ប្រទេសតួកគីកំពុងបន្តធ្លាក់ចូលក្នុងវិបត្តិរវាងប្រទេសកាតា ប្រទេសអារ៉ាប៊ីសាអូឌីតនិងប្រទេសផ្សេងៗទៀតនៅក្នុងឈូងសមុទ្រពែក ក្នុងការចោទប្រកាន់រដ្ឋាភិបាលប្រ ទេសកាតាថាគាំទ្រក្រុមឥស្លាមជ្រុលនិយមនៅក្នុងតំបន់។
រដ្ឋាភិបាលតួកគីកំពុងគាំទ្រយ៉ាងខ្លាំងដល់រដ្ឋាភិបាលកាតា ហើយបានច្រានចោលការបញ្ចប់ចំណងទាក់ទងខាងយោធាដែលបានបង្កើតកាលពីពេលថ្មីៗនេះរបស់ខ្លួន។
កាលពីថ្ងៃព្រហស្បតិ៍ រថពាសដែក៥គ្រឿងនិងយោធាចំនួន២៣នាក់របស់តួកគីបានទៅដល់ទីក្រុងដូហាដែលជាផ្នែកមួយនៃកិច្ចព្រមព្រៀងដើម្បីបង្កើតទីតាំងយោធាដោយមានកងទ័ពជាង៥ពាន់នាក់។ ក៏ប៉ុន្តែ ការបិទទីតាំងយោធានេះជាការទាមទារមួយនៃការទាមទារចំនួន១៣ ដែលដ្ឋាភិបាលអារ៉ាប៊ីសាអូឌីតកំពុងធ្វើដើម្បីបញ្ចប់វិបត្តិនោះ។
កាលពីថ្ងៃសុក្រ លោក Fikri Isik រដ្ឋមន្រ្តីការពារប្រទេសតួកគីនៅក្នុងកិច្ចសម្ភាសន៍មួយជាមួយបណ្តាញទូរទស្សន៍បានឆ្លើយតបវិញ ដោយលោករដ្ឋមន្រ្តីការពារប្រទេស បាននិយាយថា «ការពិនិត្យមើលឡើងវិញនូវកិច្ចព្រមព្រៀងជាមួយប្រទេសកាតាមិនស្ថិតនៅលើរបៀបវារៈរបស់យើងទេ»។
លោក Isik និយាយបន្ថែមទៀតថា ការដាក់ពង្រាយកងទ័ពមិនសំដៅដល់ការយកប្រទេសណាមួយជាគោលដៅទេ ហើយវាគ្រាន់តែជាការរួមវិភាគទានដល់ស្ថេរភាពនៅក្នុងតំបន់តែប៉ុណ្ណោះ។ អត្ថាធិប្បាយស្តីពីការទាមទារឲ្យបិទបន្ទាយកងទ័ពនេះ លោកបាននិយាយថា «ប្រសិនបើ មិនមានតម្រូវការទេ ការដាក់ពង្រាយកងទ័ពនេះមានន័យថា ជាការជ្រៀតជ្រែកក្នុងចំណងទាក់ទងទ្វេភាគី»។
កិច្ចព្រមព្រៀងដើម្បីបង្កើតមូលដ្ឋានយោធាតួកគីមានតាំងពីឆ្នាំ២០១៤ ហើយជាផ្នែកមួយនៃគោលដៅយុទ្ធសាស្រ្តកាន់តែធំឡើងរបស់រដ្ឋាភិបាលទួគីដើម្បីបញ្ចេញឥទ្ធិពលរបស់ខ្លួន។
លោក Semih Idiz ជាអ្នកសរសេរបទវិចារណកថាខាងនយោបាយក្នុងប្រព័ន្ធវេបសាយ Al Monitor បានកត់សម្គាល់ថា «មូលដ្ឋានយោធានេះជាការសំខាន់ណាស់ពីព្រោះតែមូលដ្ឋានយោធានេះនឹងធ្វើឲ្យប្រទេសតួកគីបោះទីតាំងនៅក្នុងតំបន់»៕