ក្នុងដំណើរបំពេញទស្សនកិច្ចលើកទី១របស់លោកទៅកាន់ប្រទេសកូរ៉េខាងត្បូង និងជប៉ុននៅសប្តាហ៍នេះ រដ្ឋមន្រ្តីការពារជាតិរបស់សហរដ្ឋអាមេរិក លោក James Mattis ត្រូវគេរំពឹងថា នឹងធ្វើការបញ្ជាក់ឡើងវិញប្រាប់សម្ព័ន្ធមិត្តដែលមានការភ័យខ្លាចនឹងការរិះគន់របស់ប្រធានាធិបតីសហរដ្ឋអាមេរិក ដូណាល់ ត្រាំ ដែលថា «ប្រទេសជិះសេះលែងដៃ» មួយចំនួនមិនបានបង់ប្រាក់ឲ្យបានត្រឹមត្រូវតាមតម្លៃការពារប្រទេសរួមគ្នា។
លោក Daniel Pinkston អ្នកវិភាគខាងសន្តិសុខក្នុងតំបន់នៅសាកលវិទ្យាល័យ Troy ក្នុងទីក្រុងសេអ៊ូលនៃប្រទេសកូរ៉េខាងត្បូងនិយាយថា «ខ្ញុំគិតថា ភាពមិនប្រាកដប្រជាបានត្រូវគេមើលឃើញថា កំពុងធ្វើឲ្យមានអស្ថិរភាព ឬកំពុងធ្វើឲ្យមានអស្ថិរភាពយ៉ាងខ្លាំង។ ខ្ញុំគិតថា ដៃគូសម្ព័ន្ធមិត្តមួយចំនួននៅក្នុងតំបន់កំពុងចោទសួរអំពីភាពដែលគួរឲ្យទុកចិត្តបាននៃបេ្តជ្ញាចិត្តចំពោះសម្ព័ន្ធមិត្តរបស់សហរដ្ឋអាមេរិក»។
ក្រសួងការពារជាតិរបស់សហរដ្ឋអាមេរិកប្រាប់ឲ្យដឹងថា ការសម្រេចចិត្តរបស់លោករដ្ឋមន្រ្តីការពារប្រទេសយកតំបន់អាស៊ីខាងកើតជាទិសដៅទីមួយនៃដំណើរទស្សនកិច្ចរបស់លោក មានន័យថា ជាការពង្រឹងនូវការតាំងចិត្តដ៏យូរអង្វែងរបស់សហរដ្ឋអាមេរិកដើម្បីការពារសម្ព័ន្ធមិត្តរបស់ខ្លួនប្រឆាំងការគំរាមកំហែងអាវុធនុយក្លេអ៊ែរនិងកាំជ្រួចមីស៊ីលជឿនលឿនរបស់កូរ៉េខាងជើង។
លោករដ្ឋមន្រ្តីការពារជាតិបាននិយាយតាមទូរស័ព្ទរួចហើយជាមួយលោក Han Minkoo រដ្ឋមន្រ្តីការពារជាតិរបស់កូរ៉េខាងត្បូងកាលពីថ្ងៃអង្គារ។ មានសេចក្តីរាយការណ៍ថា លោករដ្ឋមន្រ្តី Mattis បានបញ្ជាក់ឡើងវិញពីកាតព្វកិច្ចរបស់សហរដ្ឋអាមេរិកដើម្បីអនុវត្តសន្ធិសញ្ញាការពារគ្នាទៅវិញទៅមកដែលនឹងរួមមានការផ្តល់ការធានាថា កងទ័ពអាមេរិកនឹងជួយទប់ទល់ការវាយប្រហាររបស់កូរ៉េខាងជើងទៅលើសម្ព័ន្ធមិត្ត៕