គេមិនរំពឹងថាលោកប្រធានាធិបតីសហរដ្ឋអាមេរិកDonald Trumpនឹងជួបជាមួយមេដឹកនាំប្រទេសគុយបា និងវេណេស៊ុយអេឡាទេនៅខណៈលោកចូលរួមក្នុងកិច្ចប្រជុំកំពូលស្តីពីទ្វីបអាមេរិកនៅសប្តាហ៍ក្រោយនេះ។ នេះបើយោងតាមមន្រ្តីសេតវិមាន។ ប៉ុន្តែនៅមានឱកាសច្រើនទៀតនៅក្នុងការធ្វើទំនាក់ទំនងរវាងលោក Trump និងសមភាគីរបស់លោកនៅក្នុងតំបន់អាមេរិកឡាទីន និងអាមេរិកខាងជើង នៅឯកិច្ចកំពូលដែលមានរយៈពេលពីរថ្ងៃដែលនឹងចាប់ផ្តើមនៅថ្ងៃសុក្រទី១៣ នៅក្នុងទីក្រុង លីម៉ា ប្រទេសប៉េរូ។
កិច្ចប្រជុំនេះនឹងរៀបចំឡើងនៅស្របពេលដែលលោក Trumpមានគម្រោងបញ្ចូនកងទ័ពទៅកាន់ព្រំដែនសហរដ្ឋអាមេរិកជាមួយនឹងប្រទេសម៉ិកស៊ិក និងបានគំរាមកំហែងដកខ្លួនចេញពីកិច្ចព្រមព្រៀងពាណិជ្ជកម្មសេរីនៅក្នុងតំបន់អាមេរិកខាងជើង ឬហៅកាត់ថា NAFTA។ អ្នកចូលរួមក្នុងកិច្ចប្រជុំនេះជាច្រើនបានរិះគន់ការយកពន្ធនាពេលថ្មីៗនេះរបស់លោកTrump ទៅលើដែកថែបនិងអាលុយមីញ៉ូម។ បើទោះបីជាប្រទេសជាច្រើននៅឯកិច្ចប្រជុំកំពូលនេះបានទទួលការលើកលែងយកពន្ធជាបណ្តោះអាសន្នយ៉ាងណាក៏ដោយ ក៏ប្រទេសទាំងនោះបានគំរាមធ្វើការសងសឹកវិញ។
ទោះបីជាមានហតុការណ៍ចលាចលទាំងអស់នេះក៏ដោយ មន្រ្តីសេតវិមានបានបញ្ជាក់បន្តិចបន្តួចពីរបៀបវីរៈនៅក្នុងកិច្ចប្រជុំកំពូលនេះ។
មន្រ្តីសេតវិមាននឹងមិនបញ្ជាក់ទេថាតើលោក Trump នឹងបន្តថ្លែងពីអ្វីដែលលោកកំពុងគិតដែលជាបញ្ហារសើបមួយចំនួនដូចជាបញ្ហាអន្តោប្រវេសន៍នៅអំឡុងពេលកិច្ចប្រជុំកំពូលនេះយ៉ាងណានោះទេ៕