អ៊ុយក្រែនបាននិយាយនៅថ្ងៃចន្ទនេះថា រុស្ស៊ីបានប្រើប្រាស់យន្តហោះដ្រូនចំនួន២៤ ដើម្បីវាយប្រហារលើតំបន់ Mykolaiv និងតំបន់ Odesa កាលពីយប់មិញ បន្ថែមលើការបាញ់គ្រាប់មីស៊ីល ចំនួន១៧គ្រាប់បន្ថែមទៀត។
យោធាអ៊ុយក្រែននិយាយថា ខ្លួនបានបាញ់ទម្លាក់យន្តហោះដ្រូនរុស្ស៊ីចំនួន១៨គ្រឿង និងគ្រាប់មីស៊ីលទាំងអស់ ដែលរុស្ស៊ីបានបាញ់នោះ។
លោក Oleh Kiper អភិបាលតំបន់ Odesa និយាយថាស្រុក Izmail ដែលជាកន្លែងទីតាំងកំពង់ផែ ដែលប្រើប្រាស់សម្រាប់ការនាំចេញគ្រាប់ធញ្ញជាតិនោះ បានរងការវាយប្រហារជាថ្មីម្តងទៀត ហើយអគាលំហាត់ប្រាណមួយកន្លែងនៅក្នុងទីក្រុង Vylkove ក៏រងការវាយប្រហារផងដែរ។ ពុំមានរបាយការណ៍ពីអ្នករងរបួសឬស្លាប់ឡើយ។
អភិបាលតំបន់ Mykolaiv លោក Vitaliy Kim បាននិយាយថា បំណែកបាក់បែកដែលធ្លាក់ពីលើ អាកាស បានធ្វើឱ្យឆេះអគាមួយកន្លែង ហើយភ្លើងនោះក៏រាលដាលឆេះខូចខាតអគារផ្សេងៗជិតនោះមួយចំនួនទៀតផងដែរ។
ទន្ទឹមនឹងនេះដែរ ការវាយប្រហារមួយទៀតរបស់រុស្ស៊ីទៅលើតំបន់ Kherson បានធ្វើឱ្យមនុស្សយ៉ាងហោចណាស់ក៏៤នាក់ដែររងរបួស។ នេះបើតាមការឱ្យដឹងរបស់អភិបាលតំបន់ Kherson លោក Oleksandr Prokudin។
លោក Prokudin ថាកងកម្លាំងរុស្ស៊ី បានធ្វើការវាយប្រហារដោយចេតនាសំដៅទៅលើស្ថានីយរថយន្តក្រុងដ៏មមាញឹកមួយកន្លែង នៅក្នុងទីប្រជុំជន Beryl។
អនុរដ្ឋមន្ត្រីក្រសួងការពារជាតិអ៊ុយក្រែន អ្នកស្រី Hanna Maliar និយាយថា កងកម្លាំងអ៊ុយក្រែន បានដណ្តើមយកមកវិញនូវទឹកដីប្រមាណ២គីឡូម៉ែត្រក្រឡា ពីកងកម្លាំងរុស្ស៊ីនៅក្នុងតំបន់ Bakhmut ក៏ដូចជាចំនួនជាង៥គីឡូម៉ែត្រក្រឡា ក្នុងតំបន់ភាគខាងត្បូងអ៊ុយក្រែនផងដែរ។
វិទ្យាស្ថានសិក្សាអំពីសង្គ្រាមបានរាយការណ៍ថាកងកម្លាំងអ៊ុយក្រែនបានវាយរំដោះបានភូមិ Klishchiivka កាលពីថ្ងៃអាទិត្យទី១៧ ខែកញ្ញា បន្ទាប់ពីរំដោះភូមិ Andriivka កាលពីថ្ងៃទី១៤ ខែកញ្ញានេះ។ ភូមិ Klishchiivka ស្ថិតនៅចម្ងាយ៧គីឡូម៉ែត្រភាគនីរតីនៃទីក្រុង Bakhmut៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។