នៅក្នុងការបង្ហោះសារបណ្តាញសង្គម Twitter ពីរ ឬបី កាលពីព្រឹកថ្ងៃអាទិត្យនេះ លោក Trump បាននិយាយថា ជាជាងរិះគន់លោក លោក Lewis គួរផ្តោតការយកចិត្តទុកដាក់លើការបម្រើប្រជារាស្ត្រក្នុងមណ្ឌលរបស់លោក។
នៅក្នុងសេចក្តីសម្ភាសន៍មួយកាលពីថ្ងៃសុក្រជាមួយកម្មវិធី Meet the Press នៃបណ្តាញទូរទស្សន៍អាមេរិកាំង NBC ដែលនឹងផ្សព្វផ្សាយនៅថ្ងៃអាទិត្យ លោក Lewis បានមានប្រសាសន៍ថា «ខ្ញុំមានជំនឿក្នុងការខិតខំព្យាយាមធ្វើការជាមួយប្រជារាស្ត្រ។ នេះជាកិច្ចការពិបាក។ នេះជាកិច្ចការដែលពិបាកខ្លាំងណាស់។ ខ្ញុំមិនយល់ថា ប្រធានាធិបតីជាប់ឆ្នោតនេះជាប្រធានាធិបតីត្រឹមត្រូវតាមច្បាប់ទេ»។
លោក Lewis បានមានប្រសាសន៍បន្ថែមថា «ខ្ញុំយល់ថាពួករុស្ស៊ីបានចូលរួមក្នុងការធ្វើឱ្យបុរសនេះជាប់ឆ្នោត»។
លោកស្រី Linda Jones អ្នកនាំពាក្យរបស់លោក Lewis មិនបានឆ្លើយតបនឹងការវាយប្រហាររបស់លោក Trump ទេក៏ប៉ុន្តែលោកស្រីបាននិយាយថា «យើងជាប្រទេសជាតិមួយ ត្រូវការដឹងថាតើរដ្ឋាភិបាលបរទេសមួយមានឥទ្ធិពលលើការបោះឆ្នោតរបស់យើងឬទេ»។
សារក្នុងបណ្តាញ Tweeter របស់លោក Trump បានបណ្តាលឱ្យមានការឆ្លើយតបខ្លាំងពីពួកប្រជាធិបតេយ្យច្រើននាក់ ដោយមានរួមបញ្ចូលទាំងលោកស្រី Nancy Pelosi ផងដែរ។ មេដឹកនាំក្រុមភាគតិចក្នុងសភាតំណាងរាស្ត្រអាមេរិកាំងរូបនេះបានបង្ហោះសារក្នុង Tweeter កាលពីថ្ងៃសៅរ៍ថា ការប៉ុនប៉ងកាលពីពេលមុនៗក្នុងការធ្វើឱ្យលោក Lewis មានការរាថយនោះ មិនបានសម្រេចជោគជ័យទេ។
កាលពីពេលថ្មីៗនេះ ទីភ្នាក់ងារស៊ើបការសម្ងាត់ស.រ.អា.បានសន្និដ្ឋានថាប្រទេសរុស្ស៊ីបានប៉ុនប៉ងធ្វើឱ្យមានឥទ្ធិពលលើការបោះឆ្នោតប្រធានាធិបតីស.រ.អា.ដោយជួយធ្វើឱ្យលោក Trump ជាប់ឆ្នោត៕