មជ្ឈមណ្ឌលផ្ដល់ទិន្នន័យអំពីជំងឺកូវីដ១៩ របស់សាកលវិទ្យាល័យ Johns Hopkins នៅក្នុងសហរដ្ឋអាមេរិក បានរាយការណ៍ពីករណីឆ្លងថ្មីនៃជំងឺកូវីដ១៩ ក្នុងចំនួនដ៏ច្រើននៅក្នុងប្រទេសឥណ្ឌា និងសហរដ្ឋអាមេរិក។
សាកលវិទ្យាល័យនេះបានឲ្យដឹងកាលពីល្ងាចថ្ងៃសៅរ៍ថា ឥណ្ឌាមានករណីឆ្លងថ្មីចំនួន ៨៦.០៥៤ ករណីក្នុងរយៈពេល ២៤ ម៉ោង ខណៈដែលសហរដ្ឋអាមេរិកមានករណីឆ្លងថ្មីចំនួន ៥៥.០៥៤ ករណី។
នៅក្នុងសហរដ្ឋអាមេរិក ជំងឺកូវីដ១៩ បានឆ្លងរាលដាលដល់ «តំបន់ភាគកណ្ដាល» នៅក្នុងប្រទេស ដែលតំបន់នេះហាក់ដូចជាមិនងាយឆ្លងជំងឺកូវីដ១៩ នៅពេលដែលតំបន់ភាគឦសាន ភាគខាងត្បូង និងភាគខាងលិចមានការឆ្លងរាតត្បាតខ្លាំងកាលពីដើមឆ្នាំនេះ។ ឥឡូវនេះ រដ្ឋ North Dakota រដ្ឋ South Dakota រដ្ឋ Iowa និងរដ្ឋ Wisconsin បានរងគ្រោះខ្លាំងពីជំងឺកូវីដ១៩ នេះ។
ចំណែកឯសហភាពអឺរ៉ុបឯណោះវិញ កំពុងជួបប្រទះនូវរលកថ្មីនៃការឆ្លងជំងឺកូវីដ១៩ ដែលបណ្ដាលឲ្យរដ្ឋាភិបាលមួយចំនួននៅទូទាំងទ្វីបនេះ ដាក់ការរឹតត្បិតជាថ្មីទៅលើពលរដ្ឋ និងអាជីវកម្មនានា។
នៅទូទាំងពិភពលោក មានករណីឆ្លងជំងឺកូវីដ១៩ សរុបជិត ៣៣ លានករណី។ សហរដ្ឋអាមេរិកមានករណីឆ្លងចំនួនជាង ៧ លានករណី ហើយឥណ្ឌាមានករណីឆ្លងជិត ៦ លានករណី។ ចំណែកឯប្រេស៊ីលវិញ មានករណីឆ្លងជិត ៥ លានករណី៕