លោក Sean Conley វេជ្ជបណ្ឌិតរបស់ប្រធានាធិបតីសហរដ្ឋអាមេរិកលោក Donald Trump បាននិយាយថា លោក Trump បានធ្វើតេស្តឃើញថា លែងមានជំងឺកូវីដ១៩ ហើយ ក្នុងពេល «ប៉ុន្មានថ្ងៃជាប់ៗគ្នា»។
លោក Conley ថ្លែងដូច្នេះ ស្របពេលដែលលោក Trump បានធ្វើដំណើរទៅកាន់រដ្ឋ Florida ដើម្បីធ្វើយុទ្ធនាការឃោសនាបោះឆ្នោតរបស់លោកជាលើកដំបូង ចាប់តាំងពីលោកត្រូវបានធ្វើតេស្តឃើញថា មានផ្ទុកជំងឺនេះកាលពីដើមខែនេះមក។
នៅក្នុងកំណត់ហេតុមួយចេញដោយសេតវិមានកាលពីថ្ងៃច័ន្ទ លោកវេជ្ជបណ្ឌិត Conley បានបញ្ជាក់ថា លោក Trump ត្រូវបានធ្វើតេស្តដោយប្រើឧបករណ៍ធ្វើតេស្តរកជំងឺកូវីដ១៩ ថ្មី ដែលផ្ដល់លទ្ធផលលឿនរបស់ក្រុមហ៊ុន Abbott Laboratories។ លោក Conley មិនបាននិយាយថា តើលោក Trump បានធ្វើតេស្តពេលណានោះទេ។
លោកវេជ្ជបណ្ឌិត Conley និយាយថា ការធ្វើតេស្តឃើញអវិជ្ជមាននេះ រួមជាមួយនឹងទិន្នន័យសុខភាព និងទិន្នន័យពីមន្ទីរពិសោធន៍បង្ហាញថា លោក Trump គ្មានផ្ទុកជំងឺកូវីដ១៩ ទៀតទេ។ លោក Conley ក៏បានបញ្ជាក់ឡើងវិញផងដែរអំពីការវាយតម្លៃដែលលោកបានផ្ដល់ជូនកាលពីចុងសប្ដាហ៍កន្លងមកថា លោក Trump លែងជាហានិភ័យចម្លងជំងឺកូវីដ១៩ ដល់អ្នកដទៃហើយ។
លោក Trump បានបញ្ជាក់នៅក្នុងកិច្ចសម្ភាសន៍តាមទូរស័ព្ទមួយក្នុងកម្មវិធី «Sunday Morning Futures» របស់ទូរទស្សន៍ Fox News កាលពីថ្ងៃអាទិត្យថា៖ «ខ្ញុំបានឈ្នះវីរុសឆ្កួតដ៏អាក្រក់របស់ចិននេះហើយ។ ខ្ញុំទំនងជាមានភាពស៊ាំនឹងជំងឺនេះប្រហែលជារយៈពេលវែង រយៈពេលខ្លី ឬក៏អាចមួយជីវិតក៏ថាបាន»៕