ខុទ្ទកាល័យប្រធានាធិបតីអ៊ុយក្រែនបានរាយការណ៍ថា មានការវាយប្រយុទ្ធគ្នាខ្លាំងក្លានៅថ្ងៃអង្គារនេះនៅក្នុងតំបន់ Kherson នៅភាគខាងត្បូងប្រទេសអ៊ុយក្រែន។ តំបន់នេះត្រូវបានត្រួតត្រាដោយកងទ័ពរុស្ស៊ី ហើយកងទ័ពអ៊ុយក្រែនថាខ្លួនបានធ្វើការវាយប្រហារតបតទៅវិញដើម្បីព្យាយាមដណ្ដើមយកតំបន់នេះមកវិញ។
ប្រធានាធិបតីអ៊ុយក្រែនលោក Volodymyr Zelenskyy បានសន្យានៅក្នុងសុន្ទរកថាកាលពីយប់ថ្ងៃចន្ទថា កងទ័ពអ៊ុយក្រែននឹងដណ្ដើមយកមកវិញឱ្យបាននូវដែនដីរបស់ខ្លួន។ លោកថា អ៊ុយក្រែននឹងដេញកងទ័ពរុស្ស៊ីឱ្យ «ទៅដល់ព្រំដែន»។
លោកលើកឡើងដូច្នេះថា៖ «ប្រសិនបើពួកគេចង់នៅរស់ នេះគឺជាពេលដែលកងទ័ពរុស្ស៊ីត្រូវរត់គេចចេញទៅប្រទេសរបស់ខ្លួនវិញ»។
ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃអង្គារនេះថា គិតត្រឹមព្រឹកថ្ងៃចន្ទ «កងពលតូចមួយចំនួននៃកងទ័ពអ៊ុយក្រែនបានបង្កើនការបាញ់ផ្លោងនៅតំបន់សមរភូមិជួរមុខនៅទូទាំងតំបន់ភាគខាងត្បូងនៃប្រទេសអ៊ុយក្រែន»។
ក្រសួងនេះបានបន្ថែមថា ចាប់តាំងពីដើមខែសីហាមក រុស្ស៊ីបានប្រឹងប្រែងដើម្បីពង្រឹងវត្តមានរបស់ខ្លួននៅតាមតំបន់ភាគខាងលិចនៃមាត់ទន្លេ Dnipro ក្នុងតំបន់ Kherson។
ក្រសួងការពារជាតិរុស្ស៊ីបានបញ្ជាក់កាលពីថ្ងៃចន្ទថា កងទ័ពរុស្ស៊ីបានបញ្ឈប់ការវាយប្រហាររបស់អ៊ុយក្រែននៅក្នុងតំបន់ Kherson និងតំបន់ Mykolaiv និងបានធ្វើឱ្យកងទ័ពអ៊ុយក្រែន «បាត់បង់ធ្ងន់ធ្ងរ»៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
លោក Zelenskyy ថា កងទ័ពរុស្ស៊ីត្រូវដកថយបើ «ចង់នៅរស់» ខណៈមានការប្រយុទ្ធគ្នាខ្លាំងក្លានៅតំបន់ Kherson
ទាហានអ៊ុយក្រែនម្នាក់ប្រមូលបំណែកក្នុងរណ្ដៅមួយដើម្បីកំណត់ពីប្រភេទគ្រាប់រំសេវ ក្រោយពីរុស្ស៊ីបានវាយប្រហារនិងធ្វើឱ្យខូចខាតអគារមួយចំនួននៅទីក្រុង Kharkiv កាលពីថ្ងៃទី៣០ ខែសីហា ឆ្នាំ២០២២។