ការហាមប្រាមមិនឱ្យធ្វើដំណើរដែលបានដាក់កំហិតលើក្រុមមន្ត្រីតាលីបង់អាហ្វហ្គានីស្ថានជាន់ខ្ពស់ប្រាំនាក់ដែលត្រូវបានដោះលែងដោយស.រ.អា.នៅក្នុងការប្តូរអ្នកទោសកាលពីឆ្នាំមុននឹងផុតកំណត់នៅថ្ងៃអាទិត្យនេះ។
ក្រុមមន្ត្រីតាលីបង់ទាំងប្រាំនាក់នេះបានឋិតនៅក្នុងប្រទេសកាតាចាប់តាំងពីឆ្នាំទៅមិញនៅពេលពួកគេបានត្រូវដោះលែងជាថ្នូរនឹងការដោះលែងទាហានអាមេរិកាំងម្នាក់ដែលក្រុមបះបោរបានឃុំឃាំងជិត៥ឆ្នាំនៅក្នុងប្រទេសអាហ្វហ្គានីស្ថាន។
ការជិតដល់ទីបញ្ចប់នៃការហាមប្រាមមិនឱ្យធ្វើដំណើរនេះបានធ្វើឱ្យសមាជិកសភាអាមេរិកាំងនិងក្រុមអ្នកធ្វើការចរចាសន្តិភាពអាហ្វហ្គានីស្ថានមានការព្រួយបារម្ភថាក្រុមអតីតយុទ្ធជនតាលីបង់ទាំងនេះនឹងវិលត្រឡប់ទៅកាន់សមរភូមិវិញនៅក្នុងប្រទេសអាហ្វហ្គានីស្ថាន។ ក្រុមមន្ត្រីរដ្ឋាភិបាលស.រ.អា.និយាយថា ពួកគេមានការទាក់ទងជិតស្និទ្ធជាមួយអាជ្ញាធរនៅក្នុងប្រទេសអាហ្វហ្គានីស្ថាន និងប្រទេសកាតា ក៏ប៉ុន្តែគ្មានការពិភាក្សាជាសាធារណៈអំពីលទ្ធភាពនៃការបន្តការហាមប្រាមមិនឱ្យធ្វើដំណើរនោះទេ។
ក្រុមអតីតអ្នកទោសទាំងនេះជាមន្ត្រីជាន់ខ្ពស់នៅក្នុងក្រុមតាលីបង់ដែលបានត្រួតត្រាប្រទេសអាហ្វហ្គានីស្ថាន និងជាម្ចាស់ផ្ទះដែលបានទទួលបណ្តាញភេរវជន al-Qaida ឱ្យទៅរស់នៅក្នុងប្រទេសអាហ្វហ្គានីស្ថាន ពីឆ្នាំ១៩៩៦រហូតដល់សប្តាហ៍ចុងក្រោយនៃឆ្នាំ២០០១។ កងកម្លាំងស.រ.អា.និងក្រុមសម្ព័ន្ធមិត្តបានបណ្តេញនិងបំបែកពួកតាលីបង់នៅក្រោយការវាយប្រហារដោយពួក al-Qaida ទៅលើស.រ.អា.កាលពីថ្ងៃទី១១ ខែកញ្ញា ឆ្នាំ២០០១៕