ឧត្ដមសេនីយ៍កំពូលមួយរូបរបស់សហរដ្ឋអាមេរិកបានចោទប្រកាន់ប្រទេសរុស្ស៊ីថា ជាអ្នកបង្កឲ្យមានអស្ថិរភាពនៅក្នុងប្រទេសស៊ីរី និងនៅទូទាំងមហាតំបន់មជ្ឈិមបូព៌ា ដែលជាផ្នែកមួយនៃការប៉ុនប៉ងជាបន្តក្នុងការពង្រីកឥទ្ធិពលរបស់ខ្លួនដែលធ្វើឲ្យប៉ះពាល់ដល់សហរដ្ឋអាមេរិក និងសហគមន៍អន្តរជាតិ។
លោកឧត្ដមសេនីយ៍ Joseph Votel ដែលជាមេបញ្ជាការនៃទីបញ្ជាការកណ្ដាលរបស់សហរដ្ឋអាមេរិក បានប្រាប់សមាជិកសភាកាលពីថ្ងៃអង្គារម្សិលមិញថា៖ «ពាក់ព័ន្ធនឹងបញ្ហាការទូត និងយោធា រដ្ឋាភិបាលក្រុងមូស្គូដើរតួជាអ្នកបង្កអគ្គិភ័យផង និងជាអ្នកពន្លត់អគ្គិភ័យផង ដោយបង្កឲ្យមានភាពតានតឹងបន្ថែមទៀតក្នុងចំណោមភាគីជម្លោះទាំងអស់នៅក្នុងប្រទេសស៊ីរី»។
លោក Joseph Votel បានចោទប្រកាន់បន្ថែមទៀតទៅលើប្រទេសរុស្ស៊ីថា បានស្នើធ្វើជាអ្នកសម្របសម្រួលនៅក្នុងកិច្ចប្រឹងប្រែងមួយដើម្បី «បំផ្លាញ និងធ្វើឲ្យចុះខ្សោយនូវគោលជំហរចរចារបស់ភាគីនីមួយៗ»។
ការរិះគន់នេះទោះបីជាមានលក្ខណៈខ្លាំងក្លាជាងការរិះគន់កាលពីមុនក៏ដោយ គឺវាមានលក្ខណៈស្របទៅនឹងការព្រមានមួយចំនួនកាលពីលើកមុនរបស់សហរដ្ឋអាមេរិក និងមន្ត្រីស៊ើបការណ៍របស់បណ្ដាបស្ចិមប្រទេសនានាដែលថា រុស្ស៊ីចាត់ទុកប្រទេសស៊ីរីថាជាឱកាសមួយដើម្បីបញ្ជាក់ឡើងវិញអំពីឥទ្ធិពលខ្លាំងក្លារបស់ខ្លួននៅលើឆាកអន្តរជាតិ។
ការរិះគន់នេះក៏ស្របទៅនឹងក្ដីបារម្ភដែលបង្ហាញឡើងនៅក្នុងយុទ្ធសាស្ត្រសន្តិសុខជាតិសហរដ្ឋអាមេរិកកាលពីពេលថ្មីៗនេះផងដែរ ដែលហៅប្រទេសរុស្ស៊ីថាជាមហាអំណាចមួយ ដែលមានគោលបំណងឈូសចោលនូវសណ្ដាប់ធ្នាប់សាកលលោកបច្ចុប្បន្ន៕