ជាលើកទីមួយហើយដែលសហរដ្ឋអាមេរិកចាត់ទុកផ្នែកមួយនៃរដ្ឋាភិបាលជាអង្គការភេរវកម្ម ដែលសំដៅលើកងកម្លាំងការពារបដិវត្តន៍របស់អ៊ីរ៉ង់ ឬ IRGC ដែលជាអង្គការសន្តិសុខដ៏មានអំណាចបំផុតរបស់សាធារណរដ្ឋឥស្លាម។
ប្រធានាធិបតីសហរដ្ឋអាមេរិកលោក ដូណាល់ ត្រាំ បានប្រកាសនៅក្នុងសេចក្តីថ្លែងការណ៍ថា «វិធានការមិនធ្លាប់មានកាលពីពេលមុនដែលដឹកនាំដោយក្រសួងការបរទេស ទទួលស្គាល់ការពិតថា អ៊ីរ៉ង់មិនត្រឹមតែជារដ្ឋគាំទ្រភេរវកម្មប៉ុណ្ណោះទេ ក៏ប៉ុន្តែ កងកម្លាំងការពារបដិវត្តន៍របស់អ៊ីរ៉ង់ ឬ IRGC ចូលរួមយ៉ាងសកម្មក្នុងផ្នែកហិរញ្ញវត្ថុ និងផ្សព្វផ្សាយភេរវកម្មដែលជាឧបករណ៍ និងល្បិចកលខាងនយោបាយមួយ។
កងកម្លាំងការពារបដិវត្តន៍របស់អ៊ីរ៉ង់ជាមធ្យោបាយដ៏សំខាន់មួយរបស់រដ្ឋាភិបាលអ៊ីរ៉ង់នៃការបញ្ជា និងប្រតិបត្តិយុទ្ធនាការភេរវកម្មសាកល»។ ចំណាត់ការរបស់សហរដ្ឋអាមេរិកដែលចូលជាធរមានក្នុងរយៈពេលមួយសប្តាហ៍ និងរួមបញ្ចូលទាំងកងកម្លាំងភ្នាក់ងារសម្ងាត់ Quds របស់កងកម្លាំងការពារបដិវត្តន៍របស់អ៊ីរ៉ង់ មានន័យថា វានឹងក្លាយជាឧក្រិដ្ឋកម្មសហព័ន្ធក្នុងការផ្តល់ការគាំទ្រដល់កងកម្លាំងការពារបដិវត្តន៍របស់អ៊ីរ៉ង់នោះ។
យោងតាមសេចក្តីថ្លែងការណ៍របស់ប្រធានាធិបតីត្រាំ ប្រាប់ឲ្យដឹងថា ចំណាត់ការនេះធ្វើការបញ្ជាក់យ៉ាងច្បាស់ពីភាពគ្រោះថ្នាក់នៃការធ្វើពាណិជ្ជកម្មឬផ្តល់ការគាំទ្រដល់ កងកម្លាំងការពារបដិវត្តន៍របស់អ៊ីរ៉ង់។ «ប្រសិនបើ អ្នកធ្វើពាណិជ្ជកម្មជាមួយកងកម្លាំងការពារបដិវត្តន៍របស់អ៊ីរ៉ង់ អ្នកនឹងផ្តល់ថវិកាដល់ភេរវជនហើយ»។
ប៉ុន្មាននាទីបន្ទាប់ពីការប្រកាសពីសេតវិមានមក រដ្ឋមន្ត្រីការបរទេសសហរដ្ឋអាមេរិក លោក Mike Pompeo បានធ្វើការថ្លែងលម្អិតនៅឯក្រសួងការបរទេសអាមេរិកថា កងកម្លាំងការពារបដិវត្តន៍របស់អ៊ីរ៉ង់រៀបចំចាត់ចែង និងអនុវត្តយុទ្ធនាការភេរវកម្មនៅជុំវិញពិភពលោក៕