រដ្ឋបាលលោកប្រធានាធិបតីត្រាំបានប្រាប់ក្រុមអ្នកតំណាងរាស្រ្តថារដ្ឋបាលនេះសម្រេចបានកិច្ចព្រមព្រៀងមួយដែលនឹងបន្តអាជីវកម្មដល់ក្រុមហ៊ុនទូរសព្ទចិន ZTE ដែលការណ៍នេះទំនងជានឹងបើកផ្លូវសម្រាប់សហរដ្ឋអាមេរិកចរចាពាណិជ្ជកម្មកម្រិតខ្ពស់ជាមួយនឹងប្រទេសចិននៅខែក្រោយ។
កិច្ចព្រមព្រៀងនេះកំណត់ថាក្រុមហ៊ុន ZTE នឹងបណ្តេញក្រុមអ្នកគ្រប់គ្រងចេញ ជួលមន្ត្រីអាមេរិកាំងតាមដានការអនុវត្តច្បាប់ឱ្យធ្វើការនៅក្នុងក្រុមហ៊ុន និងបង់ប្រាក់ពិន័យ។ ប្រាក់ពិន័យនេះជាការបន្ថែមទៅនឹងទឹកប្រាក់ប្រហែល១ពាន់លានដុល្លារដែលក្រុមហ៊ុន ZTE បានបង់រួចហើយចំពោះការលក់សម្ភារៈទៅ ប្រទេសកូរ៉េខាងជើងនិងអ៊ីរ៉ង់ដោយរំលោភនឹងការដាក់ទណ្ឌកម្មរបស់សហរដ្ឋអាមេរិក។ នេះបើយោងតាមសេចក្តីរាយការណ៍របស់សារព័ត៌មាននានា។
ជាការឆ្លើយតបវិញក្រសួងពាណិជ្ជកម្មនឹងដកបម្រាមរយៈពេល៧ឆ្នាំលើក្រុមហ៊ុន ZTE ដែលបានហាមឃាត់ក្រុមហ៊ុននេះមិនឱ្យទិញឧបករណ៍ផ្សេងៗពីក្រុមហ៊ុនសហរដ្ឋអាមេរិក។
ក្រុមហ៊ុនចិនពឹងផ្អែកលើឧបករណ៍ទាំងនេះដើម្បីផលិតទំនិញហើយបម្រាមដែលបានដាក់កាលពីដើមខែឧសភានេះនឹងធ្វើឱ្យក្រុមហ៊ុនZTE ដួលរលំ។
កាលពីល្ងាចថ្ងៃសុក្រ លោកប្រធានាធិបតីដូណាល់ ត្រាំបានវាយប្រហារក្រុមអ្នកតំណាងរាស្រ្តខាងក្រុមគណបក្សប្រជាធិបតេយ្យនិងបញ្ជាក់ពីដំណឹងនៃកិច្ចព្រមព្រៀងនេះតាមទំព័រធ្វីតធឺ៕