អ្នកកាសែតអាមេរិកមួយរូបធ្វើការឲ្យទស្សនាវដ្ដីព័ត៌មានមួយក្នុងប្រទេសមីយ៉ាន់ម៉ា ត្រូវបានអាជ្ញាធរចាប់ឃុំខ្លួន។ នេះបើតាមទស្សនាវដ្ដី Frontier Myanmar ដែលលោកបម្រើការ។
ទស្សនាវដ្ដី Frontier Myanmar បានសរសេរនៅលើ Twitter ថានិពន្ធនាយករបស់ខ្លួនគឺលោក Danny Fenster ត្រូវបានចាប់ខ្លួនកាលពីថ្ងៃច័ន្ទនៅចំណតអាកាសយាន្ដដ្ឋានអន្តរជាតិក្នុងទីក្រុងរ៉ង់ហ្គូននៅពេលលោកត្រៀមឡើងយន្តហោះទៅកាន់ប្រទេសម៉ាឡេស៊ី ហើយត្រូវបានគេនាំខ្លួនទៅកាន់ពន្ធនាគារ Insein នៅទីក្រុងរ៉ង់ហ្គូន។
ទស្សនាវដ្តីនេះបានបញ្ជាក់ថា៖ «យើងមិនបានដឹងថា ហេតុអ្វីបានជាលោក Danny ត្រូវបានចាប់ខ្លួន ហើយយើងពុំអាចទាក់ទងលោកបានឡើយ»។
ទស្សនាវដ្តីនេះក៏បានឲ្យដឹងថា៖ «យើងមានការព្រួយបារម្ភពីសុខុមាលភាពរបស់លោក និងអំពាវនាវឲ្យដោះលែងលោកជាបន្ទាន់។ អាទិភាពរបស់យើងនៅពេលនេះគឺធ្វើយ៉ាងម៉េចឲ្យលោកមានសុវត្ថិភាព និងផ្ដល់ឲ្យលោកនូវជំនួយគ្រប់យ៉ាងដែលលោកត្រូវការ»។
ទស្សនាវដ្តី Frontier Myanmar ផ្សាយជាពីរភាសាគឺភាសាអង់គ្លេសនិងមីយ៉ាន់ម៉ា និងជាទស្សនាវដ្តីឯករាជ្យបំផុតមួយក្នុងប្រទេស។
អ្នកនាំពាក្យក្រសួងការបរទេសសហរដ្ឋអាមេរិកបាននិយាយថា សហរដ្ឋអាមេរិកដឹងពីការរាយការណ៍ថាមានពលរដ្ឋអាមេរិកម្នាក់ត្រូវបានចាប់ឃុំខ្លួននៅក្នុងប្រទេសមីយ៉ាន់ម៉ា។
អ្នកនាំពាក្យរូបនោះនិយាយថា៖ «យើងមានការទទួលខុសត្រូវខ្ពស់ដើម្បីជួយដល់ពលរដ្ឋអាមេរិកាំងដែលរស់នៅបរទេស ហើយយើងកំពុងតាមដានស្ថានភាពនេះ»។
បងប្អូនប្រុសរបស់លោក Fensters ដែលមានឈ្មោះថា Bryan បានសរសេរនៅលើហ្វេសប៊ុកកាលពីថ្ងៃច័ន្ទថា៖ «យើងពិតជាតក់ស្លុតនិងច្របូកច្របល់ខ្លាំងណាស់ ថាហេតុអ្វីបានជា Dan ត្រូវបានគេចាប់ឃុំខ្លួនយ៉ាងដូច្នេះនោះ»៕