ស.រ.អាបានដាក់ទណ្ឌកម្មថ្មីៗទាក់ទិនជាមួយនឹងកម្មវិធីកាំជ្រួចមីស៊ីលរយៈចម្ងាយវែងរបស់ប្រទេសអ៊ីរ៉ង់ នេះបើតាមសេចក្តីប្រកាសរបស់ក្រសួងហិរញ្ញវត្ថុស.រ.អាកាលពីថ្ងៃអាទិត្យ តែប៉ុន្មានម៉ោងបន្ទាប់ពីមានការបញ្ជាក់ថាជនជាតិអាមេរិកាំងមួយចំនួន ដែលបានជាប់ឃុំឃាំងនៅក្នុងប្រទេសអ៊ីរ៉ង់បានត្រូវដោះលែង ហើយកំពុងធ្វើដំណើរទៅកាន់ទ្វីបអឺរ៉ុប។
ស.រ.អានឹងដាក់ទណ្ឌកម្មលើពលរដ្ឋអ៊ីរ៉ង់ប្រាំនាក់ និងបណ្តាញមួយនៃក្រុមហ៊ុនមួយដែលមានមូលដ្ឋានក្នុងប្រទេសអារ៉ាប់រួម និងចិន នៅពេលមានការចោទប្រកាន់ថា ពលរដ្ឋ និងក្រុមហ៊ុននោះបានគាំទ្រកម្មវិធីកាំជ្រួចមីស៊ីលរយៈចម្ងាយវែងរបស់អ៊ីរ៉ង់។
រដ្ឋបាលលោកអូបាម៉ាបានស្ងប់ស្ងាត់ជាច្រើនខែមកហើយក្នុងការឆ្លើយតបជាសាធារណៈទៅនឹងការធ្វើតេស្តបាញ់កាំជ្រួចមីស៊ីលលរយៈចម្ងាយវែងពីរដោយរដ្ឋាភិបាលក្រុងតេរ៉ង់កាលពីចុងឆ្នាំ២០១៥ ដែលរំលោភលើសេចក្តីសម្រេចចិត្តរបស់ក្រុមប្រឹក្សាសន្តិសុខអ.ស.ប។ ការធ្វើតេស្តបាញ់កាំជ្រួចមីស៊ីលរយៈចម្ងាយវែងទាំងនេះបាននាំឲ្យសមាជិកសភាស.រ.អាអំពាវនាវឲ្យមានការដាក់ទណ្ឌកម្មថែមទៀតលើរដ្ឋាភិបាលក្រុងតេរ៉ង់។
សេចក្តីប្រកាសដោយក្រសួងហិរញ្ញវត្ថុស.រ.អាត្រូវបានធ្វើឡើងមួយថ្ងៃ បន្ទាប់ពីស.រ.អាបានយល់ព្រមលុបចោលការដាក់ទណ្ឌកម្ម ដែលមានទាក់ទិននឹងកម្មវិធីបរមាណូរបស់អ៊ីរ៉ង់តាមរយៈកិច្ចព្រមព្រៀងពហុជាតិមួយ ដែលត្រូវបានសម្រេចកាលពីខែកក្កដា៕