សហរដ្ឋអាមេរិកនិងប្រទេសជប៉ុនបានពង្រឹងសម្ពន្ធភាពយុទ្ធសាស្ត្ររបស់ពួកគេនិងដាក់ចេញនូវវិធានការនានានៅក្នុងសេចក្ដីថ្លែងការណ៍រួមកាលពីថ្ងៃពុធ ដែលធ្វើឡើងដើម្បីកម្លារារាំងការគំរាមកំហែងកាន់តែខ្លាំងឡើងរបស់យោធាចិននៅសមុទ្រចិនខាងកើតនិងជុំវិញកោះតៃវ៉ាន់។
វិធានការទាំងនោះមានដូចជាផែនការនៅក្នុងការរៀបចំឡើងវិញនូវកងទាហាននៃកងទ័ពម៉ារីនសហរដ្ឋអាមេរិកដែលឈរជើងនៅអាណាខេត្ត Okinawa នៃប្រទេសជប៉ុន និងកិច្ចព្រមព្រៀងថ្មីៗនៅក្នុងការធ្វើកិច្ចសហប្រតិបត្តិការលើផ្នែកបច្ចេកវិទ្យាដែនអវកាសនិងបច្ចេកវិទ្យាយោធាទំនើបនានា។
រដ្ឋមន្ត្រីការបរទេសសហរដ្ឋអាមេរិកលោក Antony Blinken និងរដ្ឋមន្ត្រីការពារជាតិសហរដ្ឋអាមេរិកលោក Lloyd Austin បានចូលរួមនៅក្នុងការពិភាក្សា ២ បូក ២ កាលពីថ្ងៃពុធ ជាមួយនឹងរដ្ឋមន្ត្រីការបរទេសជប៉ុនលោក Hayashi Yoshimasa និងរដ្ឋមន្ត្រីការពារជាតិជប៉ុនលោក Hamada Yasukazu។
លោក Austin បានប្រាប់អ្នកកាសែតក្នុងអំឡុងពេលសន្និសីទកាសែតរួមគ្នាមួយថា ស្របពេលដែលប្រទេសចិនប៉ុនប៉ង «បង្កើតស្ថានភាពធម្មតាបែបថ្មី» នៅច្រកសមុទ្រតៃវ៉ាន់តាមរយៈការបង្កើនសកម្មភាពយោធាបែបបង្កហេតុ ករណីនេះមិនស្មើនឹងសញ្ញានៃការឈ្លានពានដែលជិតកើតឡើងណាមួយរបស់ចិនលើកោះតៃវ៉ាន់នោះទេ។
លោក Blinken បាននិយាយថា ប្រទេសចិនបានព្យាយាម «ធ្វើឱ្យអន្តរាយអស់រយៈពេលរាប់ទសវត្សរ៍មកហើយដល់ស្ថានការណ៍បច្ចុប្បន្នជាយូរមកហើយដែលបានរក្សាសន្តិភាពនិងស្ថិរភាព [នៅច្រកសមុទ្រតៃវ៉ាន់]» ខណៈដែលសហរដ្ឋអាមេរិកចង់ពង្រឹងស្ថានភាពនេះ។
លោក Hayashi បាននិយាយថា ប្រទេសជប៉ុននិងសហរដ្ឋអាមេរិកនឹង «ផ្ដួចផ្ដើមគំនិតរួមគ្នានៅពេលដែលកំពុងមានសន្តិភាពដើម្បីកម្លារារាំងការវាយប្រហារប្រដាប់អាវុធណាមួយ» ដែល «ធ្វើឱ្យអន្តរាយដល់ស្ថិរភាពនៅក្នុងតំបន់»។
ចំណែកឯលោក Hamada វិញ បានបញ្ជាក់ថា សម្ពន្ធមិត្តទាំងពីរនឹងពង្រីកការប្រើប្រាស់រួមនៃសម្ភារៈបរិក្ខាររបស់ប្រទេសជប៉ុននៅពេលដែលបង្កើនការធ្វើសមយុទ្ធនិងការបណ្ដុះបណ្ដាលកងកម្លាំងរួមគ្នា៕