សំឡេងគ្រាប់កាំភ្លើងលាន់ឮយ៉ាងទ្រហឹងបាញ់ចេញពីនាវាអាមេរិកនៅក្នុងលំហាត់យោធារួមគ្នានៃកងទ័ពជើងទឹកកម្ពុជា និងកងទ័ពជើងទឹកសហរដ្ឋអាមេរិកនៅលើផ្ទៃសមុទ្ររាមនៃខេត្តព្រះសីហនុ។
នេះគឺជាលំហាត់យោធារួមគ្នាលើកទី៥ ដែលបានដំណើរការរយៈពេលបីថ្ងៃនិងបានបញ្ចប់កាលពីថ្ងៃសៅរ៍សប្តាហ៍មុននេះ។ កងម៉ារីនសហរដ្ឋអាមេរិកនិងកងម៉ារីនកម្ពុជាសរុបចំនួន៦០០នាក់បានប្តូរវេណគ្នាជាក្រុមតូចៗដើម្បីធ្វើបន្លាស់ទីទៅមករវាងនាវាចម្បាំងប្រភេទ Destroyer USS Mustin របស់កងទ័ពសហរដ្ឋអាមេរិកនិងនាវាល្បាតកម្ពុជាចំនួនពីរគ្រឿងដែលជាជំនួយពីប្រទេសចិន។
កងម៉ារីនកម្ពុជានិងអាមេរិកកំពុងសម្រាកនៅលើកប៉ាល់ Destroyer USS Mustin
ការផ្លាស់ទីដែលបូកផ្សំនឹងការបង្រៀនពីកងទ័ពអាមេរិកអំពីការគ្រប់គ្រងនាវា ការឆែកគ្រឿងចក្រ អំពីលក្ខណៈប្រយុទ្ធលើផ្ទៃទឹក និងការឡោមព័ទ្ធ រួមទាំងការជួយសង្គ្រោះផងដែរ។
លោកវរនាវីឯកអ៊ិនសុ ខេមរា មេបញ្ជាការកងនាវាល្បាតលេខ៦នៃកងនាវាចរណ៍ខេមរភូមិន្ទ មានប្រសាសន៍ក្នុងអំឡុងនៃការធ្វើសមយុទ្ធថា កងនាវាកម្ពុជាបានរៀនសូត្រច្រើនពីចំណេះដឹង និងបច្ចេកទេសសំខាន់ៗពីការធ្វើសមយុទ្ធជាមួយកងនាវាសហរដ្ឋអាមេរិក។
លោកបន្តថា កងនាវាកម្ពុជានៅជួបបញ្ហាកង្វះខាតសម្ភារៈ ក៏ប៉ុន្តែកងនាវាកម្ពុជាមានការតាំងចិត្តនិងមានសមត្ថភាពគ្រប់គ្រាន់។
ឧទ្ធម្ភាគចក្រសរអានៅលើកប៉ាល់ Destroyer USS Mustin
«វាជាកាតព្វកិច្ចមួយចាំបាច់សម្រាប់កងទ័ពជំនាញ ដោយឡែកកងទ័ពជើងទឹកហ្នឹងត្រូវតែពង្រឹងនិងហ្វឹកហាត់ជានិច្ចដើម្បីពង្រឹងសមត្ថភាពដល់ពលនាវឹកដើម្បីឲ្យមានការរីកចម្រើនដល់កងទ័ពជើងទឹកយើងហ្នឹង។ ផលប្រយោជន៍ពីសមយុទ្ធនេះពិតជាបានជោគជ័យ»។
លោកវរនាវីឯក Fred Kacher មេបញ្ជាការនៃកងនាវាពិឃាដក្រុមលេខ៧របស់អាមេរិកថ្លែងថា លំហាត់សមយុទ្ធប្រតិបត្តិការត្រៀមជាស្រេចលើផ្ទៃទឹក CARAT ឆ្នាំ២០១៤នេះគឺជាផ្នែកមួយជួយឲ្យកងនាវានៃរបស់កម្ពុជា និងសហរដ្ឋអាមេរិកអាចធ្វើការជាមួយគ្នាដើម្បីដោះដូរចំណេះដឹងនិងបទពិសោធន៍ និងដើម្បីបង្កើនកិច្ចសហប្រតិបត្តិការរវាងប្រទេសទាំងពីរក្នុងការកិច្ចថែរក្សាសន្តិសុខលើផ្ទៃសមុទ្រក្នុងតំបន់។
លោកបន្ថែមថា កងនាវាសហរដ្ឋអាមេរិកក៏បានរៀនសូត្រពីកងនាវាកម្ពុជាដែរ។
«លំហាត់សមយុទ្ធស្ដីពីប្រតិបត្តិការត្រៀមជាស្រេចលើផ្ទៃទឹក (CARAT) ២០១៤គឺជារបៀបដំបូងបំផុតដែលយើងធ្វើការដើម្បីបង្កើតកិច្ចសហប្រតិបត្តិការជាមួយកងនាវាចរណ៍កម្ពុជា។ យើងពិតជាមានមោទនភាពដែលបានមកធ្វើការជាមួយកងនាវាកម្ពុជា។ ខ្ញុំគិតថា ភាគីអាមេរិកនិងកម្ពុជាបានទទួលផលចំណេញពីលំហាត់នេះ»។
