គណៈវិនិច្ឆ័យក្រុងញូវយ៉កកាលពីថ្ងៃព្រហស្បតិ៍ម្សិលមិញបានកាត់ទោសអតីតប្រធានាធិបតីសហរដ្ឋអាមេរិកលោក Donald Trump ពីបទព្យាយាមដោយខុសច្បាប់លើការបង្កើនឥទ្ធិពលទៅលើលទ្ធផលបោះឆ្នោតដ៏ជោគជ័យរបស់លោកក្នុងឆ្នាំ ២០១៦ ដែលធ្វើឱ្យលោកក្លាយជាប្រធានាធិបតីអាមេរិកដែលគណៈវិនិច្ឆ័យក្នុងសំឡេងឯកច្ឆ័នបានរកឃើញថា លោកមានពិរុទ្ធភាពនៅក្នុងបទចោទព្រហ្មទណ្ឌទាំង ៣៤ ករណីដែលលោកកំពុងប្រឈម។
គណៈវិនិច្ឆ័យដែលមានចៅក្រម ១២ រូបបានពិភាក្សាពិគ្រោះយោបល់គ្នាអស់រយៈពេលពីរថ្ងៃ មុនពេលចេញសាលក្រមប្រឆាំងនឹងអតីតប្រធានាធិបតីអាមេរិកអាយុ ៧៧ ឆ្នាំរូបនេះ នៅក្នុងសវនាការព្រហ្មទណ្ឌជាលើកដំបូង សម្រាប់អតីតប្រធានាធិបតីអាមេរិកមួយរូប។
លោក Trump ត្រូវបានគេសន្មតទុកជាមុនថា នឹងក្លាយជាបេក្ខជនប្រធានាធិបតីរបស់គណបក្សសាធារណរដ្ឋសម្រាប់ការបោះឆ្នោតប្រធានាធិបតីអាមេរិកក្នុងខែវិច្ឆិកា ឆ្នាំ ២០២៤ ខាងមុខនេះ ដោយត្រូវប្រកួតប្រជែងជាមួយប្រធានាធិបតីអាមេរិកលោក Joe Biden នៃគណបក្សប្រជាធិបតេយ្យ ដែលបានឈ្នះលោក Trump នៅក្នុងការបោះឆ្នោតកាលពីឆ្នាំ ២០២០។ ប៉ុន្តែពេលនេះលោក Trump ក៏អាចប្រឈមនឹងលទ្ធភាពដែលត្រូវទទួលទោសដោយព្យួរដែលមានលក្ខខណ្ឌ ឬជាប់ទោសក្នុងពន្ធនាគារហូតដល់ ៤ ឆ្នាំផងដែរ។
ការប្រកាសសាលក្រមកាត់ទោសលោកនឹងត្រូវកំណត់ធ្វើឡើងនៅថ្ងៃទី ១១ ខែកក្កដាខាងមុខនេះ គឺក្នុងអំឡុងពេលនៃយុទ្ធនាការឃោសនាបោះឆ្នោត ដើម្បីវិលត្រឡប់ទៅកាន់សេតវិមានជាថ្មី និងតែប៉ុន្មានថ្ងៃប៉ុណ្ណោះ មុនពេលដែលគណបក្សសាធារណរដ្ឋ នឹងត្រូវរៀបចំមហាសន្និបាតជាតិរបស់ខ្លួននៅថ្ងៃទី ១៥ ខែកក្កដា ដែលនៅទីនោះលោកនឹងត្រូវបានតែងតាំងជាផ្លូវការឱ្យធ្វើជាបេក្ខជនប្រធានាធិបតីអាមេរិករបស់គណបក្សនេះ សម្រាប់ការបោះឆ្នោតប្រធានាធិបតីអាមេរិកក្នុងឆ្នាំ ២០២៤។
មេធាវីការពារក្តីលោក Trump គឺលោក Todd Blanche បានស្នើសុំឱ្យតុលាការបដិសេធចោលសាលក្រមនេះ ប៉ុន្តែចៅក្រុមតុលាការកំពូលរដ្ឋញូវយ៉កលោក Juan Merchan បានទាត់ចោលនូវសំណើរបស់មេធាវីរូបនេះភ្លាមៗ។
នៅក្នុងបន្ទប់សវនាការ លោក Trump មិនបានបង្ហាញពីអារម្មណ៍ក្តុកក្តួលខ្លាំង ក្រោយពីដឹងលទ្ធផលនៃសាលក្រមនេះឡើយ។ ប៉ុន្តែក្រោយពីដើរចេញពីបន្ទប់តុលាការជាមួយទឹកមុខមាំ លោកបានប្រាប់ក្រុមអ្នកសារព័ត៌មានថា វាជាសាលក្រមដែល «អាម៉ាស់មួយ»។
ជាមួយទឹកមុខស្រងូតស្រង៉ាត់ លោកបានសន្យាថា «រឿងនេះនឹងត្រូវបន្តយូរទៅមុខទៀត»។
នៅលើបណ្តាញសង្គម Truth របស់លោកលោក Trump បានសរសេរថា៖ «សិទ្ធិស៊ីវិលរបស់ខ្ញុំត្រូវបានគេបំពានទាំងស្រុងជាមួយនឹងក្រុមមនុស្ស ដែលជ្រៀតជ្រែកក្នុងការបោះឆ្នោតមិនស្របតាមរដ្ឋធម្មនុញ្ញ និងមានលក្ខណៈនយោបាយ។ ភាពបរាជ័យនៃប្រទេសជាតិរបស់យើង កំពុងត្រូវបានគេសើចចំអកនៅជុំវិញពិភពលោក»។
ក្រោយពីសាលក្រមនេះត្រូវបានប្រកាសភ្លាមៗ ក្រុមយុទ្ធនាការឃោសនាបោះឆ្នោតរបស់លោក Trump បានផ្ញើសារអ៊ីមែលរៃអង្គាសប្រាក់មួយ ដោយភ្ចាប់ជាមួយនឹងសំណេររបស់លោក Trump ដែលមានខ្លឹមសារថា «ខ្ញុំជាអ្នកទោសនយោបាយ»។
លោក Biden មិនបានធ្វើអត្ថាធិប្បាយលើសាលក្រមដែលមានពិរុទ្ធភាពនេះឡើយ ប៉ុន្តែក្រុមយុទ្ធនាការឃោសនាបោះឆ្នោតរបស់លោកបានអំពាវនាវដល់អ្នកបោះឆ្នោត មិនត្រូវបោះឆ្នោតឱ្យលោក Trump នៅថ្ងៃទីបោះឆ្នោតទី ៥ ខែវិច្ឆិកាខាងមុខឡើយ»៕