ប្រធានាធិបតីសហរដ្ឋអាមេរិកលោក Donald Trump បានព្រលះដាក់អង្គការបណ្ដាប្រទេសនាំចេញប្រេងដែលហៅកាត់ថា OPEC ដោយព្រមានឲ្យអង្គការនេះបញ្ឈប់ការបង្វិលទីផ្សារប្រេង និងដាក់សម្ពាធលើប្រទេសអារ៉ាប៊ីសាអ៊ូឌីតដែលជាសម្ព័ន្ធមិត្តរបស់សហរដ្ឋអាមេរិកឲ្យបង្កើនការផ្គត់ផ្គង់ប្រេងដើម្បីទូទាត់ជាមួយនឹងការកាត់បន្ថយការនាំចេញប្រេងរបស់ប្រទេសអ៊ីរ៉ង់។
លោក Trump បានសរសេរនៅលើ Twitter កាលពីថ្ងៃសៅរ៍ថា ព្រះមហាក្សត្រ Salman bin Abdulaziz Al Saud នៃប្រទេសអារ៉ាប៊ីសាអ៊ូឌីត បានយល់ព្រមផលិតប្រេងបន្ថែមទៀត។
ក្រោយមក សេតវិមានបានធ្វើការកែប្រែការលើកឡើងរបស់លោក Trump ដោយបានបញ្ជាក់ថា ព្រះមហាក្សត្រ Salman bin Abdulaziz Al Saud បានមានបន្ទូលថា ប្រទេសរបស់ព្រះអង្គអាចបង្កើនផលិតកម្មប្រេងតែក្នុងករណីចាំបាច់ប៉ុណ្ណោះ។
កាលពីថ្ងៃអាទិត្យម្សិលមិញ នៅក្នុងកិច្ចសម្ភាសន៍មួយជាមួយនឹងទូរទស្សន៍ Fox News លោក Trump បានបញ្ជាក់ម្ដងទៀតអំពីការអំពាវនាវរបស់លោកឲ្យប្រទេសអារ៉ាប៊ីសាអ៊ូឌីតបង្កើនការផលិតប្រេង ដោយលោកបានអះអាងថា ប្រទេសនេះគួរតែជួយសហរដ្ឋអាមេរិកឲ្យបន្ថយតម្លៃប្រេង ដោយសារតែរដ្ឋាភិបាលអាមេរិកបានជួយរដ្ឋាភិបាលអារ៉ាប៊ីសាអ៊ូឌីតនៅក្នុងការប្រឹងប្រែងរបស់ខ្លួនប្រឆាំងនឹងរដ្ឋាភិបាលអ៊ីរ៉ង់។
តម្លៃប្រេងបានកើនឡើងកាលពីសប្ដាហ៍មុន ដោយសារតែមានការព្រួយបារម្ភថា ការដាក់ទណ្ឌកម្មរបស់សហរដ្ឋអាមេរិកប្រឆាំងនឹងអ៊ីរ៉ង់ អាចធ្វើឲ្យបរិមាណប្រេងឆៅធ្លាក់ចុះខ្លាំងនៅក្នុងទីផ្សារពិភពលោក ស្របពេលដែលតម្រូវការប្រេងនៅលើពិភពលោកមានការកើនឡើង។
តម្លៃប្រេងសាំងកើនឡើងអាចបង្កើតឲ្យមានការព្រួយបារម្ភសម្រាប់លោក Trump នៅមុនការបោះឆ្នោតពាក់កណ្ដាលអាណត្តិខែវិច្ឆិកាខាងមុខនេះ៕