នាវាចម្បាំងអាមេរិក Destroyer USS Mustinមានប្រវែងជាង១៥៥ម៉ែត្រគឺជានាវាដែលប្រចាំការនៅប្រទេសជប៉ុន។ នាវានេះបំពាក់ដោយគ្រឿងសព្វាវុធ គ្រាប់មីស៊ីល ឧត្ថម្ភាគចក្រ។ ដោយឡែកនាវាល្បាតកម្ពុជាជាប្រភេទនាវាតូចៗ និងមានប្រវែងខ្លី និងបំពាក់ដោយអាវុធធុនស្រាល។ កងនាវានៃប្រទេសទាំងពីរបានបាញ់គ្រាប់ពិតចេញពីនាវារៀងៗខ្លួនទៅលើផ្ទាំងស៊ីបនៅកណ្តាលលំហសមុទ្រ។
នៅពេលព្រឹកស្រាងៗ កងនាវិកអាមេរិកដែលមានឯកសណ្ឋានផ្សេងៗត្រូវប្រកាសឲ្យចេញពីបន្ទប់ស្នាក់នៅដើម្បីឆ្ពោះទៅកាន់ប៉មប្រចាំការរៀងៗខ្លួន។
ឧទ្ធម្ភាគចក្រចាប់ផ្តើមប្រតិបត្តិការមុននឹងកងនាវិកនៃប្រទេសទាំងពីធ្វើលំហាត់រួមគ្នា។
មុនការបើកសមយុទ្ធលើសមុទ្រនេះ កងម៉ារីនសហរដ្ឋអាមេរិកបានបើកវគ្គបណ្ដុះបណ្ដាលខ្លីមួយនៅលើដីគោកអំពីការបើកបរលើទឹក អំពីការថែរក្សាអ្នករបួសនៅក្នុងការប្រយុទ្ធ អំពីការចុះឆែកឆេរ និងត្រួតពិនិត្យលើកប៉ាល់នៅតាមកំពង់ផែ។
នេះជាឆ្នាំ២០ហើយនៃការធ្វើលំហាត់សមយុទ្ធលើផ្ទៃទឹក (CARAT)រវាងកងនាវាម៉ារីនរបស់សហរដ្ឋអាមេរិក និងបណ្ដាប្រទេសជាដៃគូចំនួន៩ទៀតនៅក្នុងតំបន់អាស៊ីខាងត្បូងនិងអាស៊ីអាគ្នេយ៍។ ដោយឡែកកងនាវាកម្ពុជាបានចូលរួមក្នុងលំហាត់សមយុទ្ធនេះជាមួយសហរដ្ឋអាមេរិកចាប់តាំងពីឆ្នាំ២០១០មកម្ល៉េះ។
លោក Anthony Rush កងនាវាចរណ៍របស់សហរដ្ឋអាមេរិកមួយរូបថ្លែងថាលោកបានឃើញពីការខិតខំប្រឹងប្រែងរបស់កងនាវាចរណ៍កម្ពុជាក្នុងពេលលំហាត់។
«កាលពីម្សិលមិញ អំឡុងពេលដែលយើងកំពុងហ្វឹកហាត់បច្ចេកទេសនៃការជម្លៀសអ្នករបួសដែលជាប់ក្នុងកប៉ាល់ កងនាវាអាមេរិកប្រើប្រាស់ការទំនាក់ទំនងដោយសំឡេងច្រើន ខណៈពេលដែលកងនាវាកម្ពុជាវិញបានប្រើប្រាស់កាយវិការ។ ជារឿងថ្មីសម្រាប់យើង ហើយខ្ញុំក៏បានរៀនអ្វីថ្មីខ្លះដែរពីពួកគេ»។
លោកថា លោកបានចែករំលែកបទពិសោធន៍អំពីរបៀបបញ្ជា និងបាញ់កាំភ្លើងដល់កងនាវាកម្ពុជា និងយល់ដឹងពីរបៀបទំនាក់ទំនងគ្នាដោយប្រើភាសាកាយវិការពីកងនាវាកម្ពុជាមកវិញផងដែរ។
លោកឧត្តមសេនីយ៍ទៀ វិន មេបញ្ជាការនៃកងនាវាចរណ៍កម្ពុជា បានថ្លែងប្រាប់ក្រុមអ្នកយកព័ត៌មានដែរថា សមយុទ្ធយោធាលើផ្ទៃទឹកនេះធ្វើឡើងក្នុងគោលដៅដើម្បីជួបពង្រឹងកិច្ចសហប្រតិបត្តិការទ្វេភាគី ក៏ដូចជាថ្នាក់តំបន់រវាងកម្ពុជា និងសហរដ្ឋអាមេរិក។
លោកវរនាវីឯក Fred Kacher ថ្លែងថា សម្រាប់សមយុទ្ធនៅឆ្នាំក្រោយលោកចង់ឃើញកងនាវាកម្ពុជា និងសហរដ្ឋអាមេរិកហ្វឹកហាត់លើការងារពិបាកៗជាងសមយុទ្ធនៅឆ្នាំ២០១៤ ដើម្បីអាចពង្រឹងសមត្ថភាពរបស់កងនាវានៃប្រទេសទាំងពីរឲ្យកាន់តែប្រសើរឡើង៕