សហរដ្ឋអាមេរិក បានអបអរសាទរប្រធានាធិបតីដែលទើបជាប់ឆ្នោតថ្មីនៃប្រទេសកូរ៉េខាងត្បូងលោក Yoon Seok-youl ហើយបាននិយាយថា រដ្ឋាភិបាលក្រុងវ៉ាស៊ីនតោនទន្ទឹងរង់ចាំដើម្បីពង្រីកសម្ព័ន្ធភាពដ៏រឹងមាំជាមួយរដ្ឋាភិបាលក្រុងសេអ៊ូល។
កូរ៉េខាងត្បូងកាលពីថ្ងៃពុធម្សិលមិញ បានបោះឆ្នោតជ្រើសរើសលោកYoon Seok-youl បេក្ខ ជនគណបក្សអំណាចប្រជាពលរដ្ឋដែលជាគណបក្សប្រឆាំងនិងជាអតីតរដ្ឋអាជ្ញាឲ្យធ្វើជាប្រ ធានាធិបតីថ្មីរបស់កូរ៉េខាងត្បូង បន្ទាប់ពីការប្រកួតប្រជែងដ៏ល្មីងជូចត់នៅក្នុងការបោះឆ្នោតប្រធានាធិបតីនោះ។
លោកYoon ដែលជាអ្នកអភិរក្សនិយមត្រូវគេរំពឹងថា នឹងប្រកាន់ជំហរតឹងរឹងប្រឆាំងនឹងកូរ៉េ ខាងជើងនិងចិន។
អ្នកនាំពាក្យក្រសួងការបរទេសអាមេរិក បានប្រាប់វីអូអេថា «សម្ព័ន្ធភាពរវាងសហរដ្ឋអាមេរិក និងសាធារណរដ្ឋកូរ៉េ សេដ្ឋកិច្ចរបស់យើងនិងប្រជាពលរដ្ឋរបស់យើង មានភាពរឹងមាំខ្លាំង»។ អ្នកនាំពាក្យនោះ បានបន្ថែមទៀតថា ប្រធានាធិបតីអាមេរិកលោក Joe Biden ទន្ទឹងរង់ចាំធ្វើ ការជាមួយរដ្ឋបាលថ្មីរបស់កូរ៉េខាងត្បូងដើម្បីពង្រីកកិច្ចសហប្រតិបត្តិការដ៏ជិតស្និទ្ធរបស់យើង»។
លោកYoon ត្រូវគេរំពឹងថា នឹងបង្កើតក្រុមអន្តរកាលមួយមុនពេលចូលកាន់តំណែងជាផ្លូវការនៅខែឧសភាខាងមុខនេះដើម្បីជំនួសលោកMoon Jae-in ប្រធានាធិបតីដែលនឹងចេញពីតំណែងដែលត្រូវបានរដ្ឋធម្មនុញកូរ៉េខាងត្បូងហាមប្រាមមិនឲ្យឈរឈ្មោះបោះឆ្នោតអណ្ណត្តិទី២ដែលមានរយៈពេល៥ឆ្នាំទៀត។
ស្របពេលដែលមន្ត្រីអាមេរិកមួយចំនួន មិនអាចព្យាករណ៍ពីទំនាក់ទំនងក្នុងពេលអនាគតរវាងរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងសេអ៊ូលនោះ គេរំពឹងថា ភាគច្រើននៃទំនាក់ទំនងដែលមានស្រាប់រវាងប្រទេសទាំងពីរ នឹងបន្តទៅមុខទៀត។
ស្តីពីនយោបាយការបរទេសរបស់កូរ៉េខាងត្បូងវិញ លោក Yoon ត្រូវបានគេមើលឃើញថា ជាអ្នកគាំទ្រគោលនយោបាយ «សន្តិភាពតាមរយៈកម្លាំង» ជាមួយកូរ៉េខាងជើង ហើយនិងជាអ្នករិះគន់ដ៏ខ្លាំងលើប្រទេសចិន។ អ្នកវិភាគមួយចំនួននិយាយថា ប្រធានាធិតីថ្មីនេះ នឹងត្រូវគ្រប់គ្រងសមត្ថភាពពង្រីកកម្លាំងយោធារបស់កូរ៉េខាងជើងនិងការប្រកួតប្រជែងដ៏ស្វិត ស្វាញរវាងចិននិងអាមេរិកផងដែរ។
សហរដ្ឋអាមេរិក នឹងបន្តការសម្របសម្រួលជាមួយសម្ព័ន្ធមិត្តដែលរួមមានកូរ៉េខាងត្បូងនិងជប៉ុនដើម្បីត្រៀមខ្លួនជាស្រេចក្នុងការចូលរួមក្នុងការងារការទូតដ៏ម៉្មត់ចត់និងចីរភាពមួយជាមួយកូរ៉េខាងជើង៕