សេតវិមានកាលពីថ្ងៃអាទិត្យបានធ្វើការយ៉ាងលម្អិតជាមួយក្រុមមន្ត្រីជាន់ខ្ពស់នៃក្រុមហ៊ុនបំពង់បង្ហូរប្រេងអាមេរិក Colonial Pipeline ដើម្បីជួយស្តារប្រព័ន្ធនេះឡើងវិញក្រោយការវាយប្រហារតាមប្រព័ន្ធកុំព្យូទ័រ ដើម្បីទារប្រាក់លោះ ដែលនេះបានបង្ខំឲ្យក្រុមហ៊ុនផ្អាកការផ្គត់ផ្គង់ឥន្ធនៈដល់បណ្តារដ្ឋមួយចំនួននៅភាគខាងកើតសហរដ្ឋអាមេរិក ដែលមានប្រជាជនដ៏ច្រើនរស់នៅនោះ។
នេះជាការវាយប្រហារតាមប្រព័ន្ធឌីជីថលដើម្បីទាមទារប្រាក់លោះដ៏ធ្ងន់ធ្ងរបំផុតមួយ ដែលត្រូវបានរាយការណ៍ ហើយដែលបណ្តាលឲ្យមានការអំពាវនាវពីក្រុមសមាជិកសភាអាមេរិកឲ្យពង្រឹងការការពារហេដ្ឋារចនាសម្ព័ន្ធថាមពលអាមេរិកពីការចូលវាយប្រហារក្នុងពេលអនាគត។
រដ្ឋមន្ត្រីក្រសួងពាណិជ្ជកម្មអាមេរិកអ្នកស្រី Gina Raimondo លើកឡើងថា ការជួសជុលនូវបំពង់បង្ហូរប្រេងនោះ ជាការងារអាទិភាពមួយរបស់រដ្ឋបាលលោក Biden ហើយរដ្ឋាភិបាលអាមេរិកកំពុងធ្វើការងារនេះ ដើម្បីជៀសវាងការរាំងស្ទះដល់ការផ្គត់ផ្គង់ប្រេងឧស្ម័ន ដោយជួយដល់ក្រុមហ៊ុនថាមពល Colonial ឲ្យដំណើរការវិញបានឆាប់រហ័សនូវបណ្តាញបំពង់ផ្គត់ផ្គង់ប្រេងសាំងរបស់ខ្លួនប្រវែងជាង ៨.៨០០គីឡូម៉ែត្រ ដែលរត់ឆ្លងកាត់ពីរដ្ឋ Texas រហូតដល់រដ្ឋ New Jersey នោះ។
ក្រុមហ៊ុន Colonial បាននិយាយកាលពីថ្ងៃអាទិត្យថា បំពង់បង្ហូរប្រេងមេរបស់ខ្លួននៅតែពុំទាន់ដំណើរការឡើងវិញ ប៉ុន្តែបំពង់តូចៗដែលរត់ឆ្លងកាត់រវាងបណ្តាញធំនិងចំណុចចែកចាយបានបើកដំណើរការឡើងវិញហើយ។ គេមិនទាន់ដឹងថាពេលណា បំពង់បង្ហូរប្រេងសាំងរបស់ក្រុមហ៊ុន Colonial នឹងដំណើរការឡើងវិញទាំងស្រុងនោះទេ។
ព្រឹត្តិការណ៍នេះបានធ្វើឱ្យតម្លៃផ្សារភាគហ៊ុនប្រេងសាំងនៅអាមេរិកកើនតម្លៃជាង៣% រហូតដល់ ២ដុល្លារ២១សេន ក្នុងមួយហ្កាឡុងឬស្មើប្រមាណជិត៤លីត្រ ដែលជាតម្លៃខ្ពស់បំផុតចាប់តាំងពីខែឧសភា ឆ្នាំ២០១៨មក៕