ព្រឹទ្ធសភាអាមេរិកបានអនុម័តកាលពីថ្ងៃពុធទៅលើបេក្ខភាពសម្រាប់តំណែងជារដ្ឋមន្ត្រីក្រសួងការបរទេសអាមេរិកដែលលោកប្រធានាធិបតី Donald Trump បានតែងតាំង គឺលោក Rex Tillerson នាយកប្រតិបត្តិក្រុមហ៊ុនប្រេង ExxonMobil។
ព្រឹទ្ធសភាក៏បានជំរុញដល់ដំណើរការអនុម័តទៅលើរដ្ឋមន្ត្រី៣នាក់ទៀតដែលលោក ត្រាំ បានតែងតាំងសម្រាប់បំពេញគណៈរដ្ឋមន្ត្រីរបស់លោកផងដែរ។ ដំណើរការនេះទៅមុខបានដោយសារតែសមាជិកគណបក្សសាធារណរដ្ឋព្យាយាមប្រើប្រាស់វិធីសាស្រ្តដែលខ្លួនមិនធ្លាប់ធ្វើពីមុនមក ដើម្បីយកឈ្នះលើវិធីសាស្រ្តពន្យារពេលដែលសមាជិកខាងគណបក្សប្រជាធិបតេយ្យមិនធ្លាប់ធ្វើពីមុនមកដូចគ្នា។
មានតែសមាជិកខាងគណបក្សប្រជាធិបតេយ្យ៣នាក់និងអ្នកឯករាជ្យម្នាក់ប៉ុណ្ណោះដែលបានចូលរួមជាមួយនឹងសមាជិកគណបក្សសាធារណរដ្ឋដែលស្រុះស្រួលគ្នា នៅក្នុងការគាំទ្របេក្ខភាពរបស់លោក Tillerson ដែលទទួលបានសម្លេងបោះឆ្នោតគាំទ្រ ៥៦ទល់នឹង៤៣។ ការអនុម័តនេះត្រូវបានធ្វើឡើង បន្ទាប់ពីសមាជិកព្រឹទ្ធសភានៃគណបក្សទាំង២ចំណាយពេលរាប់សប្តាហ៍ពិចារណាទៅលើទំនាក់ទំនងដ៏ល្អរវាងនាយកប្រតិបត្តិក្រុមហ៊ុនប្រេង ExxonMobil រូបនេះ ជាមួយនឹងប្រធានាធិបតីរុស្ស៊ី លោក Vladimir Putin និងសមត្ថភាពរបស់លោកក្នុងការទុករឿងជំនួញឲ្យនៅមួយឡែក ហើយងាកមកបំពេញតួនាទីជាមន្ត្រីការទូតកំពូលរបស់អាមេរិក៕