នាវាជើងទឹកស.រ.អា.មួយគ្រឿងឈ្មោះ USNSS T-ARS-50 បានចូលចតជាផ្លូវការនៅកំពុងផែក្រុងព្រះសីហនុហើយនៅថ្ងៃអង្គារនេះដើម្បីត្រៀមរៀបចំការហ្វឹកហ្វឺនជាមួយនឹងកងទ័ពជើងទឹកកម្ពុជារយៈពេលមួយសប្តាហ៍ ដែលគេដឹងថា ជាកម្មវិធីហ្វឹកហ្វឺននិងត្រៀមខ្លួនជាប្រចាំឆ្នាំនៃកិច្ចសហប្រតិបត្តិការលើផ្ទៃសមុទ្រ។ នេះបើតាមការអះអាងរបស់លោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិកម្ពុជាដែលបានថ្លែងប្រាប់វីអូអេនៅថ្ងៃនេះ។
«កម្មវិធីរបស់គេគឺមកដើម្បីបំពេញកម្មវិធីរបស់គេរឿងហ្វឹកហ្វឺនលើកទី៥ជាមួយនឹងកិច្ចការមួយចំនួនរបស់គេនៅទីនេះក្នុងកម្មវិធីហ្វឹកហ្វឺននិងត្រៀមខ្លួន ជាប្រចាំឆ្នាំនៃ កិច្ចសហប្រតិបត្តិការលើផ្ទៃសមុទ្រហៅថា ការ៉ាត (CARAT)»។
លោកបានបញ្ជាក់ថា នេះជាកិច្ចសហប្រតិបត្តិការធម្មតារវាងប្រទេសទាំងពីរ កម្ពុជានិងស.រ.អា.។
«ដូចជាអត់មានសមយុទ្ធយោធាអីធំដុំទេ គ្រាន់តែមកធ្វើកិច្ចការហ្វឹកហ្វឺនរួមគ្នាខ្លះៗតែប៉ុណ្ណោះឯង»។
លោកឧត្តមសេនីយ៍ឯកនឹម សុវ៉ាត អគ្គនាយកនៃអគ្គនាយកដ្ឋានគោលនយោបាយ និងកិច្ចការបរទេសនៃក្រសួងការពារជាតិ កម្ពុជាបានអះអាងដែរថា ការបំពេញទស្សនកិច្ចនៃក្រុមមន្ត្រីនាវាជើងទឹកស.រ.អា.គឺជាការហ្វឹកហ្វឺនកម្មវិធីការ៉ាត់តែប៉ុណ្ណោះ។ លោកពុំបានផ្តល់ការពន្យល់ជាលម្អិតទេ។
លោក Jay Raman អ្នកនាំពាក្យស្ថានទូតស.រ.អា.បញ្ជាក់ថា នាវាស.រ.អា.ឈ្មោះUSNSS T-ARS-50 បានចូលចតកំពង់ផែប្រទេសកម្ពុជាហើយ តែលោកមិនទាន់មានព័ត៌មានលម្អិតទេ។
ទោះជាយ៉ាងណាក៏ដោយ ប្រភពព័ត៌មានពីមន្ត្រីនៅក្នុងប្រទេសកម្ពុជាបាន បញ្ជាក់ថា នាវាជើងទឹកស.រ.អា.នឹងចូលចតនៅកម្ពុជារយៈពេលមួយសប្តាហ៍គឺរហូតដល់ថ្ងៃច័ន្ទសប្តាហ៍ខាងមុខ មុនពេលសម្ពោធកម្មវិធីហ្វឹកហ្វឺនប្រចាំឆ្នាំនេះ។
កម្មវិធីហ្វឹកហ្វឺននេះគឺត្រូវគេដឹងថា ផ្តោតទៅលើជំនាញសន្តិសុខលើផ្ទៃសមុទ្រ ច្បាប់ និងបម្រាមលើផ្ទៃសមុទ្រ ការជ្រមុជទឹក សកម្មភាពជួយសង្គ្រោះនិងការ ឆ្លើយតបនានាទៅនឹងគ្រោះមហន្តរាយជាដើម។
ក្រុមមន្ត្រីក៏បានអះអាងថា មន្ត្រីយោធាជាន់ខ្ពស់នៃប្រទេសទាំងពីរគ្រោងនឹងជួប ប្រជុំគ្នាផងដែរក្នុងអំឡុងពេលទស្សនកិច្ចនេះ។ កម្មវិធីកិច្ចសហប្រតិបត្តិការ ហ្វឹកហ្វឺននិងត្រៀមខ្លួនប្រចាំឆ្នាំរបស់យោធាជើងទឹកស.រ.អា.នេះត្រូវគេដឹងថា បានធ្វើនៅក្នុងប្រទេសអាស៊ានជាច្រើនទៀតដែរ៕
