បេក្ខជនប្រធានាធិបតីសហរដ្ឋអាមេរិកមកពីគណបក្សសាធារណរដ្ឋលោក Donald Trump បានស្នើឲ្យមានការកំណត់ចំពោះអាណត្តិរបស់សមាជិកសភា ដែលនេះជាផ្នែកមួយនៃវិធានការចម្រុះរបស់លោក ដើម្បីកែទម្រង់នយោបាយអាមេរិក។
លោក Trump បានប្រាប់អ្នកគាំទ្ររបស់លោកនៅក្នុងរដ្ឋ Colorado កាលពីថ្ងៃអង្គារម្សិលមិញថា៖ «ពេលវេលាឲ្យមានការកំណត់ចំពោះអាណត្តិរបស់សមាជិកសភាបានមកដល់ហើយ។ វិធានការនេះមិនត្រឹមតែបញ្ចប់នូវអំពើពុករលួយក្នុងជួររដ្ឋាភិបាលប៉ុណ្ណោះទេ ប៉ុន្តែក៏នឹងជួយបញ្ចប់នូវភាពទន់ខ្សោយនៃសេដ្ឋកិច្ចដែលយើងកំពុងជួបប្រទះសព្វថ្ងៃផងដែរ»។
បើយោងតាមច្បាប់រដ្ឋធម្មនុញ្ញសហរដ្ឋអាមេរិក ប្រធានាធិបតីអាចកាន់អំណាចបានតែពីរអាណត្តិតែប៉ុណ្ណោះ។ ប៉ុន្តែមិនមានការកំណត់ដូចនេះចំពោះអាណត្តិរបស់សមាជិករដ្ឋសភា និងសមាជិកព្រឹទ្ធសភារបស់សហរដ្ឋអាមេរិកនោះទេ ដោយគេឃើញ សមាជិកសភាភាគច្រើននៅកាន់តំណែងក្នុងរយៈពេលច្រើនអាណត្តិបន្តបន្ទាប់គ្នា។ នៅក្នុងការបោះឆ្នោតឆ្នាំ ២០១២ សមាជិកសភាច្រើនជាង ៩០ ភាគរយ ត្រូវបានគេបោះឆ្នោតជ្រើសតាំងឡើងវិញ។
កំណែទម្រង់ផ្សេងៗទៀតដែលស្នើឡើងដោយលោក Trump មានដូចជា ការហាមឃាត់អតីតសមាជិកសភា បុគ្គលិករបស់សមាជិកសភាទាំងនោះ និងអ្នកដែលធ្លាប់បានបម្រើការនៅក្នុងអំណាចនីតិបញ្ញត្តិនៃជួររដ្ឋាភិបាល មិនឲ្យធ្វើការជាអ្នកបញ្ចុះបញ្ចូលឲ្យមានការកែប្រែគោលនយោបាយក្នុងរយៈពេល ៥ ឆ្នាំ និងហាមឃាត់ពេញមួយជីវិតចំពោះអ្នកបញ្ចុះបញ្ចូលជនបរទេស ដែលរៃអង្គាសថវិកាសម្រាប់បេក្ខជនចូលរួមការបោះឆ្នោតនៅក្នុងសហរដ្ឋអាមេរិក៕