ប្រធានាធិបតីអាមេរិក លោក ដូណាល់ ត្រាំ បាននិយាយវាយប្រហារការស៊ើបអង្កេតរបស់រដ្ឋអាជ្ញាពិសេស លោក Robert Mueller ទៅលើការជ្រៀតជ្រែករបស់រុស្ស៊ីនៅក្នុងការបោះឆ្នោតជ្រើសរើសប្រធានាធិបតីអាមេរិកកាលពីឆ្នាំ២០១៦ ថាជា «ការធ្វើឲ្យខូចកិត្តិយសជាតិ»។
មេដឹកនាំសហរដ្ឋអាមេរិករូបនេះ បានចាប់ផ្ដើមការងារនៅថ្ងៃចន្ទម្សិលមិញនេះ ដោយនិយាយវាយប្រហារការស៊ើបអង្កេតរបស់លោក Mueller ដោយត្អូញត្អែរថា លោករដ្ឋអាជ្ញារូបនេះ «គឺគ្រាន់តែជាបុគ្គលម្នាក់ដែលចង់មានបញ្ហា» ខណៈដែលលោកស៊ើបអង្កេតលើទីប្រឹក្សាយុទ្ធនាការឃោសនាបោះឆ្នោតរបស់លោក ត្រាំ ដែលពាក់ព័ន្ធនឹងរុស្ស៊ី ទៅលើថាតើលោក ត្រាំ ក្នុងនាមជាប្រធានាធិបតី បានរារាំងដល់ដំណើរការយុត្តិធម៌តាមរយៈការព្យាយាមមិនឲ្យការសាកសួរបានសម្រេចដែរឬយ៉ាងណា។
លោក ត្រាំ បានពណ៌នាលោក Mueller ថា «ធ្វើឲ្យអាប់ឱនកិត្តិយសនិងគ្មានគុណសម្បត្តិគួរឲ្យជឿទុកចិត្តបាន» និងបាននិយាយថា «ក្រុមរបស់លោកទាំងមូលដែលមានពួកប្រជាធិបតេយ្យដែលខឹងសម្បារ» បានសម្ភាសន៍លោក Donald McGahn ដែលជាទីប្រឹក្សាសេតវិមាន អស់រយៈពេល៣០ម៉ោង ដោយសារតែមានការអនុញ្ញាតពីលោក សម្រាប់គោលបំណងតម្លាភាព។
បណ្ដាញសារព័ត៌មានបានរាយការណ៍ថា លោក ត្រាំ និងមេធាវីរបស់លោកមិនដឹងអំពីទំហំការងារទាំងមូលនៃអ្វីដែលលោក McGahn បានប្រាប់ដល់ក្រុមការងាររបស់អ្នកស៊ើបអង្កេតលោក Mueller ទេ៕