ផ្នែកផ្សាយជាភាសាកូរ៉េនៃវីអូអេបានរាយការណ៍ថា ក្រុមចម្រុះសេរីភាពកូរ៉េខាងជើងដែលភាសាអង់គ្លេសហៅថា North Korea Freedom Coalition ដែលជាក្រុមមួយមានមូលដ្ឋានក្នុងរដ្ឋធានីវ៉ាស៊ីនតោន គាំទ្រឱ្យមានសិទ្ធិមនុស្សនៅក្នុងប្រទេសកូរ៉េខាងជើងនោះ កំពុងធ្វើយុទ្ធនាការមួយមានរយៈពេលមួយសប្តាហ៍នៅរដ្ឋធានីវ៉ាស៊ីនតោន ក្នុងអាទិត្យនេះដើម្បីបង្កើនការដឹងឮអំពីស្ថានភាពសិទ្ធិមនុស្សក្នុងប្រទេសកូរ៉េខាងជើង។
ក្រុមអ្នកតំណាងនៃក្រុមជនរត់ចោលជួរពីកូរ៉េខាងជើងនៅក្នុងប្រទេសកូរ៉េខាងត្បូងបានចូលរួមក្នុងយុទ្ធនាការនេះដោយចូលរួមក្នុងព្រឹត្តិការណ៍និងការប្រជុំមួយចំនួន។
អ្នកស្រី Suzanne Scholte ប្រធានអង្គការ NKFC ដែលបានដឹកនាំយុទ្ធនាការនេះ១០ឆ្នាំមកហើយ បាននិយាយយោងដល់ការផ្តល់ព័ត៌មានទៅកូរ៉េខាងជើងថា ជាឧទាហរណ៍មួយនៃជោគជ័យរបស់យុទ្ធនាការនេះ។ អ្នកស្រីបាននិយាយថា៖ «អ្វីដែលជាមានសារៈសំខាន់បំផុតប្រហែលជាការហូរព័ត៌មានទៅក្នុងប្រទេសកូរ៉េខាងជើង»៕