មនុស្សរាប់សែននាក់បានដើរដង្ហែរនៅតាមទីក្រុងនានានៅទូទាំងសហរដ្ឋអាមេរិក កាលពីថ្ងៃសៅរ៍ដើម្បីទាមទារឱ្យមានការផ្លាស់ប្តូរគោលនយោបាយអំពីកាំភ្លើង ហើយភាគច្រើននៃពួកគេបានមករដ្ឋធានៅវ៉ាស៊ីនតោនដើម្បីចូលរួមយុទ្ធនាការឈ្មោះថា March for Our Lives ក្បួនដង្ហែដើម្បីជីវិតរបស់យើង ហើយនេះជាព្រឹត្តិការណ៍ដែលរៀបចំដោយសកម្មជនវ័យក្មេង បន្ទាប់ពីមានការបាញ់ប្រហារនៅវិទ្យាល័យមួយកាលពីខែកុម្ភៈ នៅភាគខាងត្បូងរដ្ឋ Florida ។
វាជាចលនារបស់កូនសិស្សដើម្បីកូនសិស្សដែលបានចាប់ផ្តើមឡើង បន្ទាប់ពីខ្មាន់កាំភ្លើងម្នាក់បានបាញ់សម្លាប់មនុស្ស១៧នាក់នៅឯវិទ្យាល័យ Marjory Stoneman Douglas នៅ Parkland រដ្ឋ Florida នៅថ្ងៃបុណ្យនៃក្តីស្រឡាញ់ Valentine's Day ។
នៅទូទាំងសហរដ្ឋអាមេរិក សិស្ស និស្សិត ឪពុកម្តាយ លោកគ្រូអ្នកគ្រូនិងសកម្មជនដទៃទៀត បានដើរតាមផ្លូវដើម្បីទាមទារឱ្យអ្នកធ្វើគោលនយោបាយអនុវត្តវិធានការគ្រប់គ្រងកាំភ្លើងឲ្យបានតឹងរ៉ឹងឡើង។
នាង CHRISTINE GONZALEZ និយាយថា សាលារៀននៅរដ្ឋ Florida គឺកន្លែងដែលមានការបាញ់ប្រហារនោះ មានស្ថានភាពភូមិសាស្ត្រ និងស្ថានភាពសេដ្ឋកិច្ចស្រដៀងគ្នានឹងទីក្រុងដែលនាងរស់នៅ។ នាងឃើញអ្វីដែលកើតមានឡើងនៅទីក្រុងស្រដៀងកន្លែងនាងរស់នៅយ៉ាងនេះគឺកាន់តែធ្វើឲ្យនាងខ្លាចណាស់ក្នុងនាមជាសិស្ស ។ អ្នកដឹកនាំក្រុមអ្នកតវ៉ាបានជំរុុញឲ្យសមាជិករបស់ខ្លួនគិតពីអំពើហិង្សាដោយកាំភ្លើង តាមទស្សនៈផ្សេងៗគ្នា៕
