ប្រធានឧត្តមស្នងការសិទ្ធិមនុស្សអង្គការសហប្រជាជាតិលោក Volker Tuerk បានជំរុញអាជ្ញាធរប្រទេសអេហ្ស៊ីបឱ្យធ្វើការដោះលែងសកម្មជនសិទ្ធិមនុស្សម្នាក់ ដែលជីវិតរបស់លោកកំពុងស្ថិតក្នុងការគំរាមកំហែងបន្ទាប់ពីបានធ្វើកូដកម្មបង្អត់អាហារអស់រយៈពេល៧ខែមកហើយ។
សកម្មជនការពារសិទ្ធិមនុស្សសញ្ជាតិអង់គ្លេសដែលមានដើមកំណើតអេហ្ស៊ីប លោក Alaa Abdel Fattah បានក្លាយជាបន្លានៅក្នុងកែវភ្នែករបស់ក្រុមអាជ្ញាធរអេហ្ស៊ីបអស់រយៈពេលជាង១០ឆ្នាំមកហើយ។ លោកត្រូវបានចាប់ដាក់ពន្ធនាគារនិងដោះលែងជាច្រើនលើកច្រើនសារ ដោយសារតែលោកបានការពារសិទ្ធិស៊ីវិលនិងការតវ៉ាប្រឆាំងនឹងការរំលោភបំពានដោយក្រុមកងកម្លាំងសន្តិសុខរបស់អេហ្ស៊ីបនោះ។
លោក Abdel Fattah ពេលនេះកំពុងជាប់ពន្ធនាគាររយៈពេល៥ឆ្នាំពីបទចោទប្រកាន់ថាបានផ្សព្វផ្សាយនូវព័ត៌មានមិនពិត។ លោកបានចាប់ផ្តើមធ្វើកូដកម្មបង្អត់អាហារខ្លះៗកាលពីខែមេសា ដើម្បីប្រឆាំងទៅនឹងការជាប់ពន្ធនាគាររបស់លោកក៏ដូចជាស្ថានភាពដ៏ឃោរឃៅនៃការជាប់ឃុំឃាំងរបស់លោកផងដែរ។
អ្នកនាំពាក្យឧត្តមស្នងការសិទ្ធិមនុស្សរបស់អង្គការសហប្រជាជាតិលោកស្រី Ravina Shamdasani បាននិយាយថាលោក Abdel Fattah បានបង្កើនការធ្វើកូដកម្មបង្អត់អាហារខ្លួនឯងកាលពីថ្ងៃទី១ខែវិច្ឆិកាកន្លងទៅ ហើយលោកស្រីនិយាយថា លោកបានឈប់ហូបទឹកនៅថ្ងៃទី៦ ខែវិច្ឆិកាដែលជាថ្ងៃទី១នៃសន្និសីទស្តីពីអាកាសធាតុរបស់អង្គការសហប្រជាជាតិ ដែលកំពុងប្រព្រឹត្តធ្វើឡើងនៅក្នុងទីក្រុង Sharm El-Sheikh នៃប្រទេសអេហ្ស៊ីប។
លោកស្រីបាននិយាយថាស្ថានភាពសុខភាពរបស់លោក Abdel Fattah កំពុងស្ថិតក្នុងសភាពផុយស្រួយ ហើយការធ្វើកូដកម្មដោយបង្អត់អាហារនិងទឹកនោះកំពុងដាក់ជីវិតរបស់លោកឱ្យស្ថិតក្នុងស្ថានភាពហានិភ័យដ៏ធ្ងន់ធ្ងរមួយ។
លោកស្រី Shamdasani បានយល់ស្របថា សន្និសីទស្តីពីការប្រែប្រួលអាកាសធាតុ COP-27 អាចជាចំណុចដាក់សម្ពាធមួយ ស្របពេលដែលមនុស្សគ្រប់គ្នាកំពុងរង់ចាំមើលពីលទ្ធផលនៃកិច្ចប្រជុំនេះ។
ប្រធានាធិបតីសហរដ្ឋអាមេរិក លោកJoe Bidenមានគម្រោងនឹងទៅដល់ប្រទេសអេហ្សីបនៅថ្ងៃសុក្រនេះហើយនឹងជួបជាមួយប្រធានាធិបតីអេហ្ស៊ីបលោកAbdel Fattah El-Sisi។
ចេញពីប្រទេសអេហ្ស៊ីប លោកប្រធានាធិបតីអាមេរិកJoe Biden នឹងធ្វើដំណើរទៅកាន់ប្រទេសកម្ពុជាដើម្បីចូលរួមកិច្ចប្រជុំកំពូលអាស៊ាននៅក្នុងរាជធានីភ្នំពេញ៕