សហរដ្ឋអាមេរិកបានឲ្យដឹងនៅថ្ងៃពុធនេះថា ខ្លួនកំពុងតែឈានទៅដល់ការផ្តល់ជំនួយផ្នែកយោធាទៅកាន់ប្រទេសអ៊ីស្រាអែល ដែលជាសម្ព័ន្ធមិត្តមជ្ឈិមបូព៌ាដ៏ជិតស្និទ្ធបំផុត ទោះបីជាទំនាក់ទំនងរវាងលោកប្រធានាធិបតីអាមេរិកបារ៉ាក់ អូបាម៉ានិងលោកនាយករដ្ឋមន្រ្តី Benjamin Netanyahu នៅតែមានភាពតានតឹងក៏ដោយ។
លោកអនុប្រធានាធិបតីអាមេរិក Joe Biden ដែលកំពុងតែស្ថិតនៅទីក្រុង Jerusalem ដើម្បីចូលរួមក្នុងកិច្ចប្រជុំមួយជាមួយនឹងលោក Netanyahu បានមានប្រសាសន៍ថា យោធាដ៏ខ្លាំងក្លារបស់ប្រទេសជ្វីសមួយនេះត្រូវតែរក្សា ទាំងបរិមាណនិងគុណភាពនៃអាវុធយុទ្ធភណ្ឌ។ ប្រទេសទាំង២កំពុងតែចរចាគ្នាទៅលើកិច្ចព្រមព្រៀងថ្មីមួយនៃជំនួយផ្នែកការពាររបស់អាមេរិកដើម្បីជំនួសនូវកិច្ចព្រមព្រៀងរយៈពេល១ឆ្នាំដែលមានទឹកប្រាក់១ពាន់លានដុល្លារ ដែលនឹងចប់នៅឆ្នាំ២០១៨ខាងមុខនេះ។
ប្រទេសអ៊ីស្រាអែលចង់បាននូវទឹកប្រាក់ចំនួន៤៥០០លានដុល្លារពីរដ្ឋាភិបាលក្រុង វ៉ាស៊ីនតោន។ តែសហរដ្ឋអាមេរិកចង់ផ្តល់ទឹកប្រាក់ចំនួនប្រមាណ៣៥០០លានដុល្លារដល់ប្រទេសនេះ។ លោក Netanyahu បានមានប្រសាសន៍កាលពីខែមករាថា ប្រទេសទាំង២កំពុងតែសម្រេចចុងក្រោយលើកិច្ចព្រមព្រៀងលម្អិតដែលមានរយៈពេល១០ឆ្នាំ។
លោក Biden បានមានប្រសាសន៍ថា ជំនួយនេះគឺចាំបាច់ណាស់ដោយសារប្រទេសអ៊ីស្រាអែលស្ថិតនៅក្នុងតំបន់មួយដែលលំបាកនិងប្រែប្រួលរហូត។ អាមេរិកប្តេជ្ញាដើម្បីធានាថា ប្រទេសអ៊ីស្រាអែលអាចការពារខ្លួនទៅនឹងការគំរាមកំហែងធ្ងន់ធ្ងរទាំងអស់ ដោយរក្សាទាំងគុណភាពនិងបរិមាណគ្រប់គ្រាន់ដើម្បីសម្រេចឲ្យបាន។
លោក Biden បានថ្លែងប្រាប់អ្នកសារព័ត៌មានថា លោក អូបាម៉ា បានជួយដល់សន្តិសុខរបស់ប្រទេសអ៊ីស្រាអែលច្រើនជាងរដ្ឋបាលណាៗទាំងអស់នៅក្នុងប្រវត្តិសាស្រ្ត៕