដ្ឋអាជ្ញាពិសេសក្រសួងយុត្តិធម៌សហរដ្ឋអាមេរិកលោក Jack Smith បានស្នើឱ្យមានបទបញ្ជាហាមឃាត់នេះ ដោយអះអាងថាការវាយប្រហារជាបន្តបន្ទាប់របស់លោក Trump លើលោក ចៅក្រម និងសាក្សីដែលអាចមានណាម្នាក់អាចប៉ះពាល់ដល់ទំនុកចិត្តរបស់សាធារណជននៅក្នុងប្រព័ន្ធតុលាការនិងអាចគំរាមដល់សមាជិកគណៈវិនិច្ឆ័យតុលាការនៅពេលខាងមុខនៃសំណុំរឿងដែលគ្រោងនឹងចាប់ផ្ដើមនៅខែមីនាឆ្នាំក្រោយនេះ។
មេធាវីរបស់លោក Trump បានប្រឆាំងនឹងការដាក់កំហិតណាមួយ និងអាចប្ដឹងបន្តទៅឧទ្ធរណ៍លើការសម្រេចនេះ។ អ្នកស្រីចៅក្រម Chutkan មិនបានដាក់កំហិតលើករណីដែលលោក Trump អាចរិះគន់លើក្រសួងយុត្តិធម៌អាមេរិកជាទូទៅឬក៏បញ្ចេញមតិណាមួយដែលលោកជឿថាសំណុំរឿងនេះមានលក្ខណៈនយោបាយដើម្បីកុំឱ្យលោកបានឈរឈ្មោះជាប្រធានាធិបតីជាថ្មីនោះទេ។
ក្រុមយុទ្ធនាការឃោសនាបោះឆ្នោតរបស់លោក Trump បានប្រឆាំងនឹងការសម្រេចរបស់អ្នកស្រីចៅក្រម Chutkan ដោយនិយាយថាវាជា «អំពើដ៏គួរឱ្យស្អប់ទាំងស្រុងនិងជាកាំបិតប្រកាន់បក្ខពួកមួយទៀតដែលចាក់ចំបេះដូងនៃលទ្ធិប្រជាធិបតេយ្យរបស់យើង»។
នៅក្នុងការអះអាងមុនការសម្រេចរបស់អ្នកស្រី Chutkan មេធាវីរបស់លោក Trump លោក John Lauro បានចោទប្រកាន់រដ្ឋអាជ្ញាថា «មានបំណងពិនិត្យចាប់ពិរុទ្ធលើបេក្ខជននយោបាយម្នាក់នៅអំឡុងយុទ្ធនាការឃោសនាបោះឆ្នោត»។ ប៉ុន្តែ ចៅក្រមបានទាត់ចោលការអះអាងនេះ ដោយនិយាយថា លោក Trump «មិនមានសិទ្ធិក្នុងការនិយាយនិងធ្វើអ្វីតាមចិត្តរបស់លោកនោះទេ»។
ក្រៅពីការចោទប្រកាន់ពីរដែលលោក Smith បានស្នើឡើងនេះ លោក Trump ប្រឈមនឹងសំណុំរឿងព្រហ្មទណ្ឌពីរផ្សេងទៀត។ សំណុំរឿងទីមួយចោទលោកថាបានព្យាយាមប្រែក្រឡាស់ករណីដែលលោកចាញ់លោក Joe Biden នៅក្នុងការបោះឆ្នោតឆ្នាំ ២០២០ នៅក្នុងរដ្ឋ Georgia។ សំណុំរឿងមួយទៀតគឺការក្លែងបន្លំឯកសារកំណត់ត្រាអាជីវកម្មសម្រាប់អចលនទ្រព្យរបស់លោកនៅក្នុងទីក្រុង New York ដើម្បីលាក់បាំងលុយបំបិទមាត់ដែលលោកឱ្យតារាភាពយន្តអាសអាភាសជាស្ត្រីម្នាក់មុនពេលយុទ្ធនាការឃោសនាបោះឆ្នោតឆ្នាំ ២០១៦ ដ៏ជោគជ័យរបស់លោក៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP។
ចៅក្រមសហរដ្ឋអាមេរិកចេញបញ្ជាហាមឃាត់មួយផ្នែកលើលោក Trump
រូបឯសារ៖ អតីតប្រធានាធីបតីអាមេរិកលោក Donald Trump បង្ហាញខ្លួននៅក្នុងសវនាការមួយក្នុងតុលាការសង្កាត់ Manhattan ក្រុង New York (ញូវយ៉ក) សហរដ្ឋអាមេរិក កាលពីថ្ងៃទី៣ ខែតុលា ឆ្នាំ២០២៣។