ប្រធានាធិបតីអ៊ុយក្រែនលោក Volodymyr Zelenskyy ត្រូវបានគេរំពឹងថានឹងធ្វើទស្សនកិច្ចនៅរដ្ឋធានីវ៉ាស៊ីនតោន សហរដ្ឋអាមេរិក នៅសប្តាហ៍ក្រោយ ខណៈដែលសភាអាមេរិកបន្តពិភាក្សាអំពីជំនួយចំនួន ២១ ពាន់លានដុល្លារបន្ថែមទៀតដល់អ៊ុយក្រែនដើម្បីគាំទ្រការប្រយុទ្ធប្រឆាំងនឹងប្រទេសរុស្ស៊ី។
សមាជិកសភាសហរដ្ឋអាមេរិកមានការខ្វែងគំនិតគ្នាកាន់តែខ្លាំងឡើងអំពីថា តើត្រូវផ្តល់ជំនួយដល់អ៊ុយក្រែនបន្ថែមឬអត់ ខណៈដែលការប្រយុទ្ធរបស់អ៊ុយក្រែនប្រឆាំងនឹងការឈ្លានពានរបស់រុស្ស៊ីនៅតែបន្ត។ លោកប្រធានាធិបតី Joe Biden កំពុងស្វែងរកជំនួយយោធាចំនួន ១៣ ពាន់លានដុល្លារ និងជំនួយមនុស្សធម៌ចំនួន ៨ ពាន់លានដុល្លារ។ ប៉ុន្តែសមាជិកសភាគណបក្សសាធារណរដ្ឋខ្លះប្រឆាំងនឹងការបញ្ជូនជំនួយបន្ថែមទៅអ៊ុយក្រែន។
លោក Zelenskyy ត្រូវបានគេរំពឹងថានឹងជួបជាមួយលោក Biden នៅសប្តាហ៍ក្រោយ នៅឯសេតវិមាន បន្ទាប់ពីកិច្ចប្រជុំមហាសន្និបាតអង្គការសហប្រជាជាតិនៅទីក្រុង New York។
ទោះបីជាការវាយលុករបស់អ៊ុយក្រែនប្រឆាំងនឹងការឈ្លានពានរបស់រុស្ស៊ីមានភាពយឺតយ៉ាវជាងការរំពឹងទុកក៏ដោយ លោក Zelenskyy កាលពីថ្ងៃព្រហស្បតិ៍ បានប្រារព្ធនូវអ្វីដែលលោកបានពិពណ៌នាថា ជាការបំផ្លាញរបស់អ៊ុយក្រែននូវប្រព័ន្ធការពារដែនអាកាសរុស្ស៊ីនៅឧបទ្វីប Crimea។
កាលពីថ្ងៃព្រហស្បតិ៍ សហរដ្ឋអាមេរិកបានដាក់ទណ្ឌកម្មលើក្រុមហ៊ុនធុរកិច្ចនិងពួកបុគ្គលិកជាង ១៥០ នាក់ នៅក្នុងប្រទេសរុស្ស៊ី តួកគី ប្រទេសអាម៉េរ៉ាតអារ៉ាប់រួម និងប្រទេសហ្សកស៊ី ដើម្បីបង្ក្រាបលើការគេចពីការរឹតត្បិតពាណិជ្ជកម្មមានគោលដៅរារាំងការផ្តល់ប្រាក់ដល់សង្គ្រាម ១៩ ខែ របស់រុស្ស៊ីប្រឆាំងនឹងប្រទេសអ៊ុយក្រែន។
កញ្ចប់ទណ្ឌកម្មថ្មីបំផុតនេះជាកញ្ចប់ទណ្ឌកម្មធំមួយក្នុងបណ្តាទណ្ឌកម្មនានាដាក់កំហិតដោយក្រសួងការបរទេសនិងក្រសួងហិរញ្ញវត្ថុអាមេរិក។ កញ្ចប់ទណ្ឌកម្មនេះកំណត់គោលដៅលើពួកជនដែលលក់បច្ចេកវិទ្យាលោកខាងលិចទៅឱ្យរដ្ឋាភិបាលក្រុងមូស្គូសម្រាប់ជួយដល់ការប្រឹងប្រែងធ្វើសង្គ្រាមរបស់ខ្លួន ជាពិសេសធុរកិច្ចនិងពួកជននៅក្នុងប្រទេសតួកគី ដែលជាសមាជិកមួយនៃសន្ធិសញ្ញាយោធាបស្ចិមប្រទេសដែលជាសម្ព័ន្ធភាពនៅក្នុងការគាំទ្រប្រទេសអ៊ុយក្រែន។
ការដាក់ទណ្ឌកម្មទាំងនេះ ដែលបង្កកធនធានរបស់ធុរកិច្ចនិងបុគ្គលទាំងនេះ ដែលអាចមាននៅក្នុងសហរដ្ឋអាមេរិក ក៏មានគោលដៅធ្វើឱ្យរអាក់រអួលដល់ការអភិវឌ្ឍវិស័យថាមពលនៃប្រទេសរុស្ស៊ីដែលផ្តល់ប្រាក់កាសសម្រាប់ធ្វើសង្គ្រាម រួមមានគម្រោងការឧស្ម័នធម្មជាតិអាក់ទិក ក៏ដូចជាអាជីវកម្មយករ៉ែនិងរោងចក្រផលិតនិងជួសជុលអាវុធរុស្ស៊ីផងដែរ។
បន្ថែមលើនេះ កញ្ចប់ទណ្ឌកម្មអាមេរិកលើ ក្រុមហ៊ុនតួកគីនិងរុស្ស៊ីមួយចំនួនដែលក្រសួងការបរទេសនិយាយថា ជួយរដ្ឋាភិបាលក្រុងមូស្គូក្នុងការទទួលគ្រឿងបន្លាស់អេឡិចត្រូនិកអាមេរិកនិងអឺរ៉ុប ដូចជាបន្ទះ chips និង processors កុំព្យូទ័រ ដែលអាចត្រូវប្រើក្នុងគ្រឿងឧបករណ៍ស៊ីវិលនិងយោធា។
ក្រសួងនេះក៏បានកំណត់គោលដៅលើក្រុមហ៊ុនតួកគីនានាដែលជួសជុលនាវាឱ្យក្រុមហ៊ុនមួយទាក់ទិនជាមួយក្រសួងការពារជាតិរុស្ស៊ី។
លោក James O'Brien នៃការិយាល័យសម្របសម្រួលការដាក់ទណ្ឌកម្មនៃក្រសួងការបរទេសសហរដ្ឋអាមេរិក បាននិយាយថា នៅមុនសង្គ្រាមនៅអ៊ុយក្រែនរុស្ស៊ីបានដឹកជញ្ជូនចូលក្នុងប្រទេសនូវគ្រឿងអេឡិកត្រូនិករហូតដល់ ៩០% ពីប្រទេសនានាដែលជាសមាជិកនៃពួកប្រទេសប្រជាធិបតេយ្យមានធនធានច្រើន ៧ ប្រទេស តែការដាក់ទណ្ឌកម្មបានបន្ថយតួលេខនេះមកជិតដល់ ៣០%៕
