កងកម្លាំងប្រជាធិបតេយ្យស៊ីរីបានចូលកាន់កាប់ទាំងស្រុងលើតំបន់គ្រប់គ្រងដោយក្រុមអាយស៊ីសក្នុងក្រុងម៉ាន់ប៊ិចកាលពីថ្ងៃសុក្រ។ នេះបើតាមការបញ្ជាក់របស់អ្នកនាំពាក្យនៃកងកម្លាំងប្រដាប់អាវុធនេះ។ ទីក្រុងម៉ាន់ប៊ិចស្ថិតនៅជាប់នឹងព្រំដែនប្រទេសតួកគី។
កងកម្លាំងប្រជាធិបតេយ្យស៊ីរី បានប្រាប់ទីភ្នាក់ងារសារព័ត៌មានរ៉យទ័រថាកងកម្លាំងរបស់ខ្លួនកំពុងតែបោសសម្អាតទីក្រុងនេះបន្ទាប់ពីក្រុមអ្នកប្រយុទ្ធអាយស៊ីសចុងក្រោយបានរត់ភៀសខ្លួនចេញពីទីក្រុងនេះ។
កងកម្លាំងដែលគាំទ្រដោយសហរដ្ឋអាមេរិកនេះក៏បានរំដោះពលរដ្ឋជាង២០០០នាក់ដែលក្រុមអាយស៊ីសប្រើប្រាស់ជាខែលការពារ។ នេះបើតាមការបញ្ជាក់របស់លោក Sharfan Darwish នៃក្រុមប្រឹក្សាយោធាក្រុងម៉ាន់ប៊ិច ដែលមានសម្ព័ន្ធមិត្តជាមួយនឹងកងកម្លាំងប្រជាធិបតេយ្យស៊ីរី។
កាលពីព្រឹកថ្ងៃសុក្រលោក Gordon Trowbridge អ្នកនាំពាក្យរងនៃក្រសួងការពារជាតិបានប្រាប់ក្រុមអ្នករាយការណ៍ព័ត៌មាននៅ រដ្ឋធានីវ៉ាស៊ីនតោនថា ក្រុមអាយស៊ីសកំពុងតែស្ថិតនៅស្ថានភាពអាសន្នហើយអំពាវនាវឱ្យផ្តួលរំលំរដ្ឋបាលនៅក្នុងម៉ាន់ប៊ិចដែលនេះជាចំណុចសម្គាល់ដ៏ធំបំផុតចុងក្រោយនៅក្នុងកិច្ចខិតខំប្រឹងប្រែងរបស់ក្រុមចម្រុះក្នុងការកាត់ផ្តាច់និងលុបបំបាត់កន្លែងប្រមូលផ្តុំសកម្មភាពក្រុមអាយស៊ីស។
មន្ត្រីសហរដ្ឋអាមេរិកនិងក្រុមចម្រុះបានមើលឃើញថាទីក្រុងម៉ាន់ប៊ិចគឺជាកន្លែងប្រសព្វសម្រាប់ក្រុមភេរវករ។
ពួកគេនិយាយថាទីក្រុងនេះបម្រើការជាមជ្ឈមណ្ឌលរៀបចំសម្រាប់ក្រុមអ្នកប្រយុទ្ធបរទេសដែលទើបតែចូលមកថ្មីផងនិងជាកន្លែងជំរុញឱ្យមានប្រតិបត្តិការនៅក្រៅប្រទេសរបស់ក្រុមនេះ ដែលបញ្ជូនក្រុមអ្នកប្រយុទ្ធទៅរៀបចំផែនការនិងធ្វើការវាយប្រហារនៅបណ្តាប្រទេសនៅ បស្ចិមលោក៕