សហរដ្ឋអាមេរិកនិងក្រុមមេដឹកនាំនៃសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន បាននិយាយកាលពីថ្ងៃសុក្រថា ពួកគេនឹង«បង្កើនការប្រឹងប្រែងរួមគ្នា» ដើម្បីឱ្យមានដំណោះស្រាយដោយសន្តិវិធីនៅក្នុងប្រទេសមីយ៉ាន់ម៉ា។
សេចក្តីថ្លែងការណ៍រួមស្តីពីទស្សនៈវិស័យអាមេរិក-អាស៊ាន ចេញផ្សាយកាលពីយប់ថ្ងៃសុក្រ ចែងថា៖ «យើងបញ្ជាក់ជាថ្មីទៀតអំពីការប្តេជ្ញារបស់យើងចំពោះសន្តិភាពនិងស្ថិរភាពក្នុងតំបន់ និងបន្តអំពាវនាវឱ្យមានបញ្ឈប់អំពើហិង្សាជាបន្ទាន់នៅក្នុងប្រទេសមីយ៉ាន់ម៉ា និងឱ្យមានការដោះលែងអ្នកជាប់ឃុំឃាំងខាងនយោបាយទាំងអស់ ដោយមានរួមបញ្ចូលទាំងជនបរទេសផងដែរ»។
ទោះជាសេចក្តីថ្លែងការណ៍រួមមិនបាននិយាយអំពីការបើកទំនាក់ទំនងក្រៅផ្លូវការជាមួយរដ្ឋាភិបាលរួបរួមជាតិ ដែលដឹកនាំដោយជនស៊ីវិលនៃប្រទេសមីយ៉ាន់ម៉ា ហៅ NUG ក៏ដោយ ក៏ក្រុមមន្ត្រីជាន់ខ្ពស់អាមេរិក និងរដ្ឋមន្ត្រីការបរទេសអាស៊ានមួយចំនួនតូច បានចរចាជាមួយអ្នកស្រី Zin Mar Aung រដ្ឋមន្ត្រីការបរទេសរបស់ NGU នៅរដ្ឋធានីវ៉ាស៊ីនតោន ក្នុងសប្តាហ៍នេះ។
មនុស្សរាប់សែននាក់បានខ្ចាត់ព្រាត់ពីផ្ទះសម្បែងរបស់ពួកគេ ចាប់តាំងពីមានរដ្ឋប្រហារយោធាមួយដែលបានទម្លាក់រដ្ឋាភិបាលជាប់ឆ្នោតតាមលទ្ធិប្រជាធិបតេយ្យនៅប្រទេសមីយ៉ាន់ម៉ា ដែលគេស្គាល់ថាជាប្រទេសភូមា កាលពីខែកុម្ភៈឆ្នាំទៅមិញ។
There is an empty chair for #Myanmar (aka #Burma) at US-@ASEAN special summit to reflect dissatisfaction of the military coup and violence in the country. Junta was not invited. pic.twitter.com/1iF2nyxFr7
— VOA Nike Ching (@rongxiang) May 13, 2022
ក្នុងសប្តាហ៍នេះ ប្រធានាធិបតីសហរដ្ឋអាមេរិកលោក Joe Biden បានរៀបចំកិច្ចប្រជុំកំពូលដោយផ្ទាល់លើកទី ១ របស់លោក ជាមួយក្រុមមេដឹកនាំអាស៊ាន នៅរដ្ឋធានីវ៉ាស៊ីនតោន។ មានកៅអីទំនេរមួយសម្រាប់ប្រទេសមីយ៉ាន់ម៉ាដើម្បីបង្ហាញការមិនពេញចិត្តចំពោះរដ្ឋប្រហារយោធានិងអំពើហិង្សាក្នុងប្រទេសមួយនេះ។
សម្រាប់អ្នកវិភាគខ្លះ កិច្ចប្រជុំនេះត្រូវគេឃើញថាជាការបង្ហាញសាមគ្គីភាព នៅពេលសហរដ្ឋអាមេរិកប្រកួតប្រជែងជាមួយប្រទេសចិន ដើម្បីដណ្តើមឥទ្ធិពលក្នុងតំបន់នោះ។
កិច្ចប្រជុំកំពូលនេះក៏បានធ្វើឡើង ស្របពេលរដ្ឋមន្ត្រីការបរទេសអាមេរិកលោក Antony Blinken ត្រៀមបង្ហាញចំណុចគោលនយោបាយសំខាន់ៗស្តីពីវិធីសាស្ត្ររបស់សហរដ្ឋអាមេរិកចំពោះប្រទេសចិន នៅក្នុងពេលប៉ុន្មានថ្ងៃខាងមុខនេះ។
ស្តីពីសន្តិសុខក្នុងតំបន់ សេចក្តីថ្លែងការណ៍រួមអាមេរិក-អាស៊ានបានសង្កត់ធ្ងន់លើ «ការកសាងទំនុកលើគ្នា» និងសារៈសំខាន់នៃ«វិធានការហុចជាប្រយោជន៍ដែលអាចកាត់បន្ថយភាពតានតឹងនិងការប្រថុយប្រថាននៃគ្រោះថ្នាក់ ការយល់ច្រឡំ និងការគិតគូរខុស» នៅក្នុងសមុទ្រចិនខាងត្បូង។
លោក Derek Grossman អ្នកវិភាគជាន់ខ្ពស់ខាងកិច្ចការពារប្រទេសនៃសាជីវកម្ម Rand Corp. បានសរសេរតាមបណ្តាញ Twitter ថា «គ្មានឃើញអ្វីថ្មីនៅទីនេះទេ»៕
ASEAN just released its Joint Vision Statement following US summit. Let me spare you the trouble of reading—nothing new to see here. Basically a preview of the ASEAN Chairmanship Statement later this year.https://t.co/oYtgNxvFVV pic.twitter.com/G510fgjz6S
— Derek J. Grossman (@DerekJGrossman) May 14, 2022