អ្នកគាំទ្រសិទ្ធិមានកាំភ្លើងជាតិរុស្ស៊ីម្នាក់ដែលមានចំណងទាក់ទងដ៏ជិតស្និទ្ធជាមួយសមាគមកាំភ្លើងជាតិដែលតំណាងឲ្យរុស្ស៊ីបានរងការចោទប្រកាន់កាលពីថ្ងៃចន្ទពីការឃុបឃិតជ្រៀតចូលអង្គការនយោបាយសហរដ្ឋអាមេរិកដែលជាផ្នែកមួយនៃកិច្ចប្រតិបត្តិការដ៏មានឥទ្ធិពលរបស់រដ្ឋាភិបាលក្រុងមូស្គូក្នុងសហរដ្ឋអាមេរិក។
អ្នកស្រី Maria Bitina អាយុ២៩ឆ្នាំដែលគណនីប្រព័ន្ធ Twitter ពណ៌នាអ្នកស្រីថាជាអ្នកបង្កើតនិងជាសមាជិកក្រុមប្រឹក្សាភិបាលរបស់អង្គការសិទ្ធិមានកាំភ្លើង ឬ «Right to Bear Arms» ហើយបានធ្វើការជាអ្នកជំនួយការពិសេសឲ្យមន្ត្រីជាន់ខ្ពស់រដ្ឋាភិបាលរុស្ស៊ី បានត្រូវចាប់ខ្លួនកាលពីថ្ងៃអាទិត្យដោយការិយាល័យស៊ើបអង្កេតសហព័ន្ធ FBI នៅក្នុងរដ្ឋធានីវ៉ាស៊ីនតោន។
អ្នកស្រី Butina បានបង្ហាញខ្លួនក្នុងតុលាការសហព័ន្ធកាលពីរសៀលថ្ងៃចន្ទដើម្បីប្រឈមការចោទប្រកាន់ពីការរួមគំនិតធ្វើជាភ្នាក់ងាររបស់រដ្ឋាភិបាលរុស្ស៊ីនៅក្នុងសហរដ្ឋអាមេរិកដោយមិនមានការផ្តល់ព័ត៌មានជូនរដ្ឋមន្ត្រីក្រសួងយុត្តិធម៌។ ចៅក្រមបានបញ្ជាឲ្យឃុំខ្លួនអ្នកស្រី រងចាំសវនាការនៅថ្ងៃពុធ។
សំបុត្រភស្តុតាងរបស់ការិយាល័យស៊ើបអង្កេតសហព័ន្ធ FBI ពណ៌នា Butina ជាភ្នាក់ងារលាក់មុខរបស់រុស្ស៊ីដែលបានទៅសហរដ្ឋអាមេរិកជាច្រើនលើកមុនពេលចូលសហរដ្ឋអាមេរិកដោយប្រើប្រភេទទិដ្ឋាការនិស្សិតនៅខែសីហា ឆ្នាំ២០១៦ហើយបានរស់នៅក្នុងរដ្ឋធានីវ៉ាស៊ីនតោន។
សំបុត្រភស្តុតាងនោះមិនបាននិយាយឈ្មោះមន្ត្រីរុស្ស៊ីដែលអ្នកស្រីបានធ្វើការឲ្យទេ ក៏ប៉ុន្តែការពណ៌នារបស់សំបុត្រភស្តុតាងនោះទៅនឹងស្រដៀងទៅនឹង Alexander Torshin អភិបាលរងធនាគារកណ្តាលរុស្ស៊ីនិងជាអតីតសមាជិកព្រឹទ្ធសភាក្នុងគណបក្សសហភាពរុស្ស៊ីរបស់ប្រធានាធិបតីរុស្ស៊ី Vladimir Putin។ លោក Robert Driscoll មេធាវីរបស់អ្នកស្រី Butina បានចេញថ្លែងការណ៍បដិសេធថា «អ្នកស្រីមិនមែនជាភ្នាក់ងាររបស់សហព័ន្ធរុស្ស៊ីទេ»។ លោកបានពណ៌នាអ្នកស្រីថាជាពលរដ្ឋរុស្ស៊ីនៅក្នុងសហរដ្ឋអាមេរិកដោយប្រើទិដ្ឋាការនិស្សិត៕