អ្នកនយោបាយភាគច្រើនចូលចិត្តឈរបង្ហាញស្នាមញញឹមនៅពីមុខគម្រោងសាធារណ:នានាប្រកបដោយមោទនភាព ប៉ុន្តែលោកប្រធានាធិបតី Joe Biden បានធ្វើផ្ទុយពីនេះ កាលពីថ្ងៃព្រហស្បតិ៍ម្សិលមិញ ដោយយកឱកាសថតរូបនៅពីមុខស្ពានចំណាស់ដែលមិនសូវមានការថែទាំល្អ ហើយបន្ទាប់មកធ្វើទស្សនកិច្ចនៅរោងចក្រផលិតទឹកស្អាតចាស់ទ្រុឌទ្រោមមួយកន្លែង ដោយមានកាមេរ៉ាតាមថតជាប់ជានិច្ច។
លោក Biden ថ្លែងនៅក្នុងទីក្រុង Lake Charles រដ្ឋ Louisiana បន្ទាប់ពីលោកត្រូវបានស្វាគមន៍ដោយអភិបាលក្រុងមកពីគណបក្សសាធារណរដ្ឋថា៖ «យើងកំពុងឈរដោយមានស្ពាន I-10 ដែលស្ថិតនៅពីក្រោយយើង ដែលខ្ញុំធ្លាប់ឆ្លងកាត់ជាច្រើនដងកាលពីអតីតកាល។ ហើយវាជាឧទាហរណ៍មួយដែលបង្ហាញឲ្យយើងឃើញថា ក្នុងនាមប្រទេសជាតិទំាងមូល យើងខកខានមិនបានវិនិយោគលើអនាគតនៃសេដ្ឋកិច្ចរបស់យើង និងអនាគតនៃប្រជាពលរដ្ឋរបស់យើង»។
លោក Biden បានស្នើឲ្យមានការចំណាយទឹកប្រាក់ចំនួន ២,៣ លានលានដុល្លារ ទៅលើហេដ្ឋារចនាសម្ព័ន្ធ និងឱកាសការងារទូទាំងប្រទេស។ ផ្នែកមួយនៃដំណើរទស្សនកិច្ចរបស់លោក ជាការប្រឈមមុខជាមួយនឹងប្រតិភូសភាពីរដ្ឋ Louisiana ដែលបច្ចុប្បន្ននេះសុទ្ធសឹងតែជាសមាជិករបស់គណបក្សសាធារណរដ្ឋ។ ប៉ុន្តែការណ៍នេះនឹងផ្លាស់ប្តូរ នៅពេលលោក Troy Carter សភាជិករដ្ឋសភាដែលទើបជាប់ឆ្នោតពីគណបក្សប្រជាធិបតេយ្យ ទទួលតំណែងនៅក្នុងរដ្ឋសភា នៅថ្ងៃទី ១១ ខែឧសភា ខាងមុខ។
គណបក្សសាធារណរដ្ឋទទូចឱ្យចំណាយតិចជាងអ្វីដែលលោក Biden បានស្នើឡើង គឺត្រឹមតែលើហេដ្ឋារចនាសម្ព័ន្ធ ដូចជាការជួសជុលផ្លូវ និងស្ពាន ធ្វើទំនើបកម្មរថយន្តនិងរថភ្លើងក្រុង និងពង្រីកការប្រើប្រាស់អ៊ីនធឺណិត ដោយទាមទារមិនឲ្យមានការចំណាយថវិកាលើថាមពលកកើតឡើងវិញ និងការថែទំាមនុស្សចាស់ឡើយ។
លោក Steve Scalise តំណាងរាស្ត្រគណបក្សសាធារណរដ្ឋពីរដ្ឋ Louisiana បាននិយាយថា ផែនការការងាររបស់លោក Biden គឺជា «ការដំឡើងពន្ធហួសហេតុដែលបន្លំថាជាគម្រោងហេដ្ឋារចនាសម្ព័ន្ធ» វិញ។
លោកថា៖ «ការដំឡើងពន្ធដែលបង្ខំឲ្យការងាររបស់ពលរដ្ឋជីវភាពមធ្យម ត្រូវបញ្ជូនទៅបរទេស គឺមិនមែនជាហេដ្ឋារចនាសម្ព័ន្ធនោះទេ»។
អតីតប្រធាធិបតី Donald Trump បានយកឈ្នះលោក Biden នៅក្នុងរដ្ឋនេះជិត ២០% នៅក្នុងការបោះឆ្នោតជ្រើសរើសប្រធានាធិបតីកាលពីឆ្នាំ ២០២០។
អ្នកស្រី Karine Jean-Pierre អ្នកនាំពាក្យស្ដីទីប្រចាំសេតវិមាន បានប្រាប់អ្នកសារព័ត៌មាននៅលើយន្តហោះ Air Force One ក្នុងអំឡុងការហោះហើរទៅកាន់រដ្ឋ Louisiana ថា៖ «ទោះបីជាចាញ់នៅរដ្ឋ Louisiana ក៏ដោយ ក៏លោក Biden ជាប្រធានាធិបតីរបស់អ្នករាល់គ្នា»៕
