ប្រធានាធិបតីសហរដ្ឋអាមេរិកលោក Donald Trump ត្រូវគេរំពឹងថានឹងប្រកាសអំពីការដាក់កំហិតថ្មីចំពោះការធ្វើដំណើរទៅកាន់សហរដ្ឋអាមេរិក ស្របពេលដែលការហាមឃាត់ការធ្វើដំណើរចំពោះពលរដ្ឋមកពីប្រទេសដែលមានប្រជាជនភាគច្រើនកាន់សាសនាឥស្លាមចំនួន ៦ ប្រទេស ផុតកំណត់នៅថ្ងៃអាទិត្យនេះ។
ក្រសួងសន្តិសុខមាតុភូមិអាមេរិកបានស្នើប្រធានាធិបតី Trump ឲ្យយល់ព្រមចំពោះការដាក់កំហិតថ្មីៗបន្ថែមទៀតលើជនបរទេសណាដែលមកពីប្រទេសដែលបដិសេធចែករំលែកព័ត៌មានជាមួយនឹងសហរដ្ឋអាមេរិក ឬក៏មិនបានចាត់វិធានការប្រុងប្រយ័ត្នផ្នែកសន្តិសុខចាំបាច់នានា។
មន្ត្រីក្រសួងសន្តិសុខមាតុភូមិមិនបាននិយាយថាតើមានប្រទេសណាខ្លះដែលនឹងរងការប៉ះពាល់ដោយសារការដាក់កំហិតថ្មីនេះ ដែលអាចនឹងចូលជាធរមានចាប់ពីថ្ងៃអាទិត្យនេះតទៅនោះទេ។
មន្ត្រីទាំងនោះបានបញ្ជាក់ទៀតថា ពួកគេបានធ្វើការអស់រយៈពេលជាច្រើនខែលើច្បាប់ថ្មីនេះ ដោយបានសហការជាមួយនឹងទីភ្នាក់ងារផ្សេងៗ និងបានពិភាក្សាជាមួយនឹងរដ្ឋាភិបាលបរទេសនានា។
ការស្នើឡើងថ្មីនេះគឺផ្អែកលើមូលដ្ឋានថ្មីមួយបង្កើតឡើងដោយក្រសួងសន្តិសុខមាតុភូមិ ដែលមានកត្តាមួយចំនួនដូចជា ថាតើប្រទេសទាំងនោះចេញលិខិតឆ្លងដែនអេឡិចត្រូនិកដោយមានភ្ជាប់នូវព័ត៌មានជីវមាត្រនានាដូចជាស្នាមក្រយៅម្រាមដៃជាដើម ឬក៏អត់ និងថាតើប្រទេសទាំងនោះយល់ព្រមចែករំលែកព័ត៌មានអំពីប្រវត្តិឧក្រិដ្ឋកម្ម ឬប្រវត្តិពាក់ព័ន្ធនឹងអំពើភេរវកម្មរបស់អ្នកធ្វើដំណើរជាមួយនឹងសហរដ្ឋអាមេរិក ឬក៏យ៉ាងណានោះ។ សហរដ្ឋអាមេរិកបានចែករំលែកគំរូស្តង់ដារទាំងនោះជាមួយនឹងបណ្ដាប្រទេសនានានៅក្នុងពិភពលោក និងទុកពេល ៥០ ថ្ងៃ ឲ្យបណ្ដាប្រទេសទាំងនោះអនុវត្តតាម៕